“Alalambula Abamufwaisha”
Palameni Kuli Lesa
“Alalambula Abamufwaisha”
Bushe Yehova alatasha nga amona ifyo ababomfi bakwe babombesha pa kufwaya ukumusekesha? Bamo balakaana, batila Lesa tatasha. Lelo ubu bufi ubwafita fititi. Baibolo yalilondolola bwino sana ifyo Lesa aaba. Itweba ukuti Yehova alatasha pa fyo ababomfi bakwe aba citetekelo babombesha pa kufwaya ukumusekesha. Natulande pa mashiwi umutumwa Paulo alembele ayaba pa AbaHebere 11:6.
Finshi tufwile ukucita pa kuti tulesekesha Lesa? Paulo alembele ukuti: “Ukwabula icitetekelo te kuti tusekeshe Lesa.” Muli ili ilembo, Paulo talandile ukuti calyafya ukusekesha Lesa nga tatuli ne citetekelo. Lelo atile te kuti tusekeshe Lesa nga tatuli ne citetekelo. Kanshi Paulo aloseshe mu kuti umuntu afwile fye ukuba ne citetekelo pa kusekesha Lesa.
Fintu nshi fibili ifyo tufwile ukwishiba pa kuti tusekeshe Lesa? Intanshi ‘tufwile ukusumina ukuti Lesa e ko aba.’ Na kuba te kuti tusekeshe Lesa nga ca kuti tatwasumina ukuti e ko aba. Ukuba ne citetekelo cakosa takupeelela fye pa kwishiba ukuti Yehova e ko aba, pantu ifibanda na fyo fyalishiba ukuti e ko aba. (Yakobo 2:19) Nga twalicetekela ukuti Lesa e ko aba, tufwile no kulacita ifyo afwaya.—Yakobo 2:20, 26.
Ica bubili, ‘tufwile ukusumina ukuti’ Lesa ni ‘kalambula.’ Umuntu uwakwata icitetekelo icakosa alishiba ukuti Lesa akamulambula pa fyo esha na maka ukucita ukufwaya kwakwe. (1 Abena Korinti 15:58) Bushe kuti twasekesha shani Yehova nga tatwacetekela ukutila kuti atulambula? (Yakobo 1:17; 1 Petro 5:7) Kanshi umuntu uulanda ukuti Lesa tatubikako amano no kuti tatasha pa fyo tumubombela kabili takwata cikuuku, ninshi taishiba Lesa wa cine.
Bantu ba musango shani Yehova alambula? Paulo atile bantu “abamufwaisha.” Icitabo cimo ico bakapilibula ba Baibolo babomfya citila, ishiwi lya ciGriki ilya kuti “abamufwaisha” talipilibula ukuti umuntu “afwile fye ukusambilila pali Lesa epela,” lelo afwile no kubikako sana amano ku “kupepa Lesa.” Icitabo cimbi citila, ili ishiwi mu ciGriki lilanga ukuti umuntu afwile ukubombesha sana pa kusekesha Lesa. Yehova alalambula ababa ne citetekelo cakosa pantu cilabalenga ukubombesha ilyo balecita ukufwaya kwakwe e lyo no kumupepa no mutima wabo onse.—Mateo 22:37.
Bushe Yehova akalambula shani ababomfi bakwe ababa ne citetekelo? Akabalambula pantu abalaya ukuti bakekala umuyayaya muli Paradaise pano calo kabili ifi akabacitila filanga ukuti alibabikako amano kabili alibatemwa. (Ukusokolola 21:3, 4) Na pali ino ine nshita, bonse abafwaisha Yehova balapaalwa nga nshi. Umupashi wa mushilo e lyo ne Cebo ca kwa Lesa filalenga abantu ukuba ne nsansa e lyo no kulaikala bwino.—Amalumbo 144:15; Mateo 5:3.
Ukwabula no kutwishika, Yehova alatasha pa fyo ababomfi bakwe aba cishinka bamubombela no mutima wabo onse. Bushe ukwishiba ifi kwamulenga ukufwaisha ukupalama kuli Lesa? Nga mulefwaisha ukupalama kuli Lesa, kuti cawama mwaishibilapo na fimbi pa fyo mwingaba ne citetekelo cakosa icingalenga Lesa ukumulambula.
Amalembo ya Kubelenga mu November
[Amashiwi pe bula 11]
Bushe kuti twasekesha shani Yehova nga tatwacetekela ukutila kuti atulambula?
