1, 2. (1) ?Wanem i soemaot se King blong yumi i stat blong rul long yia 1914? (2) Long japta ya, ?bambae yumi tokbaot wanem?

 LONG buk ya, yumi tokbaot plante samting we Kingdom blong God i mekem finis, long medel blong ol enemi blong hem. !Ol save ya oli mekem bilif blong yumi i strong! (Sam 110:2) King blong yumi i hivimap finis ol man we oli glad blong prij, mo oli plante olsem wan bigfala ami. Hem i mekem ol man blong hem oli klin long wosip mo long fasin blong olgeta. Oli joen gud long fulwol, nating se ol enemi blong Kingdom oli traehad blong mekem olgeta oli seraot. Ol samting ya mo plante moa samting bakegen, oli soemaot klia se King blong yumi i stat blong rul long yia 1914, long medel blong ol enemi blong hem.

² I no longtaem, Kingdom bambae i mekem ol bigbigfala samting blong sapraes. Bambae Kingdom i “kam” blong “flatem gud” ol enemi blong hem. (Mat. 6:10; Dan. 2:44) Be bifo long taem ya, sam narafala impoten samting oli mas hapen. ?Wanem ol samting ya? Plante profet tok blong Baebol oli ansa long kwestin ya. Long japta ya, bambae yumi tokbaot sam long ol profet tok ya, blong kasem save long ol samting we bambae oli hapen yet.

3. ?Wanem samting we yumi stap wet long hem naoia?

³ Oli talemaot se i gat pis. Long leta we aposol Pol i raetem long ol Kristin long Tesalonaeka, hem i tokbaot samting we yumi stap wet long hem. (Ridim 1 Tesalonaeka 5:2, 3.) a Pol i tokbaot ‘Dei blong Jehova.’ Dei ya bambae i stat taem ‘Bigfala Babilon’ i lus. (Rev. 17:5) Be jes bifo we dei blong Jehova i stat, ol lida blong wol bambae oli talemaot se i gat “pis mo seftaem.” Maet oli talemaot wan taem nomo, no maet oli talem plante taem. ?Olsem wanem? ?Ol lida blong ol skul tu oli joen blong talemaot tok ya? Olgeta ya oli joen long ol samting blong wol ya, taswe maet olgeta tu oli joen blong talem se, “!I gat pis!” (Jer. 6:14, NW; 23:16, 17; Rev. 17:1, 2) Taem oli talemaot se i gat pis mo seftaem, hemia saen se dei blong Jehova bambae i faerap. Ol enemi blong Kingdom blong God “bambae oli no save ronwe nating.”

4. Taem yumi kasem save long profet tok blong Pol long pis mo seftaem, ?hemia i givhan long yumi olsem wanem?

 ⁴ Taem yumi kasem save long profet tok ya, ?hemia i givhan long yumi olsem wanem? Pol i talem se: “Naoia yufala i no moa stap long tudak, mo i no stret blong Dei ya bambae i kam kasem yufala olsem we man blong stil i mekem yufala i sek.” (1 Tes. 5:3, 4) Ol man oli no save se ol samting we i stap hapen long wol bambae oli finis olsem wanem. Be yumi, yumi save. Ale, ?profet tok ya blong pis mo seftaem bambae i kamtru olsem wanem? Yumi mas wet blong luk wanem samting stret bambae i kamaot long wol ya blong mekem profet tok ya i kamtru. Taswe, i gud “yumi wekap, we hed blong yumi i klia gud.”—1 Tes. 5:6; Sef. 3:8.

5. ?“Bigfala trabol” bambae i stat olsem wanem?

