Websaet ya jw.org i givhan long ol man long evri ples long wol. Yu save luk toktok we sam man oli sanem i go long hedkwota blong ol Witnes blong Jehova long Mei 2014.

“Smol pikinini blong mi we i stap long kindi, i kambak oltaem wetem ol pensel, ol smol pleplei, no sanglas blong ol fren blong hem. Mifala i traem blong givhan long hem plante taem blong i kasem save se hemia stil ya, mo se stil i nogud. Be hem i no stop, ale mifala i go long jw.org mo daonlodem video ya Yu No Mas Stil. Video ya i gat bigfala paoa mo i stret gud long boe blong mi. Afta we hem i wajem video ya, hem i kasem save se God i no laekem fasin blong stil, nao hem i talem se bambae hem i givimbak olgeta samting ya. !Websaet ya i givhan bigwan long mifala!”​—D. N., Afrika.

“Ol pikinini blong mi oli laekem websaet ya. Oli daonlodem ol sot video blong Kaleb. Hemia i halpem olgeta blong oli folem ol rul we Baebol i talem long saed blong giaman mo stil. Mo tu, oli lanem sam gudfala fasin we oli save folem long laef blong olgeta, mo hemia i mekem se oli kam ol gudfala man.”​—O. W., Wes Indis.

“Mi mi wantem lego skul from we i had tumas. Be wan dei, mi ridim wan haf we i talem se, ‘?I Gud Blong Mi Lego Skul No Nogat?’ long websaet ya jw.org. Haf ya i givhan long mi blong mi gat gudfala tingting long saed blong skul. Mi lanem long haf ya se skul bambae i trenem mi long ol samting we bambae mi fesem long fiuja mo i givhan long mi tu blong mi kam wan man we i naf blong holem wan wok.”​—N. F., Afrika.

“Advaes blong ol yangfala long websaet ya i givhan long mi blong gat gudfala fasin long skul. Mi lanem blong stadigud mo blokem ol samting we i save pulum tingting blong mi.”​—G., Afrika.

“Wan fren long wok i talem long mi se gel blong hem i harem nogud from we wan gel long skul i stap spolem hem. Hemia i mekem se gel blong hem i fraet nao i no moa go long skul. Ale mi tokbaot long hem katun we oli droem, hemia Yu Save Winim Wan Stronghed, we i stap long jw.org. Hem i laekem advaes long katun ya we i talem se yu save mekem sam fani samting blong man i glad long yu. Hem i toktok wetem gel blong hem blong i save olsem wanem blong blokem gel ya we i stap spolem hem. Naoia, hem i harem gud moa taem hem i go long skul. Biaen, sloslo gel ya i no moa spolem hem be i kaen.”​—V. K., Is Yurop.

“Tangkiu from haf ya long websaet we i talem se ‘?From Wanem Mi Katkatem Mi Olsem?’ Hemia wan problem we mi fesem longtaem. Mi mi ting se mi wan nomo mi gat fasin ya mo mi ting se sipos mi talem long ol narafala, bambae oli no kasem save. Be stori blong samfala long haf ya i givhan bigwan long mi. !Mi glad se wan i kasem save!”​—Wan yangfala woman Ostrelia.

“Websaet ya jw.org i mekem i isi long mi blong kasem help blong winim sam samting we i stap spolem ol yangfala. Wan haf long websaet ya i givhan long mi blong luksave ol defdefren samting we narafala i save mekem blong pulum filing blong mi long saed blong seks, mo i givhan long mi blong luk sipos samting ya i hapen long mi finis, mo i givhan long mi blong mi save wanem blong mekem.”​—T. W., Wes Indis.

“Boe blong mi i no save stap kwaet, hem i muvmuv oltaem. Taswe mi no moa save wanem blong mekem. Mo samting ya i mekem se i had blong mi storiangud wetem hem. Nao wan dei, mi go long jw.org long haf blong olgeta we oli mared mo ol papa mo mama. Ale mi faenem plante gudfala haf we oli stret long samting we mi fesem, mo oli soemaot sam samting we mi save mekem blong storiangud wetem boe blong mi. Websaet ya i givhan long hem tu. Naoia hem i save talemaot long mi ol wari blong hem mo ol samting we oli mekem hem i glad.”​—C. B., Afrika.

