Danielle, wan Witnes blong Jehova we i stap long Saot Afrika, i faenem wan basket we wan man i fogetem long ples blong dring kofe. Insaed long basket ya i gat wan paos we i gat mane mo ol kredit kad. Danielle i gat strong tingting blong givimbak basket ya, ale hem i lukaot wan adres o wan fon namba be i no faenem, i faenem nem blong wan man nomo. Hem i traem blong kasem man ya tru long bang blong hem, be i no kasem. Nating se i olsem, hem i faenem risit blong wan dokta insaed long basket ya mo i gat wan fon namba long hem, ale hem i kolem namba ya. Woman we i stap ansarem ol kol i ansa mo i agri blong givim telefon namba blong man ya long Danielle.

 Man ya i sapraes blong kasem wan kol we i kam long ofis blong dokta blong hem, blong talem long hem se Danielle i faenem basket blong hem mo i wantem givimbak long hem. Taem hem i kam blong tekem basket blong hem, Danielle wetem papa blong hem tufala i talem halo long hem. Mo tufala i eksplenem from wanem tufala i traehad olsem blong faenem hem. Tufala i eksplenem se tufala i Witnes blong Jehova, mo oltaem oli traehad blong laef folem ol rul blong Baebol. Taswe tufala i wantem tumas blong tok tru oltaem.—Hibrus 13:18.

 Sam aoa biaen, man ya i sanem wan mesej long Danielle mo papa blong hem, blong talem tangkiu bakegen from we tufala i givimbak basket mo paos blong hem. Hem i raetem se: “Mi glad tumas long traehad blong yutufala blong faenem mi. Mi glad blong mitim yu mo famle blong yu mo bambae mi tingbaot yu from we yu kaen mo yu frengud wetem ol narafala. Blong soemaot tangkiu blong mi, mi wantem givim wan donesen long yu. Mi save se yufala i stap mekem ol sakrefaes blong ona long God blong yufala. Ol aksen blong yufala oli soemaot fasin blong yufala, olsem we yumi luk long fasin blong Danielle blong tok tru mo blong holemstrong ol gudfala fasin. So bakegen, tangkiu mo i gud God i blesem wok blong yufala.”

 Sam manis biaen, papa blong Danielle i mitim man ya bakegen, nao man ya i talemaot samting we i jes hapen long hem, hem i bin faenem wan paos we i lus. Hem i stap pem ol samting long stoa, taem hem i faenem wan paos long graon. Mo taem hem i faenem woman we paos ya i blong hem mo i givimbak paos ya, hem i eksplenem se hem i wantem givimbak paos ya from we i no longtaem i pas, hem tu i bin fesem sem samting olsem, nao wan man we i tok tru i givimbak paos blong hem. Hem i talem se: “Wan smol aksen blong tok tru mo kaen long narafala i save mekem sam narafala samting, i mekem laef blong evriwan long komuniti i kam gud moa.”