1-3. ?Wanem kwestin we ol man oli askem long saed blong ded, mo wanem ansa we plante skul oli givim?

LONG ol taosen yia we oli pas, ol man oli tingbaot ol kwestin ya. Nomata yumi wanem kaen man mo nomata yumi laef wea, yumi evriwan i nidim blong save ansa blong ol kwestin ya.

² Long Japta 5 yumi tokbaot olsem wanem ransom sakrefaes blong Jisas Kraes i openem rod blong yumi kasem laef we i no save finis. Mo tu, yumi lanem se Baebol i tokbaot wan taem we “bambae i no moa gat man i ded.” (Revelesen 21:4) Be naoia ol man oli stap ded yet. Yes, waes King Solomon i talem se: “Ol man we oli laef yet oli save se bambae oli ded.” (Prija 9:5) Yumi traem ol defdefren kaen rod blong mekem se yumi laef longtaem moa. Nating se i olsem, yumi wantem save wanem bambae i hapen long yumi taem yumi ded.

³ Taem ol fren mo famle blong yumi oli ded, yumi krae. Mo maet yumi askem se: ‘?Olgeta oli stap wea? ?Oli stap safa? ?Oli stap lukaot long yumi? ?Yumi save halpem olgeta? ?Bambae yumi luk olgeta bakegen samtaem?’ Ol skul raon long wol oli givim plante defdefren ansa long ol kwestin ya. Sam skul oli tijim se sipos yu wan gudfala man, bambae yu go long heven, be sipos yu wan rabis man, bambae yu go bon long faea we i no save ded samtaem. Sam narafala skul oli tijim se taem man i ded, devel blong hem i go stap wetem ol bubu blong hem we oli ded finis, long hom blong ol dedman. Sam narafala skul bakegen oli tijim se ol dedman oli go long ples blong ol spirit aninit long graon, oli kasem jajmen,  nao biaen oli tekem bodi blong wan narafala man no wan anamol mo oli laef bakegen long wol ya.

4. ?Wanem tingting we plante skul oli gat long saed blong ded?

⁴ Olgeta tijing ya blong ol defdefren skul oli stanap long semfala tingting nomo. Tingting ya se: Afta we bodi blong man i ded, wan samting i aot long bodi ya mo i go samples. Klosap evri skul, bifo mo tede tu, oli tijim se afta we man i ded, hem i go laef samples mo hem i naf yet blong lukluk samting, harem samting, mo tingbaot samting. ?Be hemia i tru? Bren blong yumi nao i mekem we yumi naf blong lukluk, harem mo tingting. !Be, taem yumi ded, bren blong yumi i no moa wok! Sipos bren i ded, i minim se yumi no moa gat ol memori, ol filing, mo yumi no save tingting tu. ?Olsem wanem yumi save gohed blong laef samples sipos olgeta samting ya oli ded? Samting olsem i no save hapen.

5, 6. ?Baebol i tijim wanem long saed blong ol dedman?

⁵ Samting we i hapen taem man i ded i no wan tokhaed blong Jehova, God ya we i wokem bren. Hem i save trutok, mo long Baebol, hem i talemaot se ol dedman oli olsem wanem. Tijing we Baebol i givim, i klia nomo, hemia se: Taem man i ded, hem i no moa stap. Ded hem i defren long laef. Ol dedman oli no save lukluk samting, harem samting, mo oli no tingting tu. I no gat wan haf blong bodi blong yumi we i laef i stap samples afta we bodi i ded. I no gat wan sol no wan spirit i stap insaed long yumi. *

⁶ Solomon i talem se man we i laef i save se bambae hem i ded, nao biaen hem i raetem se: “Be ol man we oli ded finis oli no moa save wan samting.” Ale, hem i mekem trutok ya i klia moa taem hem i talem se fasin blong laekem samting no blong no laekem nating wan samting, i lus taem man i ded. Mo hem i se “i no gat wok, mo tingting, mo save, mo waes” long beregraon. (Prija 9:​5, 6, 10) Long sem fasin, Ol Sam 146:4 (NW ) i talem se taem man i ded “ol tingting blong hem oli finis.” Yumi sinman, yumi blong ded nomo, mo yumi no laef afta we bodi  blong yumi i ded. Laef blong yumi i olsem faea we i laet long wan kandel. Taem yu kilim kandel ya, faea ya i no go samples. Hem i lus nomo, i no moa stap.

