Tsunami We i Kilim Japan Long 2011—Stori Blong Olgeta We Oli Sef

Long haf ya, yu save ridim stori blong sam long olgeta we oli stap long taem ya we etkwek mo tsunami (wan bigfala taetel wef) i kasem Japan.

LONG Fraede namba 11 Maj, 2011, long 2:46 long aftenun, graon i seksek bigwan long Japan. Graon we i seksek long Japan hem i namba 4 bigfala etkwek long wol we, taem ol man oli makem paoa blong hem long masin, oli luk se i strong we i strong bitim ol narafala etkwek. Etkwek ya i mekem we wan bigfala tsunami i kam. Mo plante wik afta long etkwek ya, graon i stap seksek yet we i mekem se ol man oli fraet. Samwe long 20,000 man oli ded, we long olgeta ya i gat sam we oli no faenem bodi blong olgeta yet. Be i gat plante taosen man tu we oli sef. Hemia stori blong sam long olgeta ya.

Tadayuki mo woman blong hem Harumi, tufala i stap long haos blong tufala long Ishinomaki, hemia long eria we oli kolem Miyagi. Tufala i harem noes blong graon i seksek, mo tufala i luk we haos blong tufala i stap seksek strong. Tadayuki i talem se: “Mitufala i resis i go afsaed mo mitufala i sek blong luk we graon i krak smosmol long plante ples. Mitufala i stap wajem haos blong mitufala we i stap swing i go i kam. Das i sut i kamkamaot long wol blong haos olsem smok nomo.”

Ples we etkwek ya i strong moa long hem, hem i long solwota, 129 kilometa longwe long ples ya Miyagi. Olgeta ples we tsunami i spolem, oli stap long saed blong  Japan we i fesem solwota blong Pasifik. Longfala blong ples ya we tsunami i spolem hem i 670 kilometa. Long sam ples, ol wef blong tsunami ya, taem oli kasem so, oli hae olsem 15 meta. Ol wef ya oli brekem ol simen we man i mekem blong blokem solwota, oli spolem ol graon long saedsaed blong ol reva, mo oli pusum olting i go antap long graon kasem 40 kilometa.

Tsunami ya i spolem ol kampani blong lektrik, gas, mo wota. I gat samwe long 160,000 haos, stoa, mo faktri we tsunami ya i spolem no i karemaot fulwan. Afta long tsunami ya, i gat klosap 440,000 man we oli stap slip olbaot long ol skul mo ol haos we oli olsem ol senta blong komuniti blong olgeta. Plante taosen man oli ded, mo plante long olgeta oli no faenem dedbodi blong olgeta.

Ol Man Oli Lusum Olting Blong Olgeta Mo Ol Famle Blong Olgeta Oli Ded

Tsunami ya i kilim i ded plante moa man i bitim namba blong man we i ded taem graon i seksek. Yoichi mo woman blong hem Tatsuko, tufala i stap long taon ya Rikuzentakata, long eria we oli kolem Iwate. Taem graon i seksek, Yoichi i save finis se bambae wan tsunami i mas kam. Ale hem i karem papa mama blong hem i go long wan strong haos we i no stap longwe tumas. Biaen, hem mo woman blong hem, tufala i go jekem ol man we oli stap klosap long haos blong tufala, blong luk sipos oli nidim help. Be Yoichi i stap tingbaot papa mama blong hem, ale hem wetem Tatsuko i wantem gobak blong luk tufala, be oli kasem nius se tsunami i stap kam.

Tufala i resis i go long wan narafala haos we i sef blong haed long hem, be fulap samting oli stap blokem rod blong go insaed long haos ya. Long taem ya nao tufala i luk we solwota i stap pusum bigfala haos blong somil i kam stret long ples we tufala i stap long hem. Tatsuko i singaot se: ‘!Yu ron!’

Tufala i resis i go kasem yad blong wan skul we i stap antap long wan hil. Long ples ya, tufala i luk tsunami i kavremap olgeta haos long eria we oli bin stap long hem. Wan woman we hem tu i stanap long hil ya, i harem nogud, nao i talem se: “Solwota i stap karemaot haos blong mi.” Klosap 40 pesen blong taon ya Rikuzentakata i lus, mo papa mama blong Yoichi tu, tufala i lus. Biaen oli faenem dedbodi blong mama blong hem, be oli no save faenem dedbodi blong papa blong hem.

