Ol Witnes blong Jehova long Bulgaria oli bisi long wok blong tijim ol narafala long trutok, long saed blong God mo Tok blong hem Baebol. Stat long yia 2000, plante handred Witnes oli lego kantri blong olgeta blong kam givhan long ol Witnes long Bulgaria. ?Wanem samting we i had taem yu muv i go long narafala kantri blong prij? ?From wanem ol hadwok blong yu i no blong nating nomo? Hemia sam tingting blong olgeta we oli muv i go long Bulgaria.

 Daren we i stap long Inglan, i talem se: “Longtaem finis i kam, mi mo Dorn i putum mak ya blong go long wan kantri we i gat moa nid. Afta we mitufala i mared, mitufala i muv i go long London blong prij long ol man we oli toktok lanwis blong Rasia. Wanwan taem, mitufala i mekem plan blong muv i go long narafala kantri, be from ol defdefren risen, mitufala i no save go. Klosap mitufala i fogetem mak ya we mitufala i putum, be wan fren i givhan long mitufala blong luksave se laef blong mitufala i jenis, mo mitufala i naf nao blong kasem mak ya.” Ale, Daren mo Dorn i stat blong lukaot wan kantri we tufala i naf blong muv i go long hem, mo i nidim moa man blong tijim ol narafala long Baebol. Long 2011, tufala i muv i go long Bulgaria.

 Eksampol blong olgeta we oli glad se oli bin muv i go long narafala kantri, i pulum samfala we fastaem oli no tingbaot blong mekem olsem. Giada we i stap long Itali wetem hasban blong hem Luka, i talem se: “Mi mitim ol Witnes we oli glad tumas blong prij long Saot Amerika mo Afrika. Glad blong olgeta mo ol gudfala ekspiriens we oli tokbaot, i tajem hat blong mi. Hemia i jenisim tingting blong mi long mak we mi wantem kasem long wok blong Jehova.”

 Long 2015, Tomas mo Veronika, wetem tufala pikinini blong tufala, Klara mo Matias, oli aot long Jek Ripablik blong go long Bulgaria. ?From wanem oli muv? Tomas i talem se: “Mifala i luk eksampol blong plante narafala, olsem sam famle blong mifala, we oli muv i go long narafala kantri, mo mifala i tingting dip long ol ekspiriens blong olgeta. Glad blong olgeta i tajem hat blong mifala, mo mifala i tokbaot samting ya long haos.” Naoia, famle ya i stap prij long niufala teritori blong olgeta, long taon blong Montana long Bulgaria.

 Linda i wan narafala Witnes we i muv i go long Bulgaria. Hem i talem se: “Plante yia bifo, mi visitim Ekwado mo mi mitim samfala we oli muv i kam long ples ya blong prij. Nao mi stat blong tingting se wan dei mi tu mi save muv i go long ples we i gat nid.” Wan kapol blong Finlan, Peteri mo Nadja, tufala tu i tingting dip long eksampol blong plante narafala. Tufala i talem se: “Long kongregesen blong mifala, sam pablisa we oli gat ekspiriens, oli muv i go long ol narafala ples blong tijim ol man long Baebol. Taem oli tokbaot ol yia ya, oli glad we oli glad. Oli talem se ol yia ya oli gud moa i bitim ol narafala yia long laef blong olgeta.”

 Olgeta we oli wantem go prij long narafala kantri, oli mas plan gud fastaem. (Luk 14:28-30) Nele blong Beljiom i talem se: “Taem mi stat blong tingting blong go long narafala kantri, mi prea mo mi lukaot ol haf long ol buk blong yumi we oli tokbaot samting ya. Mi stadi long olgeta mo mi traem luksave samting we mi mas wok long hem blong mi tu mi rere blong muv.”

 Kristian mo Irmina blong Polan, tufala i stap naen yia finis long Bulgaria. Taem tufala i stap yet long Polan, tufala i joen long wan grup we oli toktok lanwis blong Bulgaria, mo tufala i luksave se samting i halpem tufala bigwan. Grup ya i leftemap tingting blong tufala mo givhan long tufala blong lanem lanwis. Tufala i talem se: “Mitufala i luksave se i gud tumas blong putum mitufala long han blong Jehova God mo luk olsem wanem hem i givim evri samting we mitufala i nidim. Taem yumi talem long Jehova se, ‘!Mi ya! !Yu sanem mi!’ yumi save mekem plante samting we yumi neva ting se oli posibol.”—Aesea 6:8.

