Long Sarede 9 Maj 2013, long senta blong edukesen blong ol Witnes blong Jehova long Patterson, New York, i gat graduesen blong namba 134 klas blong Wajtaoa Baebol Skul Blong Gilead. Skul ya i stap trenem ol Witnes blong Jehova long minista wok blong olgeta. I gat ol fren, famle, mo sam narafala we oli joenem ol studen long graduesen ya, olgeta evriwan oli 9,912.

Mark Sanderson, we i wan memba blong Hed Kampani blong ol Witnes blong Jehova, hem i jeaman blong miting ya. Hem i mekem ol man oli tingbaot stat blong skul blong Gilead 70 yia bifo, hemia long 1 Februari 1943. Long taem ya, presiden blong skul ya, Nathan Knorr, i tokbaot risen blong hem, i se: “Sipos i gat plante moa man blong wok, yumi save talemaot [gud nius blong Kingdom blong God] long plante plante handred taosen man. Sipos Masta i wantem, bambae i gat plante moa man blong wok.” ?Olsem wanem? ?Toktok blong Brata Knorr i kamtru?

Tingbaot wan eksampol. Smoltaem afta we skul ya i stat, Brata Knorr i visitim Meksiko blong faenem sam ples we oli save sanem ol misinari long olgeta. Long visit ya, oli singaot ol kongregesen blong Mexico City mo ol kongregesen raonabaot go kasem 240 kilometa afsaed blong taon, blong oli joen long wan miting, mo i gat 400 man long miting ya. Naoia, klosap 70 yia afta we ol faswan misinari blong Gilead oli kasem Meksiko, sipos i gat wan miting long semfala eria, !bambae i gat bitim 200,000 man long hem!

“?Wanem i Stap Long Han Blong Yu?” Tok blong Anthony Griffin, wan memba blong Yunaeted Stet Branj Komiti, i stanap long Eksodas 4:2. Long stori ya, God i askem long Moses se: “?Wanem ya i stap long han blong yu?” Moses i ansa se: “Wan stik ya.” Jehova i yusum stik ya olsem wan saen blong paoa mo wok we hem i givim long Moses. (Eksodas 4:5) Wok blong Moses i go gud taem hem i yusum paoa ya blong leftemap nem blong God. Be God i no glad taem hem i yusum paoa ya blong leftemap hem wan mo tok nogud long ol brata blong hem, olsem we hem i mekem long “Meriba.”—Namba 20:9-13.

Brata Griffin i talem se stik ya blong Moses i olsem trening we ol studen long Gilead oli kasem, mo se oli no mas yusum trening ya blong bos long ol narafala. Hem i givim advaes ya se: “Yusum trening we yu kasem blong presem Jehova mo givim ona long hem. Sipos yu mekem olsem, bambae yu yu wan blesing long olgeta we yu wok wetem olgeta.”

“No Fogetem Mana Ya.” Stephen Lett blong Hed Kampani, i tokbaot fo lesen we yumi lanem from mana ya we God i givim long ol man Isrel long draeples.

• Gohed blong wok had. (Namba 11:8) Blong kasem paoa from mana ya, ol man Isrel oli mas wok kwik blong pikimap kakae ya mo rerem.—Eksodas 16:21.

• Yumi neva mas toktok smol agensem ol samting we Jehova i givim long yumi. (Namba 11:5, 6) Ol man Isrel oli komplen from mana ya, be Jehova i luk se ol toktok ya i agensem hem stret. Olsem mana ya, i no oltaem we kakae blong spirit we yumi kasem i niu mo i stret long tes blong yumi, be oltaem i givim paoa. Yumi mas glad long evri samting we Jehova i givim.

• Trastem Jehova fulwan se hem i sua blong givim samting we yu nidim. Hem i no mestem blong givim mana evri dei long ol man Isrel, mo i dabolem long dei bifo long Sabat. (Eksodas 16:22-26) Long sem fasin, yumi save trastem God se bambae hem i givim samting we yumi nidim.—Matiu 6:11.