Toru i wok long wan faktri long Ishinomaki we i klosap long solwota. Taem graon i no moa seksek strong tumas, hem i resis i go long trak blong hem blong i ronwe. Hem i singaot long ol narafala man se olgeta tu oli mas ronwe from we hem i save se wan tsunami bambae i kam.

Toru i stori se: “Fastaem, tingting blong mi se bambae mi go kasem haos blong mi from we hem i stap long wan ples we i hae, be ol trak oli fasfas long rod mekem se mi tu mi fas. Mi lesin long radio nao mi harem we oli stap talem se tsunami i kasem taon klosap long mifala finis. Ale mi openem windo blong trak blong mi from we mi tingting se sipos tsunami i kasem mi bae mi save pastru long windo blong ronwe. I no longtaem biaen, mi luk wan wef we i hae olsem 2 meta i stap  kam. Wef ya i blak nomo. Hem i leftemap ol trak we oli stap fored long mi, i sakem olgeta i kambak long mi, ale wef i pusum mi mo trak blong mi i go.

“Mi traehad blong kamaot tru long windo. Ale taem mi kamaot, wef ya i karem mi mi go. Wota ya i smel nogud mo i fulap long oel. Hem i karem mi i go kasem wan bigfala haos we hem i wan garaj blong fiksimap ol trak. Long ples ya nao mi holemtaet rel blong wan step mo mi klaem i go antap long seken stori blong haos ya. Mi gat janis blong sevem wan man wetem tu woman. Taem tudak i kam, ples i kolkol mo i gat sno. Mifala smol man nomo we mifala i laef tru long kolkol naet ya. Mifala i no naf blong sevem ol narafala man mo woman we oli stap singaot blong man i givhan long olgeta.”

Midori i stap long Kamaishi, hemia long wan eria we oli kolem Iwate. Bifo we graon i seksek bigwan, hem i go stap wetem bubu man mo bubu woman blong hem. Hem i pasem eksam blong hem long hae skul mo hem i karem setifiket blong hem i go long bubu man blong hem blong i luk. Bubu man blong hem i no moa save wokbaot. Hem i ridimaot ol tok blong setifiket ya mo i talem ol gudfala toktok long Midori from wok we hem i mekem long skul. Ale, faef dei nomo biaen long gudfala taem ya, etkwek i kasem Japan.

Midori mo mama blong hem, Yuko, tufala i toktok plante long tufala olfala se tufala i mas go long wan sefples from we tufala i save se wan tsunami bambae i kam. Be bubu man i talem se: “No bae mi no go. Tsunami i neva kam kasem mifala long ples ya we i longwe long solwota.” Oli traem karem hem i goaot long haos, be oli no naf, ale oli letem hem i stap mo oli go lukaot man blong i givhan long olgeta. Long taem ya tsunami i kasem Japan finis. Sam man we oli stap antap long wan hil oli luk tufala ale oli singaot long tufala se “!Yufala i hareap! !Yufala i ron!” Ol man ya oli singaot from we tsunami i kam finis, i stap karemaot ol haos long ples blong olgeta. Midori i harem nogud from we i no save sevem tufala bubu blong hem, hem i krae mo i stap singaot bigwan se “!Bubu! !Bubu!” Biaen oli faenem dedbodi blong bubu man blong hem, be oli no save faenem dedbodi blong bubu woman.

Ol Man Oli Traehad Blong Givhan

Kwiktaem nomo gavman blong Japan i sanem ol man we oli wok blong kilim faea, ol polis, mo ol mobael we oli stap olbaot long Japan oli go long ples blong disasta. Bitim 130,000 man oli kam blong givhan long ol man we oli trabol. Biaen, ol narafala kantri tu oli givhan. Plante grup blong man oli kam, mo long ol grup ya i gat plante dokta mo nes. Oli traem faenem ol man we oli laef yet, oli tritim ol man we oli kasem kil, mo oli klinim ol ples.

Plante ogenaesesen oli halpem ol memba blong olgeta. Ol Witnes blong Jehova tu oli mekem olsem. Smoltaem nomo afta we etkwek mo tsunami i kasem Japan long Fraede aftenun ya, ol Witnes oli traem faenem olgeta we oli save se oli stap joen wanples oltaem long wosip. Be i no isi from we long sam ples, ol doti oli blokem ol rod mo i no gat lektrik, mo telefon i no wok tu. I hadwok blong traem faenem ples we ol man oli stap long hem from we ples ya i bigwan.

