Laef Stori

Mekem Wok Wetem Ful Laef Nating Se i Gat Traem

RODOLFO LOZANO I TALEM STORI YA

Mi bon long Septemba 17, 1917, long taon blong Gómez Palacio, Durango Stet, long Meksiko. Hemia long taem ya we ol man Meksiko oli girap blong faet agensem gavman blong olgeta. Nating se faet ya i finis long 1920, be long ples we mifala i laef long hem ol smosmol faet oli gohed blong plante yia, mekem se laef i strong tumas.

WAN taem Mama blong mi i faenemaot se bambae i gat faet bitwin ol rebel mo ami. Hem i blokem mi wetem trifala brata mo tufala sista blong mi, blong mifala i no go afsaed long haos blong plante dei. Mifala i gat smol kakae nomo, mo mi rimemba se mi mo smol sista blong mi, mitufala i haed aninit long bed. Afta long taem ya, Mama i mekemap tingting blong hem blong muf i go long Yunaeted Stet wetem mifala ol pikinini. Papa blong mi i joenem mifala biaen.

Mifala i kasem California long 1926. Hemia jes bifo we Bigfala Hadtaem long saed blong mane i kasem Yunaeted Stet. Mifala i stap muf oltaem i go long eni ples we mifala i save faenem wok, olsem San Joaquin Valley, Santa Clara, Salinas, mo King Siti. Mifala i lan blong wok long ol garen mo hivimap olkaen frut mo ligim long ol plantesin. Nating se mi mas wokhad long yangtaem blong mi, hem i wan gudfala taem long laef blong mi.

Mi Lanem Trutok Blong Baebol

Long Maj, 1928, wan Baebol Studen, hemia nem blong ol Witnes blong Jeova long taem ya, i visitim mifala. Hem i wan olfala man, we nem blong hem Esteban Rivera, mo hem i tok lanwis Spen. Hem i givim wan buk long mifala we nem blong hem, “Where Are the Dead?” (?Ol Dedman Oli Stap Wea?) Nem blong buk ya wetem ol save we i stap insaed long hem i pulum intres  blong mi bigwan. Nating se mi yang nomo, mi intres tumas blong stadi Baebol mo joen oltaem wetem ol Baebol Studen. Sam taem biaen, mama blong mi mo sista blong mi Aurora, tufala tu i kam ol man we oli wok strong blong presem Jeova.

Long medel blong ol yia 1930, oli bildim wan Haos Kingdom long San Jose, blong kongregesen long Inglis lanwis i mekem miting long hem. From we plante man we oli toktok lanwis Spen oli wok long ol plantesin long ples ya, mifala i stat blong prij long olgeta mo mekem Wajtaoa Stadi wetem olgeta. Sam Witnes we oli toktok lanwis Spen, mo we oli laef long San Francisco, 80 kilometa longwe long mifala, oli kam blong givhan long mifala. Sam taem biaen, i gat samwe long 60 man we oli joen long ol miting long lanwis Spen long Haos Kingdom ya long San Jose.

Taem i pas, nao long Februari 28, 1940, long wan asembli long San Jose, mi tekem baptaes blong soemaot se mi givim laef blong mi i go long Jeova. Long yia we i kam biaen, mi statem wok blong paenia, olsem wan Witnes blong Jeova we i stap prij fultaem. Biaen, long Eprel 1943, oli askem mi blong muf i go long Stockton, wan taon samwe long 130 kilometa longwe. Hemia blong statem wan kongregesen long lanwis Spen. Long taem ya mi stap mekem wok olsem presiden elda long Inglis kongregesen long San Jose, mo long semtaem mi lukaot long olgeta Witnes long ples ya, we oli toktok lanwis Spen. Afta we mi mekem plan blong ol narafala oli lukaot long ol wok ya, mi muf i go long Stockton.

Holemstrong Tru Long Ol Traem

I stat long 1940, grup we i jusum ol man blong joen long ami, oli singaot mi plante taem. Mo evri taem we mi talem se tingting blong mi i blokem mi blong joen long ami, oli respektem tingting blong mi. Be, i no longtaem afta we Yunaeted Stet i joen long namba tu bigfala faet blong wol long Disemba 1941, oli strong moa long mi blong mi joen long ami. Biaen, long 1944, oli putum mi long kalabus. Taem mi stap wet blong pas long kot, oli putum mi long wan kalabus aninit long graon, wetem ol man we oli brekem loa. Taem ol man ya oli lanem se mi wan Witnes blong Jeova, plante long olgeta oli askem ol kwestin long mi. Oli wantem save tingting blong God long saed blong ol nogud fasin blong brekem loa we oli mekem.