• Sipos yumi no obei long God, bambae yumi no kasem blesing blong hem. (Eksodas 16:19, 20, 25-28) Sipos ol man Isrel oli lukaot mana long Sabat dei, bambae oli no faenem, mo Jehova i no glad long olgeta. Mo tu, sipos oli kipim ol mana we oli pikimap, long nekis dei bambae i sting mo i gat ol maget long hem.

Brata Lett i talem long ol studen blong oli no fogetem ol lesen we oli lanem from mana ya. Olsem nao, Jehova bambae i ‘openem ol get blong heven mo kafsaedem blesing i kam long olgeta gogo oli no moa sot long wan samting.’—Malakae 3:10.

“Rere From Laef Long Niufala Wol.” William Samuelson we i lukaot long Tiokratik Skul Dipatmen, i eksplenem se i tru we yumi evriwan i wantem stap long niufala wol mo yumi stap wet long samting ya, ?be yumi rili rere? Blong rere, yumi “mas gat stret tingting.”—1 Pita 4:7.

Tingting we yumi gat long ol slak fasin mo mastik blong yumi, i soemaot sipos yumi gat stret tingting. Yumi no mas blemem Setan mo wol ya we hem i kontrolem, from ol slak fasin blong yumi. Maet yumi ting se long niufala wol, taem God i tekemaot Setan mo rabis wol ya, bambae yumi stretem ol slak fasin ya. Be yumi mas faet agensem ol slak fasin naoia, olsem fasin blong tingbaot yumi wan nomo. Blong faet agensem ol fasin ya, yumi mas wok had blong “werem niufala fasin.”—Efesas 4:24.

“Putumdaon Pen Blong Yu.” Mark Noumair, wan tija long Gilead, i yusum pijatok blong wan pen blong soemaot “tingting blong wantem raetem prapa stori blong yumi long laef.” Yumi ‘putumdaon pen blong yumi’ taem yumi letem Jehova i raetem stori ya.

Samting we King Sol i mekem, i givim woning long yumi. Taem hem i kam king, hem i gat tingting daon, i no tinghae long hem wan, mo i luksave samting we hem i no naf blong mekem. (1 Samuel 10:22, 27; 11:13) Be i no longtaem, hem i stat blong ‘raetem prapa stori blong hem,’ taem hem i mekem samting we hem i ting se i stret mo i leftemap hem wan. God i sakemaot hem from we i no moa obei.—1 Samuel 14:24; 15:10, 11.

Ol studen oli obei long God kam kasem naoia, be Brata Noumair i mekem olgeta oli tingbaot se oli mas gohed blong mekem wok blong God long fasin we God i wantem. Hem i givim advaes ya: “Yumi no mas ting se from we God i stap yusum yumi, hemia i min se hem i glad long yumi.” Tingbaot Moses, we hem i no folem rod we God i talem long hem, taem hem i mekem merikel blong kilim ston nao wota i ronaot long hem. Hem i mekem merikel ya, be Jehova i no glad long hem.—Namba 20:7-12.

“Singaot Bigwan Olsem Enjel We i Stap Flae Antap Long Skae.” Sam Roberson, wan tija blong Gilead, i mekem tok blong hem i stanap long Revelesen 14:6, 7. Biaen, hem i askem long ol studen blong oli aktem sam samting we i hapen long wok blong talemaot Kingdom. Wan studen we i stap slip long hospital from dokta i katem hem, i prij long wan nes we i kam long Peru. Blong statem wan storian wetem nes ya, hem i soem wan pija long jw.org, long saed blong wok blong prij long Chachapoyas, Peru. Biaen, nes ya mo hasban blong hem i stadi Baebol wetem ol Witnes.

“Yu Yu Trikim Gud Mi, Mo Mi Foldaon Gud Long Trik Blong Yu.” (Jeremaea 20:7) Allen Shuster, wan memba blong Yunaeted Stet Branj Komiti, i askem sam kwestin long tu kapol long klas. Olgeta ya oli harem se Jehova i “trikim” olgeta. ?From wanem? From we fastaem oli fraet se skul blong Gilead bambae i had tumas, mo oli no naf blong mekem. Be taem skul i stat, oli sapraes long bigfala help we oli kasem, mekem se oli naf blong finisim kos ya. Sista Marianne Aronsson i talem tangkiu from trening we hem i kasem long Gilead, i se: “Neva bae mi gat problem ya we mi no save wanem blong stadi long hem. Naoia mi luksave se evri vas blong Baebol i fulap long ol sas samting.”