7. ?Jisas i talem se ded i olsem wanem?

⁷ Jisas Kraes i tokbaot wanem i hapen taem man i ded. Taem Lasaros, wan gudfala fren blong hem, i ded, hem i talem long ol disaepol blong hem se: “Gudfala fren ya blong yumi Lasaros hem i stap slip.” Ol disaepol oli ting se Lasaros i stap ledaon long bed mo i stap spel from we hem i sik. Be Jisas i no minim olsem. Hem i eksplenem se: “Lasaros i ded finis.” (Jon 11:​11-14) Makem we long ples ya Jisas i talem se ded i sem mak long slip. Lasaros i no stap long heven no long helfaea. Hem i no stap wetem ol enjel, mo hem i no go long hom blong ol dedman blong mitim ol bubu blong hem we oli ded finis. Lasaros i no bon bakegen long wol ya long bodi blong wan narafala man. Nogat. Hem i stap spel nomo long ded, olsem man we i slip ded, be wan samting nomo se, hem i no save drim. I gat sam narafala vas we oli yusum tok ya slip blong talem man we i ded. Eksampol, taem ol man oli stonem disaepol ya Steven i ded, Baebol i talem se hem i “foldaon nao i slip.” (Ol Wok 7:​60, King James Version) Mo taem aposol Pol i tokbaot sam man long taem blong hem se oli ded, hem i raetem se ol man ya oli “slip.”​—1 Korin 15:​6, NW.

8. ?Olsem wanem yumi save se God i no wokem ol man blong oli ded?

⁸ ?Olsem wanem? ?Taem God i wokem man fastaem, hem i gat tingting ya se bambae man i mas ded? !Nogat! Jehova i wokem ol man blong oli laef olwe long wol. Long ol faswan japta blong buk ya, yumi lanem finis se God i putum faswan man mo woman long wan naesfala paradaes. Hem i blesem tufala i mekem we tufala i gat gudfala bodi. Jehova i wantem se tufala i  harem gud oltaem. ?Yu ting se wan papa no mama we i gat lav i wantem luk se pikinini blong hem i kam olfala, i safa mo biaen i ded? !Nogat! Jehova i lavem ol pikinini blong hem mo i wantem we oli harem gud olwe long wol ya. Baebol i tokbaot ol man i se: “Laef we i no save finis, hem i putum long hat blong olgeta.” (Prija 3:​11, NW ) Taem God i wokem yumi, hem i putum tingting ya long yumi se yumi wantem laef olwe. Mo hem i wokem rod blong mekem samting ya i kamtru.

9. ?Wanem loa we Jehova i putum long Adam, mo from wanem i no hadwok tumas blong obei long loa ya?

⁹ ?Ale, from wanem ol man oli stap ded? Blong faenem ansa, yumi mas tingbaot wanem i bin hapen long wol ya long taem blong faswan man mo woman. Baebol i stori se: “[Jehova] i mekem we ol naranarafala tri oli stap gru olbaot long [Iden]. Ol tri ya oli gud tumas blong luk, mo frut blong olgeta i gud tumas blong kakae.” (Jenesis 2:9) Be i gat wan loa we Jehova i putum long tufala. Hem i talem long Adam se: “Olgeta tri long ples ya, yu yu save kakae frut blong olgeta. Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud, mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded.” (Jenesis 2:​16, 17) I no hadwok long tufala blong obei long loa ya. I gat plante narafala tri we Adam mo Iv tufala i save kakae frut blong olgeta. Be sipos tufala i obei long loa ya, bambae tufala i soemaot tangkiu long Jehova we i givim evri samting ya long tufala, wetem laef we i stret gud olgeta. Sipos tufala i obei, tufala i soem se tufala i agri se Papa blong tufala long heven i gat raet blong rulum tufala, mo tufala i soem tu se tufala i wantem we hem i lidim tufala wetem lav.

10, 11. (a) ?Olsem wanem faswan man mo woman tufala i no obei long God? (b) ?From wanem fasin blong Adam mo Iv blong no obei long God i wan bigfala sin?