Sam Witnes long San Jose oli pem rod blong mi save aot long kalabus, wetem promes se bambae mi kambak blong pas long kot. Wan loea blong Los Angeles, we i tok from raet blong ol man long kantri, hem i agri blong tok from mi long kot we mi no pem hem. Jaj i tekem disisen se bambae mi save gofri sipos mi lego wok blong paenia, mi faenem wan wok, mo mi kam luk ol man blong gavman wan taem evri manis. Mi no agri long disisen  ya, ale jaj i sanem mi long kalabus blong McNeil Aelan, long Washington Stet, blong mi stap tu yia. Long ples ya mi spenem taem blong mi blong mekem dip stadi long Baebol. Mo tu, mi lan blong yusum wan taepraeta. Bifo we tu yia i pas, oli letem mi mi aot long kalabus from gudfala fasin blong mi. Kwiktaem nomo mi mekem plan blong gohed long wok blong paenia.

Wok i Kam Bigwan Moa

Long koltaem long 1947, oli sanem mi mo brata we i paenia wetem mi, mitufala i go long Colorado Siti, long Texas. Be from we ples ya i kolkol tumas mitufala i go long San Antonio, we i hot moa. Be, long ples ya i ren oltaem, mekem se mifala i no save joen long wok blong prij long ol haos wanwan. I no longtaem, mane blong mitufala i finis. Blong plante wik mitufala i kakae bred nomo wetem kabis we i no tan mo dring wan kaen ti we mifala i wokem long ligim. Brata we i paenia wetem mi i gobak long ples blong hem, be mi mi stap. Taem ol Witnes we oli toktok Inglis oli faenemaot we mi trabol long saed blong mane, oli stat blong givhan long mi.

Long nekis yia, taem ol tri oli stat blong putum flaoa, mi gobak blong paenia long Colorado Siti. Samtaem biaen mifala i stanemap wan smol kongregesen long lanwis Spen. Biaen, mi muf i go long Sweetwater, Texas. Long ples ya mi givhan blong stanemap wan narafala kongregesen bakegen long lanwis Spen. Taem mi stap long Sweetwater, mi kasem wan leta we i singaot mi blong go long namba 15 klas blong Wajtaoa Baebol Skul blong Gilead blong kam wan misinari. Trening blong kam misinari i stat long Februari 22, 1950. Mi kasem stefeket blong mi, long hot taem, long wan intenasnal asembli long Yankee Stadium, New York. Biaen, mi stap tri manis long hedkwota blong ol Witnes blong Jeova long Brooklyn. Long ples ya mi kasem trening blong wok long branj ofis long Meksiko.

Wok Long Meksiko

Mi kasem Meksiko Siti long Oktoba 20, 1950. Tu wik biaen, oli givim wok long mi blong lukaot long branj ofis long ples ya. Mi holem wok ya bitim fo yia. Ol samting we mi lanem long taem we mi paenia, no taem mi stap long kalabus, long Gilead skul, mo long Brooklyn, oli givhan bigwan long mi. Taem mi kasem Meksiko, kwiktaem nomo mi luksave nid blong givhan long ol brata sista blong Meksiko blong kam strong long saed blong spirit. Mo antap long samting ya, oli nidim help blong holemtaet olgeta gudfala fasin blong Tok blong God.

Long ol kantri blong Latin Amerika, mo long Meksiko tu, plante man mo woman oli stap wanples be oli no mared folem loa. Ol skul blong Krisendom, * antap moa Katolik Skul, oli agri blong ol man oli folem fasin ya, nating se i agensem Baebol. (Hibrus 13⁠:4) Taswe, sam man oli kam memba blong ol kongregesen blong ol Witnes blong Jeova, nating se oli no mared yet folem loa. Nao branj ofis i wokem wan plan se long sikis manis we i kam, olgeta man ya oli mas stretem mared blong olgeta folem loa. Sipos oli no mekem samting ya, oli no save gohed blong stap olsem ol Witnes blong Jeova.

I no hadwok long bighaf blong olgeta, blong stretem laef blong olgeta. Blong mared, oli nidim nomo blong saen folem loa. Be laef blong sam narafala i fasfas tumas. Eksampol, sam long olgeta oli mared tu taem, no tri taem, mo oli neva divos folem loa. Be sloslou, taem ol man blong Jeova oli stretem mared blong olgeta folem ol tijing blong Tok blong God, ol kongregesen oli haremgud long ol nambawan blesing long saed blong spirit.​—⁠1 Korin 6⁠:​9-11.