Takayuki i wan elda long kongregesen blong ol Witnes blong Jehova long Soma, long eria we oli kolem Fukushima. Afta long trabol we i kamaot long Fraede ya, hem i gat janis blong faenem sam famle blong ol Witnes blong Jehova. Hem i se: “Mi tingting se long nekis dei bambae mi mas go lukaotem ol narafala famle. Taem i brok delaet nomo, mi ron long trak blong mi mo biaen mi wokbaot nomo gogo kasem tudak blong traem faenem olgeta. Mi go long 20 defren ples, mo long ol haos we ol man oli sef long hem, blong traem faenem ol memba blong kongregesen. Taem  mi faenem olgeta, mi ridim ol vas blong Baebol wetem olgeta mo mi prea wetem olgeta.”

Shunji we i stap long Ishinomaki i talem se: “Mifala i seraotem mifala long ol grup. Ale mifala i go blong traem faenem ol Kristin brata mo sista. Taem mifala i kamtru long ples we disasta i spolem, mifala i sek blong luk ples ya, mifala i no moa toktok. Ol trak oli stap hang antap long ol pos blong laet. Ol haos oli hivap we wan antap long narawan. Mo ol doti we solwota i karem i kam, oli hivap i go antap i bitim ol haos. Long ruf blong wan trak, mifala i luk wan dedbodi i stap. Ating man ya i ded long naet from we ples i kolkol tumas. I gat wan narafala trak bakegen i hang antap long medel blong tu haos. I gat wan dedbodi insaed long trak ya.”

Shunji i glad tumas taem hem i faenem ol narafala Witnes blong Jehova we oli sef i stap long ol haos we oli olsem sefples. Hem i talem se: “Taem mi faenem olgeta, mi glad we mi glad tumas. Long taem ya nao mi luksave se ol brata sista oli impoten long mi olsem we oli stret famle blong mi.”

“!Mifala i Sek We Yufala i Kam Finis!”

Tu yangfala woman, nem blong tufala Yui mo Mizuki, tufala i Witnes blong Jehova mo haos blong tufala i stap kloklosap long tufala long Minamisanriku, long eria we oli kolem Miyagi. Taem graon i  no moa seksek strong, Yui i resis i kam afsaed mo i luk we Mizuki tu i resis i kam afsaed. Ale tufala i resis i go long ples we i hae. I no bitim 10 minit i pas, nao tufala i luk we ol wef blong tsunami oli kam, oli karemaot taon fulwan wetem ol haos blong tufala.

Biaen, Yui mo Mizuki oli faenem sam narafala Witnes blong Jehova long wan haos we i ples blong haed, ale oli prea wanples. Long nekis moning, sam memba blong kongregesen blong olgeta wetem sam memba blong narafala kongregesen, oli wokbaot i kamkros long hil, oli karem kakae i kam wetem sam narafala samting tu. Yui mo Mizuki, tufala i sapraes long samting ya, tufala i talem se: “!Mifala i save se bambae yufala i kam, be mifala i sek we yufala i kam finis!”

Hideharu i wan elda long kongregesen blong Tome. Hem i kam luk ol brata sista we oli stap long wan ples we i sef. Hem i se: “Mi wokbaot fulnaet blong traem faenem ol fren long ol ples klosap long solwota. Ale long 4 klok moning mi kasem nius se sam brata sista oli sef i stap long wan skul. Ale long 7 klok mifala ten mifala i rerem smol raes, ale mifala 3 i karem kakae ya wetem mifala long trak, mifala i go long skul ya. Be ol rod oli fas. Mifala i traem evri rod gogo mifala i kasem skul. Sam long olgeta we oli lusum ol haos blong olgeta, be olgeta tu oli givhan long mifala blong givhan long narafala man bakegen.”

Ol Samting We Oli Nidim Long Wosip

Evri wik ol Witnes blong Jehova oli stap kam wanples blong mekem ol miting blong stadi Baebol. Sam long ol miting ya oli mekem long Fraede naet. Ol Witnes blong Jehova long Rikuzentakata oli mekem miting long Fraede naet. Be tsunami i wasemaot Haos Kingdom (hemia haos wosip) blong olgeta. Nating se i olsem, wan Witnes i talem se i gud oli gohed, oli mekem miting. Ale oli jusum wan haos we i gud nomo i stap, mo oli talemaot long ol narafala memba blong kongregesen se bambae oli holem miting long haos ya.