 Wan kapol blong Swiselan, Reto mo Konelia i wantem mekem plan mo sevem mane blong go prij long narafala kantri, ale tufala i mekem desisen blong jenisim ol samting we oli stap mekem laef blong tufala i fasfas. Tufala i eksplenem se: “Wan yia bifo we mitufala i muv, mitufala i go long Bulgaria blong wan wik blong kasem save moa long kantri ya mo laef blong ol man. Mitufala i toktok wetem ol misinari we oli givim gudfala advaes long mitufala.” Reto mo Konelia i folem ol advaes ya, mo naoia tufala i stap bitim 20 yia finis long Bulgaria.

 Olgeta we oli muv i go long narafala kantri oli mas lan long wan niufala fasin blong laef, mo maet hemia i had. (Ol Wok 16:9, 10; 1 Korin 9:19-23) I wan bigfala samting blong lanem niufala lanwis. Luka we yumi tokbaot finis, i talem se: “Mitufala i laekem blong givim ol ansa long miting we i kamaot long hat blong mitufala. !Be fastaem i had blong mitufala i rerem wan smol ansa nomo long lanwis blong Bulgaria! I olsem we mitufala i pikinini bakegen. Blong talem stret, ol pikinini long Bulgaria oli givim ansa we i moagud bitim mitufala.”

 Ravil blong Jemani, i talem se: “Taem mi lanem niufala lanwis, mi taed we. Be mi stap tingting se: ‘Yu no mas wari tumas long ol mastik blong yu. Traem laf long olgeta nomo.’ Mi luk ol samting we i had olsem tabu wok blong Jehova, mi no luk olgeta olsem ol bigfala problem.”

 Linda we yumi tokbaot finis, i se: “Mi faenem se i had blong lanem wan niufala lanwis. Lanwis blong Bulgaria i no isi, mo plante taem mi wantem givap. Taem yu no save toktok long ol man mo yu no kasem save long olgeta, yu harem se yu stap yu wan nomo. Blong gohed blong fren gud wetem Jehova, mi stadi long evri samting long lanwis blong Swiden. Sloslo, wetem help blong ol brata mo sista, mi winim problem blong lanwis.”

 Wan narafala samting we i had, se yu misim ol famle mo fren we yu lego olgeta long kantri blong yu. Eva we i muv i go long Bulgaria wetem hasban blong hem Yanis, i se: “Fastaem mi harem se mi stap mi wan nomo. Blong mekem se mitufala i no harem nogud, mitufala i toktok oltaem wetem ol fren mo famle long kantri blong mitufala, mo tu mitufala i faenem ol niufala fren long ples ya.”

 I gat sam narafala samting we oli had. Robet mo Liana blong Swiselan i tokbaot taem we tufala i muv i go long Bulgaria, i se: “I had blong mitufala i lanem lanwis mo lan long defren kalja, mo tu mitufala i mas lan long ples we i kolkol tumas.” Be tufala i holem wan gudfala tingting mo laflaf plante, nao hemia i givhan long tufala blong stap 14 yia finis long Bulgaria.

 Lili i glad tumas se hem i go prij long ples we i gat moa nid. Hem i se: “Mi save Jehova long wan spesel fasin, from we hem i givhan long mi long ol rod we mi no nidim help blong hem long kantri blong mi. Mo tu, mi bisi tumas blong halpem ol narafala, mo hemia i mekem se mi kam klosap moa long Jehova, mo i givim glad tu long mi.” Hasban blong hem, Ravil, i agri. Hem i se: “Hemia laef we i beswan, mo i wan spesel janis blong save gud ol Kristin blong ol narafala kantri, we oli gat ekspiriens long wok blong tijim ol man long trutok blong Baebol. Mi lanem plante samting long olgeta.”

 Gudfala tingting blong olgeta we oli rere blong givhan, i mekem se yumi stap ‘talemaot gud nius blong Kingdom long olgeta ples long wol.’ (Matiu 24:14) Olgeta we oli glad blong muv i go long Bulgaria blong givhan, oli luk olsem wanem Jehova i givim samting we oli wantem tumas long hat blong olgeta, mo i mekem se oli win long laef blong olgeta.—Ol Sam 20:1-4.