¹⁰ Sore tumas, faswan man mo woman ya tufala i jusum se tufala i no wantem obei long Jehova. Setan i yusum wan snek blong toktok long Iv, hem i se: “?Olsem wanem long frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?” Iv i ansa se: “Si, i oraet nomo. Mitufala i save kakae frut blong olgeta tri long ples ya, wan nomo i stap long medel blong ples ya we mitufala i no save kakae frut blong hem. God i blokem se i tabu, mitufala i no save kakae frut blong hem. Mitufala i no save tajem nating. Mo hem i talem se sipos mitufala i brekem tabu ya, bambae mitufala i ded from.”​—Jenesis 3:​1-3.

¹¹ Be Setan i talem se: “No, hemia i no tru ya. Yutufala i no save ded. [God] i talem olsem from we i save se sipos yutufala i kakae frut ya, bambae ae blong yutufala i open, nao bambae yutufala i  kam olsem hem, we i save ol fasin we i nogud mo ol fasin we i gud.” (Jenesis 3:​4, 5) Setan i wantem pulum Iv blong ting se frut ya i save mekem i gud long hem sipos hem i kakae. Setan i talem se Iv i save tekem desisen hem wan nomo long wanem i gud mo wanem i nogud. Iv i save mekem eni samting we hem i wantem. Mo tu, Setan i talem se Jehova i giaman nomo se bambae tufala i ded sipos tufala i kakae frut ya. Iv i bilivim Setan. Ale, hem i tekem wan frut mo i kakae. Nao hem i givim frut ya long Adam, mo hem tu i kakae. Tufala i gat save, be tufala i no folem. Tufala i save se samting ya i agensem loa ya we God i putum long tufala. Taswe, taem tufala i kakae frut ya, tufala i jusum blong brekem loa ya we i isi nomo mo we i no strong tumas long tufala. Tufala i no tinghae nating long Papa blong tufala long heven mo long raet we hem i gat blong rulum tufala. !Tufala i no gat eskius nating from fasin blong  tufala blong no respektem God ya we i wokem tufala mo we i gat lav!

12. ?Wanem i save halpem yumi blong kasem save filing we Jehova i gat taem Adam mo Iv tufala i jusum blong agensem hem?

¹² Tingbaot sipos yu gat wan pikinini boe no gel we yu lukaot gud long hem mo yu keagud long hem. Nao taem pikinini ya i gruap, hem i no moa wantem obei long yu, mo i soem klia se hem i no gat respek long yu nating mo i no lavem yu. ?Bambae yu harem olsem wanem? Ating samting ya i save mekem yu yu harem i soa long hat blong yu. Ale tingbaot filing blong Jehova taem hem i luk we Adam mo Iv, tufala i jusum blong agensem hem.

13. ?Jehova i talem se taem Adam i ded bambae hem i olsem wanem? ?Hemia i minim wanem?

¹³ From we Adam mo Iv tufala i no obei, i no stret nating we Jehova i givim laef blong olwe long tufala. Tufala i ded, olsem we hem i bin talem. Hemia i min se laef blong Adam mo Iv i finis. Tufala i no go long wan ples blong ol spirit man. Yumi save samting ya from toktok we Jehova i talem long Adam taem hem i talemaot panis long hem. God i talem se: “Bodi blong yu bambae i gobak bakegen long graon ya we mi mi wokem yu long hem fastaem. Mi mi wokem yu long graon fastaem, mo bambae yu yu kam graon bakegen.” (Jenesis 3:19) God i wokem Adam long graon. (Jenesis 2:7) Bifo we Adam i laef long wol, hem i no bin stap long wan narafala ples. Taswe, taem Jehova i talem long Adam se bambae hem i gobak long graon, Hem i minim se Adam bambae i gobak olsem fastaem, we hem i no stap. Adam bambae i no moa laef, olsem graon ya we hem i kamaot long hem.

14. ?From wanem yumi ded?

¹⁴ Sipos Adam mo Iv, tufala i bin obei long God bambae tufala i laef yet tede. Be tufala i ded from we tufala i jusum blong agensem loa blong God, tufala i mekem sin. Ale, yumi tu yumi stap ded from we yumi ol pikinini blong tufala. Adam i pasem sin mo ded long olgeta pikinini blong hem. (Rom 5:12) Sin ya i olsem wan rabis sik we wan papa i pasem i go long pikinini blong hem. I no gat man i save ronwe long sin. Frut blong sin ya hemia ded. Ded hem i wan enemi, hem i no wan fren. (1 Korin 15:26) !Yumi tangkiu tumas long Jehova se hem i givim ransom blong karemaot yumi long rabis enemi ya!