Nating se i no gat lektrik, oli faenem wan jenereta blong givim laet. Olgeta 16 evriwan oli stap long miting ya. Wan yangfala we nem blong hem Yasuyuki i lusum haos blong hem long tsunami ya, be hem i kam long miting ya mo i talem se: “Wota blong ae blong mifala i ron from we mifala i glad tumas. Mifala i harem olsem se mifala i stap long wan sefples we i sef moa i bitim ol narafala ples.” Hideko i talem se: “Long taem blong miting, wanwan taem, graon i seksek strong yet. Be taem mifala i stap wanples, mi mi fogetem ol fraet mo wari we oli stap mekem mi mi harem nogud.”

Stat long taem ya i kam kasem tede, kongregesen ya i gohed nomo blong holem ol miting evri wik. Long Sande, hemia tu dei afta we graon i seksek, oli givim pablik tok we i stret long taem ya we oli stap long hem. Nem blong tok ya: “Wan Famle Blong Ol Brata Long Fulwol, Bambae i Pastru Long Bigfala Trabol.”

Ol Plan Blong Givhan Long Ol Man We Oli Trabol

Gavman i mekem kwik wok blong hem blong givhan long ol man we oli trabol. Branj ofis blong ol Witnes blong Jehova tu, we i stap long Ebina klosap long Tokyo, i hareap blong sanem help. Long Sarede, dei afta long etkwek, branj ofis i seraotem bigfala eria ya we i kasem trabol, i go long 3 haf. Ale, long Mande, 3 dei afta long etkwek, sam memba blong branj ofis oli go visitim ol ples long trifala haf ya.

Long ol wik mo manis we oli kam biaen, wok i gohed blong halpem man we i trabol. Ol Witnes oli givim plante plante samting i go blong halpem ol man we oli gat nid. Blong smoltaem oli kaontem se i gat 3 ples we ol komiti oli stap long hem blong lidim wok ya blong givhan long ol narafala mo i gat 21 dok we oli stap yusum blong givimaot ol samting we man i nidim. Plante handred volontia oli wok had blong tu manis afta long etkwek ya. Oli givimaot bitim 250 tan kakae, klos, mo narafala samting we ol man oli nidim. Plante Witnes blong Jehova oli serem olting we oli kasem wetem ol man raonabaot long olgeta.

 Ol Witnes blong Jehova long kongregesen blong Rikuzentakata mo kongregesen blong Ofunato, oli stap yusum Haos Kingdom blong olgeta we oli bildim bakegen finis, blong givhan long ol man blong tingting blong olgeta i stap strong long God. Samting ya i givhan long ol man long komuniti blong oli naf blong stanap strong long hadtaem ya we i kasem olgeta, mo oli naf blong gohed long laef blong olgeta afta long bigfala trabol ya we i kamaot long etkwek mo tsunami. Long eria ya we disasta i kamaot long hem, i gat 14,000 Witnes blong Jehova. I gat 12 we oli ded mo 2 we oli no faenem tufala yet.

Plante long ol Witnes blong Jehova we oli kasem trabol long taem ya, oli talem sem toktok ya we wan famle i talem, oli se: “Taem mifala i ronwe, mifala wanwan i karem wan basket nomo. Be evri samting we mifala i nidim, mifala i kasem long han blong ol Kristin brata sista blong mifala.” !I gud tumas blong luk we ol man blong tru God ya Jehova, oli harem gud long famle blong ol brata we oli stap long olgeta ples long wol! Famle ya nao we Jisas mo ol aposol blong hem oli bin tokbaot. Lav we i joenem bigfala famle ya, i strong. I no gat wan tsunami no wan narafala disasta we i naf blong karemaot lav ya.—Jon 13:34, 35; Hibrus 10:24, 25; 1 Pita 5:9.

[Bokis/Foto blong pija long pej 20]

WAN NARAFALA TRABOL WE I KAMAOT

Long ples ya we oli kolem Fukushima Daiichi, i gat wan bigfala faktri we i stap mekem lektrik wetem paoa blong niuklia. Taem tsunami i kilim ples ya hem i spolem masin we i blong mekem paoa blong niuklia. Samting ya i mekem we wan kaen posen win (long Inglis oli kolem se radioactive emissions) i kamaot long faktri ya mo i go olbaot long Japan mo sam narafala kantri tu. Plante taosen man we oli stap raonabaot long faktri ya oli mas lego ol haos blong olgeta. Oli mas ronwe from posen win ya i save kilim man i ded. Nius blong samting ya i kamaot plante long ol nius blong wol.