⁵ Oli agensem ol skul. Pol i talem se: “Taem ol man oli talem se, ‘!Pis mo seftaem!’ long taem ya nao, bambae trabol i kam blong spolem olgeta. Bambae trabol ya i kasem olgeta wantaem nomo.” Yu traem tingbaot: Taem laetning i laet strong, kwiktaem nomo, bigfala tanda i faerap. Long sem fasin, taem ol lida blong wol oli talem “!Pis mo seftaem!” ‘wantaem nomo trabol bambae i kam blong spolem olgeta.’ ?Trabol ya bambae i spolem hu? Fastaem, bambae i spolem ‘Bigfala Babilon,’ hemia olgeta giaman skul long wol we Baebol i talem se oli olsem “woman blong rod.” (Rev. 17:5, 6, 15) Trabol ya we i spolem ol giaman Kristin skul mo ol narafala giaman skul, hemia stat blong “bigfala trabol.” (Mat. 24:21; 2 Tes. 2:8) Plante man bambae oli sek nogud. ?From wanem? From we, kam kasem taem ya, woman blong rod ya i ting se hem i wan “kwin” we ‘i no save krae olsem wan widowoman.’ Be wantaem nomo, bambae hem i luksave se hem i rong. Kwiktaem nomo bambae hem i lus, olsem “long wan dei.”—Rev. 18:7, 8.

6. ?Hu bambae i agensem ‘Bigfala Babilon’?

⁶ ?Hu bambae i agensem ‘Bigfala Babilon’? Wan “anamol” we ‘i gat ten hon blong hem.’ Buk blong Revelesen i soemaot se anamol ya, hemia Yunaeted Neson. Ten hon blong hem, hemia ol politik paoa blong wol we oli sapotem ‘anamol ya we i red we i red.’ (Rev. 17:3, 5, 11, 12) ?Bambae anamol ya i agensem Bigfala Babilon olsem wanem? Ol neson we oli joen long Yunaeted Neson bambae oli tekemaot ol sas samting blong woman blong rod ya, bambae oli kakae ol mit blong bodi blong hem, nao “bambae oli bonem hem long faea blong spolem hem olgeta.”—Ridim Revelesen 17:16. b

7. ?Ol tok blong Jisas long Matiu 24:21, 22, i kamtru olsem wanem fastaem? ?Mo bambae i kamtru olsem wanem long fiuja?

⁷ Jehova i katem taem ya. King blong yumi Jisas, i talem wanem samting bambae i hapen afta, i se: “Hae God i . . . katem taem ya blong bambae i sevem ol man we hem i jusumaot olgeta finis.” (Ridim Matiu 24:21, 22.) Ol tok ya blong Jisas i kamtru fastaem long yia 66. Long taem ya, Jehova i “katem taem” blong trabol we ol ami blong Rom oli mekem, taem oli faet agensem  Jerusalem. (Mak 13:20) Hemia i sevem laef blong ol Kristin long Jerusalem mo Judia. ?Olsem wanem long taem blong bigfala trabol we i stap kam? Bambae Jehova i yusum King blong yumi, blong i “katem taem ya” we Yunaeted Neson i agensem ol skul. Nao skul we i tru bambae i no lus wetem ol giaman skul. Bambae oli spolem gud ol giaman skul, be truwan bambae i stap. (Sam 96:5) ?Wanem bambae i hapen afta?

8, 9. ?Maet Jisas i stap tokbaot wanem narakaen samting? Taem ol man oli luk ol samting ya, ?bambae oli mekem wanem?

⁸ Profet tok blong Jisas long ol las dei, i soemaot se i gat sam impoten samting we bambae oli hapen jes bifo long Amagedon. Trifala Gospel blong Matiu mo Mak mo Luk, i tokbaot tu samting we bambae i hapen.—Ridim Matiu 24:29-31; Mak 13:23-27; Luk 21:25-28.

