Baibolo yalilanda pa tushita ilyo abakwete amaka baletitikisha abashakwete amaka. E fyo cali na kuli Nabote. * Mu myaka ya ba 900 B.C.E., imfumu ya bena Israele Ahabu, yasuminishe umukashi wakwe Yesebele ukwipaya Nabote na bana bakwe abaume pa kuti akapoke ibala lya myangashi. (1 Ishamfumu 21:1-16; 2 Ishamfumu 9:26) Cinshi Lesa alekele Ahabu uwakwete amaka ukucita ica musango uyu?

Lekeni tulande pa cintu cimo icacindama sana: Lesa te kuti abepe. (Tito 1:2) Finshi ili ilembo litusambilisha pa kutitikisha abantu? Ilyo Lesa apangile Adamu, alimusokele ukuti bucipondoka kuti bwalenga afwa. Na cine, ukutula apo Adamu na Efa bapondokele Lesa mwi bala lya Edeni, abantu balafwa. Na kuba, umuntu uwabalilepo ukufwa ni Abele, uo Kaini aipeye pa mulandu wa mutitikisha.—Ukutendeka 2:16, 17; 4:8.

Ukutula ilyo, Baibolo yalilanda ukuti: “Umuntu atekela umuntu munankwe ku kumucusha.” (Lukala Milandu 8:9) Bushe aya amashiwi ya cine? Yehova alyebele abantu bakwe, abena Israele ukuti imfumu shabo shakulabatitikisha, kabili abantu bakulalilila kuli Lesa. (1 Samwele 8:11-18) Imfumu Solomone nayo, yaletitikisha sana abantu. (1 Ishamfumu 11:43; 12:3, 4) Imfumu shabipa pamo nga Ahabu, shena shalicililemo sana ukutitikisha abantu. Tontonkanyeni pali ici: Nga ca kuti Lesa alecingilila abantu ku balebatitikisha, bushe abantu nga tabalemona ukuti ifyo alandile fya bufi?

Ibukisheni no kuti Satana alanda ukuti abantu babombela Lesa pa mulandu wa kuti alabapeelako fimo. (Yobo 1:9, 10; 2:4) Lesa nga alecingilila ababomfi bakwe ku kubacusha, bushe ifyo Satana alandile nga tafimoneka ukuti fya cine? Na kabili, Lesa nga alacingilila abantu bonse ku kubatitikisha, bushe nga tamoneka sana ukuti wa bufi? Lesa nga alacingilila abantu, abengi kuti bamona ukuti abantu kuti baiteka fye bwino abene ukwabula Lesa. Lelo Baibolo ilanda ukuti umuntu takwata amaka ya kuitungulula umwine. (Yeremia 10:23) Mu Bufumu bwa kwa Lesa tamwakabe ulufyengo.

Bushe ici cilepilibula ukuti Lesa tacitapo nangu fimo pa fyo abantu batitikisha abanabo? Awe. Tontonkanyeni pa fintu fibili ifyo acita: Ica kubalilapo, alilanda pa bubi bwaba mu kuba umunkalwe. Ku ca kumwenako, Icebo cakwe calilanda pali fyonse ifyo Yesebele apangiile Nabote. Baibolo na kabili yalilanda ukuti onse ucita ifya musango uyu atungululwa na kateka wa maka, uufisa ifyo aba. (Yohane 14:30; 2 Abena Korinti 11:14) Baibolo ilanda ukuti uyo umuntu, ni Satana Kaseebanya. Lesa afwaya twataluka ku bubifi e mulandu wine alandila pa bubi bwaba mu kutitikisha bambi e lyo na pa ulenga ukuti aba maka baletitikisha abanabo. Ukukanacita ifyabipa kuti kwalenga tukekale umuyayaya.

Ica bubili ca kuti, Lesa alitulaya ukuti ku ntanshi takwakabe uukalatitikisha abanankwe. Filya alandile pa batitikisha abanabo ne fyo apingwile Ahabu na Yesebele e lyo na bambi abaletitikisha abanabo filenga twashininkisha ukuti mu cine cine akapingula abantu babipa. (Amalumbo 52:1-5) Lesa alilaya ababomfi bakwe ukuti nomba line akafumyapo ububifi. * Nabote uwali ne citetekelo akatemwa ilyo ena na bana bakwe bakekala mu paradaise umuyayaya, umushakabe ulufyengo.—Amalumbo 37:34.