Long taem ya, plante man Meksiko oli no skulgud. Bifo we mi kasem ples ya long 1950, branj ofis i plan finis blong gat ol klas insaed long kongregesen blong tijim ol man blong oli rid mo raet. Ale oli mekem plan blong ol klas ya bakegen, mo oli wantem rejistarem ol klas ya long gavman. !I stat long 1946, yia we mifala i stat blong raetemdaon ol ripot, i kam kasem naoia, bitim 143,000 man long Meksiko oli lan blong rid mo raet long ol klas blong ol Witnes blong Jeova!

Ol loa long Meksiko long saed blong skul oli strong tumas. Be, long ol yia we oli jes pas, sam bigfala jenis i kamaot. Long 1992, wan niufala loa i kamaot long saed blong skul, mekem se long 1993, gavman i rejistarem skul blong ol Witnes blong Jeova long Meksiko.

Ol jenis ya oli mekem se mi haremgud tumas, from we bifo mi no ting se ol samting ya bambae  oli save hapen. Long plante yia, mi go luk olgeta long ol ofis blong gavman bakegen mo bakegen, mo evri taem mi luksave se oli no trastem mifala. Be, i gud tumas blong luk olsem wanem Ligal Dipatmen long branj ofis blong mifala i lukaot long bisnes ya, mekem se naoia mifala i save joen long wok blong prij, mo gavman i no blokem mifala tumas.

Mekem Wok Tugeta Wetem Wan Misinari Waef

Taem mi kasem Meksiko, i gat plante misinari finis long kantri ya, we oli bin go long ol faswan klas blong Gilead skul. Wan long olgeta, hem i Esther Vartanian, wan Witnes blong Armenia we i stat blong paenia long Vallejo, California, long 1942. Mitufala i mared long Julae 30, 1955, mo biaen mitufala i gohed blong wok long Meksiko. Esther i gohed blong wok olsem wan misinari long Meksiko Siti, mo mitufala i laef long branj ofis, ples ya we mi gohed blong wok long hem.

Long 1947, Esther i statem misinari wok blong hem long Monterrey, Nuevo León, Meksiko. Long taem ya i gat wan kongregesen mo 40 Witnes nomo long Monterrey, be taem hem i muf i go long Meksiko Siti long 1950, i gat fo kongregesen. Naoia, i gat tu yangfala we oli kamaot long ol famle we Esther i mekem Baebol stadi wetem olgeta taem hem i wok long Monterrey, tufala i wok long branj ofis blong mifala we i stap klosap long Meksiko Siti.

Long 1950, teritori we ol misinari oli prij long hem long Meksiko Siti, i kavremap bighaf blong bigfala taon ya. Oli wokbaot leg nomo no long ol olfala bas we oli fulap gud long ol man. Taem mi kasem ples ya long en blong 1950, i gat seven kongregesen. !Naoia namba ya i kam antap kasem 1600, mo i gat bitim 90,000 pablisa blong Kingdom long Meksiko Siti, mo las yia bitim 250,000 man oli joen long Memoriol blong ded blong Kraes long taon ya! Long ol yia we oli pas, Esther mo mi, mitufala i glad tumas blong gat janis blong wok long plante long ol kongregesen ya.

Taem Esther mo mi, mitufala i statem wan Baebol stadi, mitufala i traehad blong pulum intres  blong papa blong famle, mekem se, fulwan famle i joen long stadi ya. From samting ya mitufala i luk plante bigfala famle oli kam blong mekem wok blong Jeova. Mi sua se wan risen from wanem trufala wosip i gru kwiktaem long Meksiko, hemia from we plante taem olgeta memba blong wan famle oli joen tugeta long trufala wosip.

Jeova i Blesem Wok Ya

I stat long 1950, wok blong prij i kam antap bigwan long Meksiko. Ol namba oli kam antap, mo tu i gat plante jenis oli kamaot blong mekem se wok ya i ron gud moa. Mitufala i glad tumas long janis we mitufala i bin gat blong givhan smol long wok ya. Mo tu, mitufala i glad blong wok wetem ol man we oli hapi mo we oli gat fasin blong tekem narafala i kam long haos blong olgeta.