“Websaet ya jw.org i soemaot wan fani samting we mifala ol papa mo mama, i save yusum blong tijim ol pikinini blong mifala. Eksampol, katun we oli droem we i tokbaot olsem wanem blong faenem wan tru fren, i givhan long ol pikinini blong mifala, blong oli gat stret tingting long saed blong ol fren, mo blong jusumgud ol fren we i save pulum olgeta blong gat ol gudfala fasin. Plante taem, wan haf bambae i kamaot long jw.org long stret taem, blong givhan long mifala blong winim ol problem we ol pikinini blong mifala oli fesem. Websaet ya i rij long ol gudfala advaes.”​—E. L., Yurop.

“Mi mo woman blong mi, mitufala i mared blong sikis yia finis. Be olsem ol narafala mared man, mitufala i fesem plante problem from we mitufala i gruap long defdefren famle, tingting blong mitufala i no sem mak, mo mitufala i no gat sem tingting long fasin blong storian. Be haf ya ‘?Olsem Wanem Blong Lesingud Long Hem?’ long jw.org, i pulum tingting blong mi. Hem i tokbaot sam gudfala advaes long fasin blong lesingud. Mi ridim haf ya mo mi tokbaot long woman blong mi. Ale, mitufala i traehad blong folem ol gudfala advaes ya.”​—B. B., Wes Indis.

“Wan yia i pas finis we mi stap joen wetem ol Witnes blong Jehova, mo mi wantem talem tangkiu tumas from websaet ya jw.org. Websaet ya i tijim mi long plante samting, i tijim mi blong mi kontrolem kros blong mi, mo blong kam wan gudfala hasban mo papa. Mi mas talem tru se websaet ya i sevem mared blong mi.”​—L. G., Wes Indis.

“Websaet ya jw.org i mekem mi harem se mi laef bakegen. Ol video long Amerikan Saen Lanwis, i mekem se mi kamgud moa long saen lanwis. Plante taem mi harem olsem se mi no save putum ol gudfala mak long laef blong mi, be taem mi wajem video ya Mi Luk Tok Blong God Long Lanwis Blong Mi, hemia i mekem mi harem gud, mo i mekem mi gat strong tingting blong tingbaot ol gudfala samting long laef.”​—J. N., Afrika.

“Websaet ya i olsem wan sas ston. Mi mi wan volontia we i stap givhan long ol man we sora blong olgeta i fas, speseli ol yangfala. Ol defdefren buk long saen lanwis oli halpem mi blong kamgud moa long saen lanwis. Websaet ya i halpem mi tu blong mi givhan long olgeta we oli wantem se famle blong olgeta i kamgud moa mo oli frengud moa.”​—K. J., Wes Indis.

“Mi mi blaen, be jw.org i givhan long mi. Hem i givim sam save long mi we i tekem plante manis blong mi kasem tru long post ofis. Hem i mekem se famle blong mi kamgud moa, mo i mekem mi mi kam wan gudfala man long komuniti. Mo mi kasem ol save ya semtaem olsem ol fren blong mi we oli save lukluk.”​—C. A., Saot Amerika.

“Websaet ya jw.org i wan sas presen long olgeta we oli no save ridim lanwis Brel, mo oli no gat naf mane blong pem wan buk long lanwis ya. Ol rikoding long websaet ya oli givhan long man we i blaen, blong i save ol niufala save we oli stap kamaot. Websaet ya i blong givhan long enikaen man, long eniples long wol. Tru long websaet ya, mifala ol blaenman i harem se mifala i sem mak long ol narafala, mo se ol narafala oli tinghae long mifala.”​—R. D., Afrika.

“Websaet blong yufala i defren long websaet blong ol narafala jos, from we hem i no fulap wetem ol toktok mo ol wod we ol pris nomo oli naf blong kasem save long hem. Mo i no gat tumas save long hem we i mekem hed blong man i fasfas. Websaet blong yufala i isi nomo mo i tok stret. I no gat tumas toktok long hem mo i no fulap wetem save blong man. Hem i mekem ol man oli luk se bilif i no wan samting we i had. Be hem i soemaot se evri man oli save gat bilif ya.”​—A. G., Esia.

“!Laef blong mi bambae i nogud olgeta sipos i nogat jw.org! Long wol ya we i tudak, websaet ya i olsem wan laet we mi save onem. Kwiktaem nomo mi save luk mo harem ol haf we oli eksplenem tingting blong God, mo kasem ansa blong plante kwestin blong laef.”​—J. C., Wes Indis.

“Mi mi stap long medel bus long Saot Amerika, be mi glad tumas long ol gudfala save blong God we mi mi kasem. Sipos i no gat websaet ya, bambae mi lus.”​—M. F., Saot Amerika.