Yehova Lesa afwaya tuleyumfwa abantungwa ukulanda nankwe pa filetusakamika. (Luka 18:1-7) Alomfwa nga twapepa pantu alitutemwa. Apo Shifwe wa ku muulu alafwaya tulepepa kuli ena, ninshi tufwile fye ukulapepa!—Belengeni Abena Filipi 4:6.

Ipepo te kulomba fye ubwafwilisho. Lelo lilatwafwa ukupalama kuli Lesa. (Amalumbo 8:3, 4) Nga tulepepa lyonse kuli Lesa, tukaba ifibusa fyakwe ifya cine cine.—Belengeni Yakobo 4:8.

Nga tulepepa, Lesa tafwaya tulebomfya amashiwi ya kuilanga ukuti twalicindama sana nelyo ukulapepa amapepo ya kusungila. Na kabili, pa kupepa tatufwile ukucita fimo ifyaibela lelo Yehova afwaya tulepepa no mutima onse. (Mateo 6:7) Ku ca kumwenako, Hana uwaleikala mu Israele, alipepeele pa bwafya ubwali mu lupwa lwakwe. Pa numa, lintu ubwafya bwapwile, alitashishe Lesa no mweo wakwe onse.—Belengeni 1 Samwele 1:10, 12, 13, 26, 27; 2:1.

Ala twalikwata ishuko ilikalamba! Kuti twalondolwela Kabumba fyonse ifiletucusha. Na kabili kuti twamulumbanya no kumutasha pali fyonse ifyo atucitila. Kanshi tatulingile ukulekelesha ili ishuko ilikalamba ilyo twakwata.—Belengeni Amalumbo 145:14-16.