Baibolo Ilaalula Abantu

“Nalefwaisha ukuba shimapepo”

Abashimika ili lyashi ni ba Roberto Pacheco

UMWAKA BAFYELWE: 1957

ICALO: MEXICO

IFYO BALI: BALESAMBILILA IFYA BUSHIMAPEPO KABILI BALI ABALUBULI

INKULILO YANDI: Nafyalilwe mwi tauni ilinono ilya Texcoco. Pali ilya nshita, imisebo iingi tayapangilwe na manenekela kanshi mwaleba ulukungu sana. Ilingi line kwaleba abantu abalefuma mu mishi yabelele lwa mupepi. Baleisa na basenda ifipe ifingi pa mpunda ifyo baleisa mu kushitisha mwi tauni umo twaleikala. Twafyelwe 9 kabili nine namba 7 kabili twali abapiina sana. Pa kuti batata basakamane ulupwa, balebila insapato isho beta ati guaraches. Lelo bafwile ilyo nali ne myaka 7 kabili ukufuma ilya nshita, bamayo balecula sana ukutufwaila ifya kulya.

Bashikulu balishibe ukulisha icilimba icapala banjo ico beta ati violin kabili e baletungulula akalibumba kabaishibe sana ukulisha inyimbo sha mapepo. Abengi mu lupwa lwesu balishibe ukulisha ifilimba ifyalekanalekana. Bayama balelisha piano no kwimba e lyo bamayo bali mwi bumba lya ba kemba ilya ku calici. Twali baKatolika bakamamo na menshi ica kuti nali kampenga kabili nalefwaisha no kuba mishonari wa ku Katolika. Nalitemenwe sana no kutamba amafilimu ya karate ayanengele ukuti imbe uwa lubuli sana.

Ilyo naile ku musumba wa Puebla, natendeke ukusambilila ifya bushimapepo. Ico nalefwaisha sana, kuba shimapepo wa ku Katolika. Lelo mu mwaka nalepwishishamo amasambililo, nalifupwilwe nga nshi ne fyalecitika mwi Calici lya baKatolika. Sista wa ku Katolika atendeke ukumpatikisha ukulaala nankwe. Nalikeene imiku iingi, lelo ifi alecita fyanengele ukufwaya ukuupa. Na kabili namwene ukuti bashimapepo abengi  balecita ifyabipa mu bumfisolo. Mu kuya kwa nshita nasukile naleka amasambililo ya bushimapepo.

Natendeke ukusambilila ifya nyimbo pe sukulu lya National Conservatory of Music mu Musumba wa Mexico. Ilyo napwishishe amasambililo, nalyupile kabili twalikwete na bana 4. Pa kusakamana ulupwa lwandi, naleimba inyimbo pa Minsa ya baKatolika.

Amafya mu cupo cesu yatendeke ilyo twaupene fye. Twalelwa sana ne calelenga, bufuba. Twaletendeka fye ukuumana kwati bufi mpaka fye twalwa no ku kulwa. Pa numa ya myaka 13, twalisukile twalekana.

IFYO BAIBOLO YA-ALWILE UBUMI BWANDI: Nakumene ne Nte sha kwa Yehova ninshi nshilalekana no mwina mwandi. BaNte babili balitutandalile kabili balitwipwishe nga kuti twatemwa ukusambilila Baibolo. Nalemona kwati nalishibe ifingi pa fya kwa Lesa, e ico natendeke ukulanshanya na bo pa kuti fye mbashinine ukuti ifyo balelanda fya bufi. Nalibepwishe ifipusho ifyakosa ifyo naletontonkanya ukuti te kuti bafyasuke. Lelo icampapwishe ca kuti baleasuka bwino sana kabili balebomfya Baibolo. E lyo natendeke ukumona ukuti kanshi finono naishibe. Na lyo line, umwina mwandi talefwaya baNte e lyo ine nalikwete sana ifya kucita, ne ci calengele ukuti baleke ukulatutandalila.

Ilyo papitile imyaka 5, natendeke ukwikala no mwanakashi umbi, Elvira, kabili baNte balitendeke ukututandalila na kabili. Elvira ena tapatile baNte, e co tacayafishe ukulasambilila Baibolo. Na lyo line, palipitile imyaka iingi pa kuti njaluke.

Naishilesanga ukuti pa kuti ndepepa Yehova no mutima wandi onse, nalekabila ukwalula imibele yandi. Ica kubalilapo, nalekabila ukuleka ukwimba inyimbo ku Minsa ya baKatolika, ne ci cali no kulenga mfwaye incito imbi iya kungafwa ukusanga umwakuliila. (Ukusokolola 18:4) E lyo kabili ine na Elvira, twalekabila ukulembesha icupo cesu.

Lelo icayafishe sana, kuleka ukukalipa bwangu. Amalembo ayangafwile sana ni aya, Amalumbo 11:5, apatila Yehova alipata ubunkalwe, e lyo na 1 Petro 3:7 apo nasambilile ukuti nga ndefwaya Yehova aleumfwa amapepo yandi, mfwile ukulasunga bwino umwina mwandi. Ilyo naletontonkanya pali aya Amalembo e lyo no kupepa ukuti Yehova angafwe, nasukile naleka ukufulwa bwangu.

IFYO NANONKELAMO: Pali ino nshita, mu lupwa lwesu mwaliba insansa kabili ndesha sana ukulaumfwana na bana bandi aba mu cupo ca ntanshi. Kabili ndeafwa ulupwa nakwata pali ino nshita ukutemwa sana Yehova.

Ilyo nali umwaice, nalefwaisha ukuba shimapepo no kula-afwa abantu. Lelo nangu ca kuti nshili shimapepo, naliba ne nsansa. Pa kuti ndesakamana ulupwa lwandi, ndasambilisha abantu bambi inyimbo. Ala ndatasha Yehova pa fyo antekanishishe pa kuti njaluke, imbe umuntu umusuma!