Long 11 Maj 2011, graon i seksek bigwan long Japan. Paoa blong hem i kasem 9.0. Long taem ya, i gat bitim 15,000 man oli ded mo ol samting we disasta ya i spolem, i bitim 200 bilian (U.S) dola. Tingbaot stori blong Kei, we i gat 32 yia. Hem i lesin long woning we gavman i talem, long saed blong taetel wef we bambae i kasem olgeta, ale hem i go haed long wan hil. Hem i talem se: “Long nekis dei, taem mi gobak blong karem sam samting long haos blong mi, mi sek se i no gat wan samting i stap, solwota i karemaot haos blong mi, fandesen nomo i stap.

“I tekem taem blong mi kasem save se, mi no lusum wan samting nomo, be mi lusum olgeta samting we mi gat. Evri samting oli lus, trak blong mi, kompiuta blong wok, tebol, jea, piano, gita, yukalele, mo ol samting we mi stap yusum blong droem mo pentem ol pija.”

Yu harem gud long ol samting we yu gat yet, i bitim ol samting we yu lusum. Baebol i talem se: “Maet man i gat plante samting blong hem, be stamba blong prapa laef blong man i no stap long ol samting ya.” (Luk 12:15) Kei i tokbaot samting we hem i mekem, i se: “Fastaem, mi mekem wan lis blong ol samting we mi wantem, be hemia i mekem mi tingbaot evri samting we solwota i karemaot. Ale, mi jusum blong pem ol samting nomo we mi nidim, mo sloslo mi jes pem sam narafala samting bakegen. Lis we mi folem i givhan blong mekem laef blong mi i kam gud bakegen.

Yu givhan long narafala wetem gudfala ekspiriens blong yu. Kei i talem se: “Ol man oli givim plante samting long mi. Be taem mi dipen oltaem long narafala, i olsem we mi no moa naf blong mekem eni samting.” Hem i gohed i se: “Biaen, mi tingbaot samting we Baebol i talem long Ol Wok 20:35, i se: ‘Man we i stap givim presen i go, hem i save harem gud moa, i winim man we i stap kasem presen blong hem.’ I tru, i no gat samting we mi save givim blong givhan long ol man. Be nating se i olsem, mi talem ol gudfala toktok blong leftemap tingting blong olgeta. Ale, taem mi givhan long ol narafala wetem gladhat blong mi, samting ya i givhan long mi bigwan.”

Yu prea long God blong i givim waes long yu, blong yu naf blong winim ol trabol we oli kasem yu. Kei i trastem ol tok blong Baebol we i talem se: ‘Hem bambae i harem prea blong ol man we oli lusum evri samting.’ (Ol Sam 102:17) Yu tu, yu save mekem sem mak.

?Yu yu save? Baebol i tokbaot wan taem we ol man bambae oli no moa save harem nogud from ol trabol we oli kamaot tede from wan disasta. *—Aesea 65:21-23.