Ol Sam 17:1-15
Prea blong Deved.
17 O Jehova, plis yu harem mi taem mi krae from jastis.
Yu lesin gud taem mi stap krae from help.
Yu lesin long prea blong mi from we mi no giaman.+
2 I gud yu mekem wan stret desisen long bihaf blong mi.+
I gud ae blong yu i luk samting we i stret.
3 Yu yu jekemgud hat blong mi finis, mo long naet yu stadi gud long mi.+
Yu mekem mi mi klin finis.+
Bambae yu faenemaot se mi mi no bin plan blong mekem wan rabis samting,Mo maot blong mi i no mekem sin.
4 Nomata wanem samting we ol man oli mekem,Mi mi folem ol tok we i kamaot long maot blong yu, blong mi no go long ol rod blong ol stilman.+
5 I gud ol step blong mi oli folem gud ol trak blong leg blong yuOlsem nao, bambae leg blong mi i no stambol.+
6 O God, mi mi singaot i kam long yu, from we bambae yu ansa long mi.+
Yu pusum sora blong yu i kam* long mi. Yu harem ol toktok blong mi.+
7 Plis yu soemaot fasin blong yu blong lavem man oltaem, long wan nambawan rod,+Yu yu Sevia blong olgeta we oli stap ronwe long ol man we oli rebel agensem yu,Blong oli kam haed long raethan blong yu.
8 Yu blokem gud mi, olsem we yu stap blokem pi blong ae blong yu,+Yu haedem mi long sado blong ol wing blong yu.+
9 Yu blokem gud mi long ol nogud man ya we oli stap atakem mi,Mo long ol enemi blong mi we oli man nomo,* we oli stap raon long mi.+
10 Oli no moa filim save samting,*Long maot blong olgeta oli stap tok flas.
11 Naoia oli raonem gud mifala,+Oli stap lukaot janis blong mekem mifala i foldaon.*
12 Hem i olsem wan laeon we i wantem tumas blong terterem kakae blong hem long smosmol pis,Olsem wan yang laeon we i stap haed blong kasem kakae blong hem.
13 O Jehova, yu girap, yu tok long hem,+ mo yu putum hem daon.
Yu yusum naef blong faet blong yu, yu tekemaot mi* long han blong ol man nogud.
14 O Jehova, yu yusum han blong yu, yu tekemaot mi,Long ol man blong wol ya,* we oli intres nomo long ol samting blong laef ya,+Hemia olgeta ya we yu givim ol gudgudfala samting long olgeta,+Mo we oli livim sam samting i stap blong givim long ol boe blong olgeta we oli plante we plante.
15 Be mi, bambae mi luk fes blong yu from stret fasin,Mi mi harem gud tumas se mi wekap we yu yu stap.*+
Ol futnot
^ NT: “Yu bendaon, yu lesin.”
^ NT: “ol enemi blong mi we oli stap agensem sol blong mi.”
^ NT: “Bodi blong olgeta i fulap long gris.”
^ NT: “sakem mifala i godaon long graon.”
^ NT: “sol blong mi.”
^ NT: “mi wekap we mi luk yu.”
