Ababelenga Ino Magazini Balepusha Ukuti . . .

Bushe Abana Abanono Balingile Ukubatishiwa?

▪ Ba Victoria batile: “Naletiina nati umwaice wandi, John, aile ku Limbo.” Mulandu nshi baletiinina? Balondolwele ukuti: “John afwile ninshi talabatishiwa, kabili shimapepo wa ku Katolika alandile ukuti apo John afwile ninshi talabatishiwa, ali no kuba mu Limbo umuyayaya.” Ici cisambilisho cilatiinya nga nshi, lelo bushe ca mu Baibolo? Bushe Baibolo isambilisha ukuti abana abanono abafwa ukwabula ukubatishiwa bakatwalilila fye ukuba mu mutwala?

Baibolo isambilisha ukuti Abena Kristu bafwile ukubatishiwa. Yesu aebele abasambi bakwe ukuti: “Kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo, mulebasambilisha ukulakonka fyonse ifyo namwebele.” (Mateo 28:19, 20) Ukulingana na ya mashiwi, Yesu atile ababatishiwa basambi bakwe. Ici calola mu kuti ababatishiwa bantu abasambilila pali Yesu kabili abasalapo ukulamukonka, icintu ico umwana umunono ashingacita.

Na lyo line, abengi bapampamina fye pa kutila aya mashiwi Yesu alandile yalola mu kuti na bana abanono balingile ukubatishiwa. Pasta wa ku Lutheran, Richard P. Bucher atile: “Umuntu fye onse alingile ukubatishiwa, na bana abanono kumo.” Alundilepo no kuti: “Nga tamubabatishe ninshi te kuti balekelelwe imembu kabili ninshi kuti baya mu kupya mu mulilo.” Lelo ifi pasta alandile filapilikana ne fyo Yesu alesambilisha mu nshila shitatu.

Ica kubalilapo, Yesu tasambilishe ukuti abana abanono balingile ukubatishiwa. Mulandu nshi ici cishinka cacindamina? Taleni tontonkanyeni: Yesu alesambilisha abasambi bakwe ifyo Lesa afwaya. Limo alebasambilisha amasambililo ayacindama imiku iingi. Mulandu nshi? Pantu alefwaya ukuti abasambi bakwe bomfwikishe icishinka. (Mateo 24:42; 25:13; Marko 9:34-37; 10:35-45) Lelo tatalile abasambilishapo ukuti abana abanono balingile ukubatishiwa. Bushe nalimo Yesu alabile fye ukubasambilisha ukuti na bana abanono balingile ukubatishiwa? Awe nakalya! Nga ca kuti abana abanono balingile ukubatishiwa, ukwabula no kutwishika, Yesu nga alisambilishe abasambi bakwe.

Icalenga bubili, Yesu tatalile asambilishapo ukuti umuntu uuli onse alaya mu kucula nga afwa. Asumine mu mashiwi ya mu Baibolo ayalanda bwino bwino ukuti: “Aba mweo balishiba ukuti bakafwa; lelo abafwa, tabaishiba akantu nangu kamo.” (Lukala Milandu 9:5) Yesu alishibe ukuti abafwa tabacula mu mutwala, mu Limbo, mu mulilo wa pe, nelyo ku cifulo icili conse. Lelo alesambilisha ukuti abafwa tabaishiba akantu nangu kamo, baba fye kwati nabalaala.—Yohane 11:1-14.

Icalenga butatu, Yesu asambilishe ukuti “bonse ababa mu nshiishi bakebukishiwa” kabili bakabuuka. (Yohane 5:28, 29) Ukwabula no kutwishika, pali aba pakaba ne minshipendwa ya bantu abafwile ukwabula ukubatishiwa. Ilyo bakabuuka, bakakwata ishuko lya kusambilila ifyo Lesa afwaya kabili bakekala umuyayaya mu Paradaise pano calo. *—Amalumbo 37:29.

Kanshi, Baibolo taisambilisha ukuti abana abanono balingile ukubatishiwa.

[Futunoti]