“Folem Bilif Blong Olgeta.” David Splane we i wan memba blong Hed Kampani, i givim bigfala tok long miting ya. Tok ya i stanap long Hibru 13:7, we i talem se: “Yufala i mas tingbaot ol man ya we oli stap lidim yufala, olgeta ya oli stap talemaot tok blong God long yufala. Yufala i mas luklukgud se fasin blong olgeta i karem wanem frut, blong yufala tu i folem bilif blong olgeta.” Olgeta we oli “lidim” wok blong ol Witnes blong Jehova 70 yia bifo, ?oli soemaot bilif olsem wanem?

Long 24 Septemba 1942, Nathan Knorr i askem ol daerekta blong Watch Tower Bible and Tract Society of New York mo Watch Tower Bible and Tract Society of Pennsylvania blong joen wanples blong tokbaot wan niufala skul, hemia Gilead. Skul ya i blong trenem ol misinari blong oli go long ol ples we ol man oli no harem gud nius yet. I luk olsem se i no wan gudfala taem blong statem skul ya, from we Wol Wo Tu i stap gohed yet. Hemia i mekem se i had o maet i no posibol blong sanem ol misinari i go long plante kantri. Mo tu, long ol yia 1930 fulwol i kasem trabol long saed blong mane, mo oganaesesen blong Jehova i gat naf mane nomo blong ranem skul ya blong faef yia. Nating se i olsem, ol brata long miting ya oli soemaot bigfala bilif, mo oli agri se skul ya i mas gohed.

Ol studen long ol faswan klas blong Gilead, olgeta tu oli soemaot bilif we i stret blong yumi folem. Oli glad long smol samting we oli gat mo oli no laekem mane tumas. (Hibru 13:5, 6) Plante oli ting se maet oli no moa luk ol famle blong olgeta bakegen, from we ol famle oli no gat naf mane blong pem rod blong ol misinari oli kamhom. Plante misinari oli jes luk famle blong olgeta 10 o 15 yia afta we oli go long narafala kantri. Nating se i olsem, oli bilif strong se Jisas bambae i gohed blong lukaot long olgeta mo long famle blong olgeta, olsem we hem i mekem finis.—Hibru 13:8.

Brata Splane i tokbaot samfala we oli go long ol had ples afta we oli finisim skul blong Gilead, i se: “Ol yangfala man mo woman, yufala i stap ademap nem blong yufala long laen blong ol man mo woman we oli mekem Skul Blong Gilead, long ol 70 yia we i pas. . . . Stap glad blong mekem wok blong Jehova long eniples we hem i wantem.”

Brata Splane i finisim tok blong hem wetem wan video blong ol pija blong 77 studen blong Gilead we oli wok naoia long branj ofis long Yunaeted Stet. Tu long olgeta oli bin tren long fas klas blong Gilead long 1943. Long semtaem we oli luk ol pija ya, oli lesin long ol singsing we ol Witnes blong Jehova oli yusum long wosip blong olgeta long 70 yia we i pas.

Afta we ol studen oli kasem setifiket blong olgeta, wan studen i ridimaot wan leta long bihaf blong klas ya blong talem tangkiu. Brata Sanderson i finisim miting ya. Hem i talem se ol tok we Brata Knorr i talem long fas klas blong Gilead i gat bigfala mining yet, nating se 70 yia i pas. Brata Knorr i bin talem se: “Nomata weples oli sanem yu, yu no mas fogetem se yu yu . . . wan man blong talemaot Kingdom. I no gat wan blesing we i bigwan moa i bitim we yu mekem wok ya blong presem Jehova olsem, jes bifo long Amagedon. . . . Long taem ya we yu gat nambawan janis ya blong prij, gohed blong prij.”