Ababelenga Ino Magazini Balepusha Ukuti . . .

Bushe Lesa Alikwata Uko Ekala?

▪ Ifilonganino fya mapepo ifyalekanalekana fitila Lesa aba fye konse konse mu fifulo fye fyonse. Ica kumwenako fye, icitabo ca The New Catholic Encyclopedia cilondolola Lesa ukuti “aba fye konse konse na mu fintu fyonse fye.” Ifi fine e fyo no watendeke Icalici lya Methodist, John Wesley, alembele mu lyashi ilyakwete umutwe wa kuti “Lesa Uwaba fye Konse Konse,” kabili alondolwele ukuti “Lesa aba fye konse na pa ncende yonse fye kumo na pashaba ifyo abumba.”

Finshi Baibolo isambilisha pali ili lyashi? Bushe Lesa aba fye konse konse, nampo nga ni mu muulu, pano calo, nangu fye ni mu bantunse pa nshita imo ine?

Kwena Baibolo yalanda pali Lesa ukuti alikwata icifulo uko ekala, ne co cifulo ni ku muulu. Mu Baibolo mwalilembwa ipepo ilya Mfumu Solomone, umo alombele Lesa ukuti: “Imwe mukomfwe mu muulu, mu bwikalo bwenu ububelelela.” (1 Ishamfumu 8:43) Ilyo Yesu Kristu alesambilisha abasambi bakwe ukupepa, abebele ukuti balingile ukupepa kuli “Shifwe wa mu muulu.” (Mateo 6:9) Ilyo Yesu abuukile ku bafwa, Baibolo yalanda ukuti: “Aingile mu muulu mwine, ku kumonekela nomba ku cinso ca kwa Lesa.”—AbaHebere 9:24.

Aya amalembo yalelangilila fye bwino bwino uko Yehova Lesa ekala, taba fye konse konse lelo ekala ku muulu. Kwena natwishiba ukuti “umuulu” uwalumbulwa muli ifi fyalembwa te lwelele iyo. Kabumba wa fintu fyonse te kuti ekale mu muulu uyu wine tumona. (1 Ishamfumu 8:27) Baibolo itweba ukuti “Lesa Mupashi.” (Yohane 4:24) Ekala mu myulu iyo ifwe fwe bantunse tushimona.—1 Abena Korinti 15:44.

Inga amalembo ya mu Baibolo ayalanda pali Lesa kwati nalimo aba fye konse konse, yena kuti twalandapo shani? Ku ca kumwenako pa Amalumbo 139:7-10, Davidi alandile pali Lesa ati: “Ni kwi ningaya ukushaba umupashi wenu, kabili ni kwi ningabutukila ukufuma pa cinso cenu? Nga nanina naya ku muulu, e ko mwaba; kabili nga nayanshika ubusanshi bwandi ku Nshiishi, moneni na ko e ko mwaba. Nga nafwala amapindo ya macaca, pa kuti njeikala ukwalepesha muli bemba, na ko kwine ukuboko kwenu kukantungulula no kuboko kwenu ukwa ku kulyo kukanjikatilila.” Bushe ifi fikomo filelangilila ukuti Lesa aba fye konse konse, mu fifulo fyonse ifilumbwilwe?

Ica ntanshi ico mufwile ukwishiba ca kuti Davidi atile: “Ni kwi ningaya ukushaba umupashi wenu?” * Lesa kuti atuma umupashi wakwe ukuya mu kumona fimo no kubomba ifyo alefwaya ku cifulo fye icili conse, ukwabula ukuti umwine abeko. Katulangilile: Mu myaka ya nomba line basayansi balisambilila pa mushili waba ku planeti ya Mars, iyaba ukutali sana ne Sonde. Bacita shani pa kusambililapo? Tabayako abene, lelo bamwena fye pa fikope ne fyebo fimbi ifyakopwa kuli fimashini ifyo batuma ku Mars.

Kanshi na Yehova Lesa te kutila afwile ukuba konse konse pa kuti eshibe ifilecitika mu muulu na pano isonde. Icebo ca kwa Lesa citila: “Takwaba icibumbwa icafisama ku cinso cakwe.” (AbaHebere 4:13) E ico kanshi amaka ya kwa Yehova ayo abomfya pa kucita ukufwaya kwakwe, nangu tutile, umupashi wa mushilo, kuti wafika fye ukuli konse, pa kuti Lesa engalamona fyonse no kubomba ifyo afwaya ninshi ena ali fye pa cifulo cimo ku muulu, ‘ku bwikalo bwakwe ubwa mushilo.’—Amalango 26:15.

[Futunoti]

[Abatusuminishe Ukubomfya Icikope pe bula 27]

IAC/RGO/David Malin Images