⁹ Ol narakaen samting long skae. Jisas i talem se: “San bambae i kam tudak, mo mun bambae i no moa saen. Ol sta bambae oli folfoldaon.” Ol man bambae oli no moa save lukluk ol lida blong skul olsem ol laet blong lidim olgeta. Be maet Jisas i wantem talem tu se ol narakaen samting bambae i kamaot long prapa skae. (Aes. 13:9-11; Joel 2:1, 30, 31) Taem ol man oli luk ol samting ya, ?bambae oli mekem wanem? Bambae oli “harem nogud, oli fraet,” from we oli no save ronwe long trabol ya. (Luk 21:25; Sef. 1:17) Yes, ol enemi blong Kingdom blong God, nating se oli “king” no oli “slef,” be bambae oli “save ded from fraet, mo from we oli stap harem nogud long ol samting we” i kasem olgeta. Bambae oli traem blong ronwe, be bambae oli no faenem wan ples blong haed, from we oli no save ronwe long King blong yumi we i kros we i kros.—Luk 21:26; 23:30; Rev. 6:15-17.

10. ?Jisas bambae i mekem wanem? ?Ol man blong obei long Kingdom bambae oli mekem wanem? ?Ol man blong agensem Kingdom bambae oli mekem wanem?

¹⁰ Jisas i seraot ol sipsip long ol nani. Nao ol enemi blong Kingdom blong God bambae oli luk samting we i mekem olgeta oli harem nogud moa. Jisas i talem se: “Bambae ol man oli save luk mi, mi Pikinini blong Man, mi kamaot long klaod, wetem olgeta paoa we mi mi gat, mo bigfala laet ya we bambae i saenaot raonabaot long mi.” (Mak 13:26) Samting ya we Jisas i mekem blong soemaot paoa blong hem, bambae i wan saen se hem i kam blong jajem ol man. Long sem profet tok ya blong ol las dei, Jisas i givim moa save long samting we bambae hem i mekem long taem ya. Hem i talem parabol blong ol sipsip mo ol nani. (Ridim Matiu 25:31-33, 46.) Ol man blong obei long Kingdom blong God, hemia “ol sipsip,” we bambae Jisas i putum olgeta long wan saed. Olgeta ya bambae oli ‘leftemap hed blong olgeta,’ from we oli save se ‘i no longtaem bambae hem i sevem olgeta.’ (Luk 21:28) Be olgeta we oli agensem Kingdom, “ol nani,” Jisas bambae i putum olgeta long wan saed. Olgeta ya  bambae oli “krae,” from we oli save se bambae oli kasem “panis” blong ded.—Mat. 24:30; Rev. 1:7.

11. ?Yumi mas tingbaot wanem samting, taem yumi stap tokbaot tu impoten samting we bambae oli hapen yet?

¹¹ Afta we Jisas i seraotem “olgeta man blong wol,” sam moa impoten samting oli mas hapen, bifo we faet blong Amagedon i faerap. (Matiu 25:32) Bambae yumi tokbaot tu impoten samting. Faswan, se King Gogo bambae i agensem ol man blong God. Mo sekenwan, se ol tabu man bambae oli go long heven. Yumi mas tingbaot se Baebol i no talem wetaem stret tufala samting ya bambae i hapen. Be i luk olsem se faswan bambae i no finis yet, ale narawan i stat.

12. ?Setan bambae i mekem wanem blong faet agensem Kingdom?

¹² Setan i agensem ol man blong God fulwan. King Gogo blong kantri ya Magog bambae i agensem ol tabu man we oli stap yet long wol, wetem ol narafala sipsip. (Ridim Esikel 38:2, 11.) Long faet ya, Setan i stap agensem Kingdom we i rul finis. Stat long taem ya we oli sakemaot hem long heven, hem i stap agensem ol tabu man, be hemia laswan nao, bambae hem i no moa save mekem bakegen. (Rev. 12:7-9, 17) Taem ol tabu man oli wok had blong mekem Kristin kongregesen i stanap strong bakegen, Setan i traehad bigwan blong spolem pis mo glad we oli gat. Be hem i no win. (Mat. 13:30) Taswe, taem olgeta giaman skul oli lus, Setan bambae i luk se janis blong hem nao blong spolem ol man blong God, from we “oli stap gud nomo” olsem we i “no gat stonwol i goraon long olgeta blong blokem olgeta.” Nao bambae hem i pulum ol rabis man blong hem blong oli agensem fulwan ol man ya we oli obei long Kingdom.

