God i yusum Tabu Baebol blong toktok long yumi evriwan. Yumi mas stadi long Baebol blong save Hem. (Jon 17:3; 2 Timoti 3:16) Insaed long Baebol, Jehova God i talemaot stamba tingting blong hem long saed blong ol man mo wol ya we i hom blong olgeta.—Jenesis 3:15; Revelesen 21:3, 4.

I no gat wan narafala buk olsem Baebol, we i gat bigfala paoa long laef blong ol man. Baebol i pulum yumi blong wokem ol fasin blong Jehova olsem lav, sore, mo kaen fasin. Hem i givim hop, yes i halpem ol man blong oli stanap strong taem oli kasem trabol mo tu taem oli safa bigwan. Mo hem i stap soemaot ol samting blong wol ya we oli no laenap wetem wil blong God we i stret gud.—Ol Sam 119:105; Hibru 4:12; 1 Jon 2:15-17.

Oli raetem Baebol fastaem long lanwis Hibru, Arameik, mo Grik, mo oli transletem fulwan o haf i go long bitim 3,000 lanwis. Baebol i wan buk we oli transletem i go long plante moa lanwis mo oli givimaot plante moa i bitim eni narafala buk long wol. Yumi sua se i mas olsem, from profet tok ya blong Baebol we i se: “Ol man bambae oli talemaot gud nius ya blong Kingdom [hemia stamba mesej insaed long Baebol] long olgeta ples long wol, blong oli witnes long olgeta nesen, nao biaen en bambae i kam.”—Matiu 24:14.

Mifala i luksave se mesej blong Baebol i impoten tumas, taswe mifala i wok had blong wokem wan Baebol we i folemgud ol olfala hanraet, be i klia mo i isi tu blong ridim. Ol haf ya long Apendiks, “Ol Rul Blong Transletem Baebol,” “Ol Samting Insaed Long Baebol Ya,” mo “Olsem Wanem Baebol i Kam Kasem Yumi,” oli tokbaot sam rod blong translesen we mifala i folem, mo ol samting long Baebol ya.

Olgeta we oli lavem Jehova God mo oli wosipim hem, oli wantem tumas wan translesen blong Tok blong God we i stret mo we oli kasemsave long hem. (1 Timoti 2:4) From samting ya, mifala i wokem Baebol ya long Bislama, wetem mak ya blong wokem Niu Wol Translesen i go long plante moa lanwis. Mifala i hop mo prea se taem yu ridim Baebol ya, bambae i givhan bigwan long yu taem yu stap traehad blong ‘lukaot God mo faenem hem.’—Ol Wok 17:27.