Sam yia bifo, Karl Klein, we hem i wan memba blong Hed Kampani blong ol Witnes blong Jeova, mo waef blong hem, Margaret, tufala i kam visitim mifala taem tufala i stap tekem spel blong tufala. Brata Klein i wantem faenemaot olsem wanem wok i stap gohed long teritori ya. Taswe, hem mo Margaret, tufala i kam long Kongregesen blong San Juan Tezontla, klosap long Meksiko Siti. Hemia kongregesen we mitufala i stap long hem long taem ya. Rum we mifala i mekem miting long hem i smol nomo. Longfala blong hem i olsem 5.5 mita mo bigfala blong hem i 4.5 mita. Taem mifala i kasem ples ya blong miting, samwe long 70 man oli stap finis, mo klosap i no gat ples blong stanap. Ol olfala oli sidaon long ol jea, ol yangfala long ol stul, mo ol smosmol pikinini oli sidaon long ol brikis long graon.

Brata Klein i sapraes tumas blong luk ol pikinini oli rere wetem Baebol blong olgeta, mo oli jekemap ol vas we brata i yusum long tok blong hem. Afta long pablik tok, Brata Klein i tokbaot Matiu 13⁠:​19-23 mo hem i talem se long Meksiko i gat plante long ol “gudfala graon” ya we Jisas i tokbaot. Tede, seven long ol pikinini we oli bin stap long miting ya oli joen long wok blong bildim branj ofis blong mifala long Meksiko Siti, blong mekem i kam bigwan moa. Wan long ol narafala pikinini ya i wok long Betel, mo sam long ol narafala bakegen oli mekem wok blong paenia.

Taem mi kasem Meksiko Siti, i gat 11 memba nomo long branj ofis blong mifala. Naoia, i gat 1,350 we oli wok long ples ya, mo 250 long olgeta oli wok blong bildim ol niufala ofis blong sosaeti. Taem olgeta wok ya oli finis, maet long yia 2002, branj ofis bambae i bigwan naf blong holem 1,300 moa man blong wok long hem. !Tingbaot, long 1950 mifala i no kasem 7,000 pablisa blong Kingdom yet long kantri ya, be naoia mifala i gat bitim 500,000! Hat blong mi i fulap long glad taem mi luk olsem wanem Jeova i blesem traehad blong ol brata blong yumi long Meksiko, we oli gat tingting daon mo we oli wokhad blong presem hem.

Fesem Wan Bigfala Traem

Wan bigfala traem we mi fesem i no longtaem, hemia hadtaem from sik. Long bighaf blong laef blong mi helt blong mi i gud nomo. Be long Novemba 1988, mi kasem sik ya we wan saed bodi blong mi i ded. Mi talem tangkiu long Jeova, we tru long eksasaes mo sam narafala tritmen, mi kamgud lelebet, nating se sam haf blong bodi blong mi oli no wokgud fulwan olsem we mi wantem. Mi mas pas long dokta oltaem mo tekem meresin blong blokem hed i soa mo sam narafala problem we mi gat from sik ya.

Nating se mi no moa save mekem plante wok olsem bifo, mi haremgud long janis ya we mi bin gat blong halpem plante man blong kasem save long ol stamba tingting blong Jeova mo kam man blong hem we oli givim laef blong olgeta i go long Jeova. Mi glad tu blong storian wetem fulap Kristin brata mo sista we oli visitim branj ofis blong mifala. Fasin ya i leftemap tingting blong olgeta be blong mi tu.

Save se Jeova i glad long wok we yumi mekem mo we wok ya i no blong nating nomo, i givim paoa long mi blong gohed blong stanap strong. (1 Korin 15⁠:58) Nating se mi sik mo mi no moa save mekem plante samting, mi folem advaes long Kolosi 3:​23, 24 se: “Long wanem wok we yufala i mekem, be yufala i mas mekem [“wetem ful laef,” NW ] blong yufala, olsem we yufala i stap wok blong Masta blong yumi, yufala i no stap wok blong ol man nomo. I gud yufala i save we Masta ya blong yumi bambae hem i givim pei long yufala, we hemia ol samting ya we hem i putumrere olgeta finis blong ol man blong hem.” Folem advaes ya, mi lan blong mekem wok blong Jeova wetem ful laef blong mi, nating se mi kasem sam traem.

[Futnot]

[Tok blong pija long pej 24]

Taem mi mekem wok blong paenia long 1942

[Tok blong pija long pej 24]

Waef blong mi i statem misinari wok long Meksiko long 1947

[Tok blong pija long pej 24]

Esther mo mi tede

[Tok blong pija long pej 26]

Lefsaed antap: Betel famle blong mifala long Meksiko long 1952, we mi mi stanap long fored

Antap: Bitim 109,000 man oli kam wanples long stad ya long Meksiko Siti blong mekem asembli long 1999

Lefsaed aninit: Niufala branj ofis blong mifala we klosap nao i finis