“I olsem se Jehova i luksave wanem i stap long hat blong ol papa mo mama.” Hemia samting we wan papa long Malesia i talem long saed blong video ia Kam Fren Blong Jehova.

Taem faswan video i kamaot, ol Witnes blong Jehova oli wokem sam narafala video bakegen we i soem Caleb mo famle blong hem. Ol video ia, oli stap long jw.org, mo oli tijim ol pikinini blong gat ol gudfala fasin mo kasemsave ol tijing blong Baebol olsem fasin ya blong no stil, mo olsem wanem oli save prea long God.

Faswan haf blong video ya oli tanem i go long 131 lanwis, mo i givhan long plante pikinini raon long wol.

Wan mama we i gat faef pikinini i raetem se: “Taem mifala i kasem DVD ia “Listen, Obey, and Be Blessed” long wik we i pas, mifala i wajem klosap 50 taem.”

Millie, wan smol gel long Inglan we i gat 12 yia, i gat wan brata blong 15 yia we i handicap, nem blong hem Thomas. Millie i raetem se: “Thomas i gat ol video blong Caleb long ipad blong hem, mekem se hem i save soem long ol fren blong hem long skul. Hem i laekem ol singsing mo i stap singim olgeta long wan fasin we i nambawan, nao i mekem wan sista i krae. I gud tumas blong luk samting ya.”

Ava, we i talem se hem i gat 8 yia, 9 manis, mo 25 dei, i raetem se: “Caleb mo sista blong hem i gat gudfala fasin blong tijim ol pikinini.”

Mikayla i raetem se: “Mi gat siks yia. Tangkiu long DVD blong Listen, Obey, and Be Blessed. Hemia i tijim mi blong lesen long papa mo mama from hemia i mekem Jehova i glad.”

Wan yangfala we i stap wokem ol katun, mo i no wan Witnes blong Jehova, i wajem video ia I Nogud Blong Stil. Hem i sapraes bigwan, taem hem i faenemaot se wan smol tim nomo i wokem video ia.Hem i talem se: “Mi save ol man we oli wok long ol bigfala kampani mo ol smol kampani blong wokem ol katun, samtaem mi stap tingbaot se bambae i olsem wanem blong wok long wan ples olsem. Be long en blong dei, samting we oli traehad blong wokem i blong mekem man i laf blong smoltaem, hemia nomo. Be ol video we yufala i wokem, i jenisim laef blong ol pikinini, i tijim olgeta blong luksave samting we i gud mo samting we i nogud, mo i givhan long olgeta blong mekem ol gudfala desisen. Ol wok blong yufala i no blong nating nomo, be i givhan long man.”

Ol papa mo mama long fulwol oli agri long samting we hem i talem. Wan mama i raet se: “Boe blong mi we i gat tri yia, Quinn, i stap wajem video ia Gaining Jehovah’s Friendship. Long medel blong singsing, hem i lukluk mi, i putum han blong hem long jes blong hem, mo i se: ‘Mama, video ia i tajem hat blong mi.’”