13. ?Jehova bambae i mekem wanem blong sevem ol man blong hem?

¹³ Esikel i talem samting we bambae i hapen. Hem i tokbaot King Gogo se: “Yu aot long ples blong yu daon long not we long not olgeta, nao yu lidim wan bigfala kampani blong ol soldia we oli strong tumas, wetem ol soldia ya we oli kamaot long ol narafala kantri we olgeta evriwan oli ron long hos, yu kamtru long ples ya. Nao bambae yufala i kam faet agens long ol man ya blong mi, we yufala i plante we plante, olsem bigfala klaod blong ren we i kavremap olgeta ples.” (Esik. 38:15, 16) Bambae i luk olsem se i no gat wan samting i save stopem olgeta. ?Jehova bambae i mekem wanem? Hem i talem se: “Mi bambae mi kros we mi kros.” Ale, hem i singaot ol ami blong hem. (Esik. 38:18, 21; ridim Sekaraea 2:8.) Jehova bambae i tekem aksen blong sevem ol man blong hem long wol ya. Hemia nao faet blong Amagedon.

14, 15. ?Wanem narafala samting bambae i hapen, samtaem afta we Setan i stat blong faet agensem ol man blong God?

¹⁴ Bifo we yumi tokbaot olsem wanem Jehova bambae i sevem ol man blong hem long Amagedon, bambae yumi tokbaot wan narafala impoten samting we i mas hapen. Samting ya bambae i hapen samtaem afta we Setan i stat blong faet agensem ol man blong God, be bifo long Amagedon. Long haf 11, yumi tokbaot samting ya finis, hemia se ol tabu man we oli stap yet long wol bambae oli go long heven.

 ¹⁵ Ol tabu man oli go long heven. Long Matiu mo Mak, yumi ridim tok blong Jisas se bambae hem i tekem ‘ol man we hem i jusumaot olgeta finis,’ hemia ol Kristin we tabu spirit i makemaot olgeta, oli kam wanples. Taem hem i talem ol tok ya, hem i stap tokbaot ol samting we bambae i hapen bifo we Amagedon i stat. (Yu luk haf 7.) Jisas i tokbaot taem ya we hem i stap rul olsem King, i se: “Bambae mi sanemaot ol enjel, blong oli go tekem ol man ya we mi mi jusumaot olgeta finis, oli kam wanples. Bambae ol enjel ya oli mas go long evri ples long wol, mo long olgeta ples long heven, blong tekem olgeta oli kam.” (Mak 13:27; Mat. 24:31) ?Jisas i stap tokbaot wanem? Hem i no stap tokbaot taem ya we Jehova i putum las mak long ol tabu man we oli stap long wol, nogat. Hemia bambae i hapen jes bifo we bigfala trabol i stat. (Rev. 7:1-3) Be Jisas i stap tokbaot wan samting we bambae i hapen afta we bigfala trabol i stat. Taswe, i luk olsem se samtaem afta we Setan i stat blong faet agensem ol man blong God, ol tabu man we oli stap yet long wol bambae oli go long heven.

16. Ol tabu man we oli go long heven, ?bambae oli joen olsem wanem long faet blong Amagedon?

¹⁶ Taswe, ol tabu man ya bambae oli stap long heven bifo we faet blong Amagedon i stat. ?From wanem samting ya i impoten? From we bambae oli kasem paoa blong joen wetem Jisas, blong smasem ol enemi blong Kingdom blong God long ‘wokingstik we oli wokem long aean.’ (Rev. 2:26, 27) Ol 144,000 ya wetem ol strong enjel bambae oli folem King Jisas, taem hem i go blong faet agensem “bigfala kampani blong ol soldia” we oli stap rere blong spolem ol man blong Jehova. (Esik. 38:15) !Taem faet ya i stat, hemia nao Amagedon!—Rev. 16:16.

