Fundeni Abana Benu

“Alambatile pe Kuli Yehova”

BUSHE balikwebapo ukukambatika sitampa pali enifulupu?— * Nga ca kutila gluu ili bwino ninshi sitampa te kuti ikambatuke. Ifi, e fyo ishiwi ukulambatila lipilibula. Twalalanda pa muntu uo Baibolo itila “alambatile pe kuli Yehova,” Lesa wa cine. Ishina lyakwe ni Hisekia. Natumone ifyo twingasambilila ku fyo acitile.

Ilyo Hisekia alekula, ifintu tafyali bwino. Ahasi, wishi kabili imfumu ya Yuda alilekele ukupepa Yehova. Ilyo Hisekia ali umwaice, Ahasi e wali pa ntanshi mu kupepa tulesa twa bufi. Ahasi alipeye fye no mwana wakwe, munyina wa kwa Hisekia, no kumupeela ilambo kuli kalesa ako alepepa!

Nangu ca kutila Ahasi alecita ifyabipa, Hisekia ena alitwalilile ukumfwila Yehova. Bushe uletontonkanya ukuti calyangwike kuli Hisekia ukutwalilila ukulaumfwila Yehova?— Cifwile calikosele. Lelo Hisekia tanenwike! Leka tumone icamwafwile ukulambatila kuli Yehova ne fyo twingamupashanya.

Hisekia alisambilile pa bantu abalambatile kuli Yehova. Pali aba pali na Davidi. Nangu ca kutila Davidi ali pa calo imyaka iingi ninshi Hisekia talabako, Hisekia afwile alisambilile pali ena mu Malembo. Davidi alembele ukuti: “Nga tata na mayo bansha, Yehova kuti ambuula.”

Bushe wamona ica-afwile Davidi ukulaumfwila Yehova?— Citetekelo! Davidi alicetekele ukuti nga atwalilila ukuba ne cumfwila, Yehova aali no kumwafwa. Davidi taletwishika  nakalya! Ukwabula no kutwishika, ukutontonkanya pali Davidi kwalyafwile Hisekia ukulambatila kuli Yehova pantu alemumfwila. Na iwe kuti walambatila kuli Yehova nga ulemumfwila kabili kuti wacetekela ukuti Yehova akakwafwa.

Nomba kuti wacita shani nga ca kutila abafyashi bobe tabapepa Yehova?— Lesa aeba abana ukuti bafwile ukulaumfwila abafyashi babo. Kanshi ufwile ukulaumfwila abafyashi bobe. Lelo nga ca kutila bakweba ukucita icintu cimo ico Lesa atila taufwile ukucita, kuti wabalondolwela umulandu ushingacitila ica musango yo. Taufwile ukubepa, ukwiba, nelyo ukucita icabipa icili conse ico Lesa atila calilubana, te mulandu no wingakweba ukucite co cintu. Nga waumfwila Lesa ninshi wacita icisuma!

Kwaliba abantu abacitile ifisuma abo twingapashanya. Ukulunda pali Davidi, Hisekia alisambilile na pali Yotamu wishikulu. Nangu ca kutila Yotamu afwile ninshi Hisekia talafyalwa, alisambilile pali ena, nge fi fine na ifwe twingasambilila pali ena muli Baibolo. Bushe uletontonkanya ukuti ni bani bambi abo twingapashanya?—

Ca cine ukutila kuti wasambilila muli Baibolo pa filubo Hisekia, Davidi, Yotamu, e lyo na bantu bambi ababembu bacitile. Na lyo line aba bantu balitemenwe Yehova, balisumine ifilubo fyabo kabili balyeseshe na maka ukulacita icalungama. Wilaba ukuti, Umwana wa kwa Lesa fye, Yesu, e wali uwapwililika. Kuti cawama ukusambilila sana pali ena no kulamupashanya.

Belenga muli Baibolo yobe

2 Ishamfumu 18:6; 2 Imilandu 28:1-3

Amalumbo 27:10; Abena Efese 6:1; Abena Kolose 3:20

2 Imilandu 27:1, 2; 1 Petro 2:21

[Futunoti]