Long medel bus blong Amason, i gat wan bigfala niufala Haos Asembli blong ol Witnes blong Jehova. Graon ya we Haos Asembli i stap long hem, bigwan blong hem i 52 ekta, mo hem i stap long not blong taon ya Manaus long Brasil. Bigfala bus i kavremap bighaf blong graon ya. Ol naesfala pijin, olsem macaw mo toucan, oli stap singsingaot antap long ol tri ya cupuaçu mo angelim pedra. ?From wanem oli bildim Haos Asembli long ples ya?

I gat klosap tu milian man i stap long taon blong Manaus we i stap 1,450 kilometa longwe long maot blong Amason Reva. Niufala Haos Asembli ya i save karem 7,000 Witnes we oli kam long Manaus mo ol narafala taon klosap, wetem ol smosmol velej long saed blong reva ya Amason mo long ol smosmol han blong hem. Taon we i longwe moa hemia São Gabriel da Cachoeira. Hem i stap bitim 800 kilometa long wes blong Manaus. !Blong kam long wan asembli, sam Witnes oli mas travel long bot blong tri dei!

I wan bigfala wok blong bildim Haos Asembli ya long medel bus blong Amason. Oli mas sanem 13 kontena long sip, we i fulap long ol tul blong wokem haos. Sip i mas aot long wof blong Santos long São Paulo, mo i folem Brasil gogo kasem maot blong Amason Reva, ale i folem reva ya go kasem ples we bambae oli bildim Haos Asembli ya long hem.

Hemia i namba 27 Haos Asembli we oli bildim long Brasil, mo i gat 1,956 man oli kam long taem blong dedikesen long Sande 4 Mei 2014. Plante man oli glad tumas from we hemia fas taem blong olgeta blong joen long miting long wan Haos Asembli.

Ol man oli save harem tok blong brata, mo oli save luk hem tu. Hemia wan jenis we oli glad tumas long hem, from we bifo, oli stap mekem ol asembli long ol pablik ples, be plante oli no save luk platfom, mo oli no save luk brata we i mekem tok. Wan Witnes i talem se: “Mi mi joen long ol asembli blong plante yia finis, be mi no naf blong luk ol drama, mi lesin long olgeta nomo.” Naoia evriwan oli save luk platfom.