Megumi i talem se: “Haos blong mifala i stap klosap long bigfala faktri ya. Wan dei nomo afta we graon i seksek, mifala i harem nius se tsunami i spolem wan masin long faktri ya mo mifala i mas ronwe.” Sista blong Megumi, nem blong hem Natsumi, i talem se: “Ol helikopta oli stap flae olbaot, ol alam blong givim woning oli stap singaot, mo wan man i stap toktok long laodspika blong talem long mifala se mifala i mas aot.” Long ol wik we oli kam biaen, Megumi wetem Natsumi, tufala i muf i go stap long 9 defren ples. Biaen, tufala i save gobak long haos blong karem sam samting blong tufala. Oli givim 2 aoa nomo long tufala blong karem olting ya.

Chikako i gat bitim 60 yia finis. Hem i stap long Namie, long Fukushima. Hem i se: “Taem graon i seksek, mi ronwe wetem tufala pikinini blong mi, i go long wan ples we oli talem se hem i sef. Mifala i stap fulnaet long ples ya we mi mi no save slip nating from we graon i gohed yet blong stap seksek strong. Long 7 klok long moning, oli talem long mifala se mifala i mas aot kwiktaem blong go long wan ples blong haed long wan narafala taon.

“Ol trak oli fasfas long rod. Mifala i kasem narafala taon ya long 3 klok nomo long aftenun. Taem mifala i kasem ples ya, mifala i harem nius se wan samting i bosta long faktri blong niuklia paoa. Mi ting se bambae mifala i lego haos blong mifala blong smoltaem nomo, taswe mifala i no karem wan samting nating wetem mifala.” Chikako mo famle blong hem oli muf i go stap long plante defdefren ples gogo oli faenem wan renhaos we i stap longwe long hom blong olgeta.

[Credit Line]

Photo by DigitalGlobe via Getty Images

[Bokis/Foto blong pija long pej 22]

OL LESEN WE YUMI EVRIWAN I SAVE LANEM

Yoichi we i stap long Rikuzentakata, (yumi tokbaot hem finis) hem i lusum bighaf blong olting blong hem. Hem i se: “Mi save talem i tru nomo se ol samting we yu gat oli no save mekem yu yu sef nating.” Plante taem finis ol man blong God oli luksave samting ya. Oli lanem samting ya long ol tok we Jisas i tijim ol man blong hem long hem. Jisas i talem se ol samting we man i gat long wol ya oli no impoten tumas. Samting we i moa impoten long laef blong man hemia blong mekem God i glad mo blong traehad from ol blesing blong God.—Matiu 6:19, 20, 33, 34.

Wan narafala lesen we yumi lanem se yumi mas lesin long ol woning we oli kamaot. Fasin we yumi mekem taem yumi kasem wan woning i save sevem laef blong yumi no i save mekem we yumi lusum laef. Plante long ol man Japan we oli hareap blong ronwe i go long ples we i hae, oli sef.

 [Map/Foto blong pija long pej 18]

(Lukluk niuspepa)

JAPAN

TOKYO

Kamaishi

Rikuzentakata

Ishinomaki

Minamisanriku

Soma

Faktri we i mekem lektrik blong niuklia paoa long Fukushima

Ebina

Branj ofis blong ol Witnes blong Jehova

[Ol foto]

Rikuzentakata, Iwate

Soma, Fukushima

Ishinomaki, Miyagi

Kamaishi, Iwate

Minamisanriku, Miyagi

[Foto blong pija long pej 16]

Harumi mo Tadayuki

[Foto blong pija long pej 17]

Yoichi mo Tatsuko

[Foto blong pija long pej 17]

Toru

[Foto blong pija long pej 19]

Trak blong Toru

[Foto blong pija long pej 19]

Yuko mo Midori

[Foto blong pija long pej 19]

Takayuki

[Foto blong pija long pej 20]

Shunji

[Foto blong pija long pej 21]

Mizuki mo Yui

[Foto blong pija long pej 21]

Hideharu

[Foto blong pija long pej 21]

Ol man we oli kam blong givhan

[Foto blong pija long pej 22]

Haos Kingdom long Rikuzentakata afta long tsunami

[Foto blong pija long pej 22]

Tri manis biaen

[Foto blong pija long pej 22]

Haos Kingdom taem i finis

[Foto blong pija long pej 16]

JIJI PRESS/AFP/Getty Images