15. ?From wanem trutok long saed blong ded i mekem yumi harem gud?

¹⁵ Samting we Baebol i tijim long saed blong ol dedman i mekem yumi harem gud. Olsem yumi luk finis, ol dedman oli no save harem soa mo oli no moa gat filing. Yumi no nid blong fraet long olgeta, from we oli no save mekem trabol long yumi. Oli no nidim we yumi givhan long olgeta, mo oli no save givhan long yumi tu. Yumi no save toktok wetem olgeta, mo oli no save toktok wetem yumi. Plante lida blong giaman skul oli talem se oli save halpem man we i ded, ale plante man we oli bilivim tok blong olgeta oli stap givim mane long olgeta. Be taem yumi save trutok, trutok ya i halpem yumi blong yumi no foldaon long trik blong ol man ya we tijing blong olgeta i giaman.

16. ?Hu i gat paoa long ol tijing blong plante skul? ?Mo hem i mekem samting ya olsem wanem?

¹⁶ ?Yu yu luk se plante skul tede oli tijim sem samting ya we Baebol i tijim long saed blong ol dedman? Ating bighaf oli no mekem olsem. ?From wanem? From we oli letem ol tingting blong Setan i gat paoa long ol tijing blong olgeta. Setan i yusum ol giaman skul blong pulum ol man blong bilif se afta we bodi i ded, oli gohed yet blong laef samples wetem wan spirit bodi. Hemia wan giaman tok we Setan i miksim gud wetem sam narafala giaman tok blong lidim ol man oli gowe long Jehova God. ?Hem i mekem samting ya olsem wanem?

17. ?From wanem tijing ya se ol rabis man bambae oli go bon long faea, i daonem nem blong God?

¹⁷ Olsem yumi luk long stat blong japta ya, sam skul oli tijim se sipos wan man i rabis, bambae hem i go safa long faea afta we hem i ded. Tijing ya i no leftemap God nating. Jehova i wan God blong lav mo hem i neva save mekem ol man oli safa olsem. (1 Jon 4:8) ?Bambae yu ting wanem sipos yu harem nius se wan man i panisim wan pikinini we i stronghed, i putum tufala han blong pikinini ya long faea? ?Bambae yu gat respek long man ya? ?Bambae yu laekem blong kam fren blong hem? !Nogat! Ating bambae yu ting se man ya i rabis. !Setan i wantem we yumi ting se Jehova tu i wan rabis man we i stap bonem ol man long faea blong olwe!

18. ?Wanem giaman tijing blong sam skul we i pulum man blong wosip long olgeta we oli ded?

 ¹⁸ Setan i yusum sam skul blong tijim se afta we wan man i ded, hem i kam wan spirit, mo yumi we yumi laef, yumi mas respektem mo ona long hem. Long tijing ya oli talem se spirit blong dedman i save kam fren blong yumi we i gat bigfala paoa long yumi, no hem i save kam enemi blong yumi we i save spolem yumi bigwan. Plante man oli bilif long giaman tijing ya. Ale, oli fraet long ol dedman mo oli mekem sam spesel samting blong ona long olgeta no wosipim olgeta. Defren olgeta, Baebol i tijim se ol dedman oli stap slip nomo, mo se yumi mas givim wosip i go long trufala God, Jehova nomo, we hem i Wokem olgeta samting mo we hem i stap Givim evri samting long yumi.​—Revelesen 4:11.

19. ?Taem yumi save trutok long saed blong ded, yumi kasem save wanem narafala tijing blong Baebol?

¹⁹ Taem yu save trutok long saed blong ol dedman, bambae yu no save bilivim ol giaman tijing. Mo tu, bambae yu naf blong kasem save long sam narafala tijing blong Baebol. Eksampol, taem yu save se ol man oli no gat wan spirit we i go samples afta ded, yu kasem save moa long promes blong God blong givim laef we i no save finis long ol man long wan paradaes long wol.

20. ?Wanem kwestin we bambae yumi tokbaot long nekis japta?

²⁰ Longtaem bifo, stret man ya Job i askem kwestin ya se: “?Sipos wan man we i strong gud i ded, hem i save laef bakegen?” (Job 14:​14, NW ) ?Olsem wanem? ?Wan man we i stap slip long ded, hem i save laef bakegen? Tijing we Baebol i givim long saed ya i save mekem yumi harem gud tumas. Nekis japta bambae i tokbaot samting ya.