17. Long Amagedon, ?wanem bambae i hapen long olgeta we oli gat fasin olsem “nani”?

¹⁷ Hem i kilim ol enemi i ded. Faet blong Amagedon bambae i lashaf blong bigfala trabol. Long taem ya, Jisas bambae i mekem wan moa wok bakegen. Hem i jajem “olgeta man blong wol” finis, nao bambae hem i spolem ol man we hem i jajem olgeta se oli “nani.” (Mat. 25:32, 33) Bambae hem i yusum “naef blong faet we i sap gud” blong “kilim ol man blong evri kantri.” Olgeta we oli gat fasin olsem nani, nating se oli “king” no oli “slef,” bambae ‘oli kasem panis we i no save finis,’ hemia ded blong olwe.—Rev. 19:15, 18; Mat. 25:46.

18. (1) ?Ol trabol we i kasem “ol sipsip” bambae i jenis olsem wanem? (2) ?Jisas bambae i mekem wanem blong win bakegen?

¹⁸ ?Olsem wanem long olgeta we oli gat fasin olsem “sipsip”? Yumi tokbaot finis we bigfala ami blong Setan, klosap i purumbut long “bigfala kampani” blong “ol sipsip” ya, taem i luk se i no gat wan samting i blokem olgeta. Be naoia ol samting i jenis. “Ol sipsip” ya oli winim trabol we ol enemi oli mekem long olgeta, mo oli pastru long bigfala trabol. (Rev. 7:9, 14) Afta we Jisas i spolem ol man we oli enemi blong Kingdom, bambae hem i sakem Setan mo ol enjel blong hem oli go long bigfala hol ya  we i godaon olgeta. Bambae oli stap 1,000 yia long ples ya, we oli no save mekem wan samting nating, i olsem we oli ded finis.—Ridim Revelesen 6:2; 20:1-3.

19, 20. ?Yumi lanem wanem long ol tok blong Aesea 26:20 mo Aesea 30:21?

¹⁹ ?Bambae yumi rere olsem wanem from ol bigbigfala samting ya blong sapraes? Plante yia bifo, Wajtaoa i talem se: “Sipos yumi obei, bambae yumi stap laef.” ?From wanem i impoten blong obei? Yu traem tingbaot woning we Jehova i givim long ol man Isrel we oli stap kalabus long Babilon bifo. Hem i talem se ol enemi bambae oli kam spolem Babilon. ?Be ol man blong hem oli mas mekem wanem blong oli rere? Jehova i talem se: “Yufala i go insaed long ol haos blong yufala, mo taem yufala i stap insaed, yufala i satem doa. Yufala i go haed blong smoltaem, gogo kros blong Hae God bambae i godaon bakegen.” (Aes. 26:20) ?Yu luk ol tok ya we oli soemaot aksen? Olsem: “go insaed,” “satem doa,” “haed.” Ol tok ya oli talem samting we man i mas mekem. Ol man Isrel we oli obei long ol tok ya oli stap insaed long haos blong olgeta nomo, oli no go long rod we ol enemi oli save kasem olgeta. Blong stap laef, oli mas obei long tok ya blong Jehova. c

²⁰ ?Ale, yumi lanem wanem? Olsem ol man blong God bifo, sipos yumi wantem stap laef long taem blong bigfala trabol, yumi mas obei long ol tok blong Jehova. (Aes. 30:21) Ol tok ya, kongregesen nao i stap talemaot long yumi. Taswe, yumi mas lanem blong obei wetem fulhat blong yumi, long ol tok we yumi kasem blong lidim yumi. (1 Jon 5:3) Sipos yumi obei naoia, bambae yumi rere blong obei long fiuja. Nao Papa blong yumi, Jehova, mo King blong yumi, Jisas, bambae tufala i lukaot gud long yumi. (Sef. 2:3) Bambae yumi luk wetem prapa ae blong yumi, olsem wanem Kingdom blong God i finisim gud ol enemi blong hem. !Hemia samting we bambae yumi neva fogetem!