Laef Stori

Haremgud Mo Gat Tangkiu Nating Se Mi Kasem Hadtaem

NANCY E. PORTER I TALEM STORI YA

Long naet blong Jun 5, 1947, mi mo hasban blong mi George, mitufala i stap long Bahamas, hemia ol aelan long saot is blong Yunaeted Stet. Long naet ya, ples i hot lelebet. Ale mitufala i sek se wan haeman blong gavman i kam luk mitufala. Hem i givim wan leta we i talem se ol man oli no glad blong luk mitufala long aelan ya, mo se mitufala i mas “!lego kantri ya kwiktaem!”

MI MO George, mitufala i faswan misinari blong ol Witnes blong Jeova we i kam long Nassau, hemia bigfala taon long Bahamas. Oli sanem mitufala blong go wok long ples ya, afta we mitufala i kasem stefeket long namba eit klas blong Gilead skul, wan skul blong trenem ol misinari long New York. ?Wanem samting i mekem se oli wantem sanemaot mitufala afta long tri manis we mitufala i stap long kantri ya? ?Mo wanem i mekem se bitim 50 yia biaen, mi mi stap yet long kantri ya?

Kasem Trening Blong Prij

Fasin blong papa blong mi, Harry Kilner, i gat bigfala paoa long mi. Hem i soem nambawan eksampol long mi. Hem i lego plante samting long laef blong hem blong kam wan Witnes blong Jeova. Nating se helt blong hem i nogud, hem i go prij klosap evri wiken, hem i gat strong tingting blong putum Kingdom fastaem long laef blong hem. (Matiu 6:​33) Mifala i no gat tumas mane. Long ol yia 1930, papa i gat wan stoa blong fiksimap sus long Lethbridge, Alberta,  Kanada, mo stoa ya i ples we mifala i kam long hem blong mekem ol samting long saed blong spirit. Taem mi pikinini, ol Witnes blong Jeova we oli prij fultaem, oli kolem olgeta ol paenia, oli stap kam long haos blong mifala mo talem ol gudfala stori. Kam kasem naoia, mi no fogetem olgeta yet.

Long 1943, mi statem wok blong paenia klosap long Fort Macleod mo Claresholm, Alberta. Long taem ya, oli blokem wok blong prij long Kanada from sam giaman nius we sam man blong agens oli mekemap long Seken Wolwo. Eria we mifala i stap prij long hem i kasem 50 kilometa. Be from we mifala i yang mo mifala i gat paoa, mifala i ron long baskel mo wokbaot kasem ol smol vilej mo ol plantesin long eria ya. Long taem ya, mi gat janis blong visitim sam long olgeta we oli bin go long Gilead Skul, mo ol stori we oli talem i pusum mi blong wantem kam misinari.

Long 1945, mi mared wetem George Porter blong Saskatchewan, Kanada. Long 1916 i kam, papa mama blong hem oli ol Witnes we oli rili wok strong, mo George tu i jusum blong prij fultaem. Faswan ples we mitufala i go wok long hem, hemia naesfala Vali Lynn long Not Vancouver, Kanada. Smoltaem biaen, oli askem mitufala blong go long Gilead Skul.

Long ol yia we oli pas, mi bin storian wetem olgeta narafala we oli go long ol defdefren skul, mo mi luk se wanem trening we oli kasem long skul blong olgeta i no givhan nating long olgeta, be i mekem se oli lusum bilif long God mo Tok blong hem, Baebol. Defren olgeta, wanem we mifala i lanem long Gilead Skul i givhan bigwan long tingting blong mifala mo i mekem se bilif blong mifala long God mo Tok blong hem i kam moa strong. Sam long olgeta we mifala i kasem trening long skul ya oli go long Jaena, Singapore, India, sam kantri long Afrika, Saot Amerika, mo sam narafala ples bakegen. Mi stap tingbaot yet taem ya we oli talemaot se bambae mitufala i go long ol hot aelan blong Bahamas.

Olsem Wanem Mifala i Save Stap

Trep blong mitufala blong go wok long Bahamas, i moa sot taem yumi skelem wetem trep blong ol fren long klas blong mitufala. I no longtaem biaen, mitufala i stap haremgud long naesfala hot weta long Bahamas. I gat naesfala blu skae, solwota we i kliagud, ol naesfala haos, mo plante baskel. Be samting we mi no save fogetem, hemia smol grup blong faef Witnes we oli stap wet long mitufala taem bot blong mifala i kasem ples ya. Smoltaem biaen, mitufala i kasem save se sam kastom long ples ya i defren long fasin we mitufala i stap folem. Eksampol, oli askem hasban blong mi blong no moa singaot mi se, swithat long fored blong ol man. Long kantri ya, ol man we oli stap slip olbaot, olgeta nao oli save yusum tok ya.

 Kwiktaem nomo, mitufala i lan blong laef wetem ol man long ples ya. Be taem ol lida blong jos oli luk samting ya, oli fraet, nao oli giaman se mitufala i Komunis. Ale, oli givim oda se mitufala i mas lego kantri ya. Long taem ya, ol Witnes long ol aelan ya i no kasem 20. Kwiktaem nomo ol Witnes ya oli faenem plante narafala man blong saenem wan leta blong askem mitufala blong stap. From samting ya gavman i no sakemaot mitufala.

Go Long Wan Niufala Ples Blong Prij

Trutok blong Baebol i gru kwiktaem long hat blong olgeta we oli lavem God. From samting ya, plante moa misinari blong Gilead i kam long Bahamas. Biaen, long 1950, oli bildim wan branj ofis. Ten yia biaen, Milton Henschel, wan memba blong hedkwota long Brooklyn, New York, i kam long Bahamas mo i askem ol misinari sipos wan long mifala i wantem go prij long wan narafala aelan blong Bahamas. Mi mo George mitufala i agri blong go, mo mitufala i go wok long wan aelan we nem blong hem, Long. Mitufala i stap 11 yia long aelan ya.

Aelan ya, Long, i wan long ol aelan blong Bahamas. Longfala blong hem i 140 kilometa mo bigfala blong hem i 6 kilometa. Long taem ya, aelan ya i no gat wan bigfala taon. Taon ya, Clarence Town, i gat samwe 50 haos nomo. Ol man oli laef olsem man bus nomo. I no gat lektrik, saplae wota, mo stovgas. Taswe mitufala i mas lan blong laef olsem ol man aelan. Long ples ya, ol man oli laekem blong tokbaot helt. Mitufala i faenem se taem mitufala i talem halo, mitufala i no mas askem man se, “?Olsem wanem i oraet?” From we sipos mitufala i askem olsem, bambae man i talemaot evri samting long saed blong helt blong hem.

Plante taem, mitufala i prij long ol man we oli stap long ol smol kijin blong olgeta afsaed. Ruf blong ol kijin ya, oli wokem long gras mo oli yusum faeawud blong kukum kakae blong olgeta. Long ol vilej, i gat ol man blong wok long plantesin mo ol man blong hukum fis we oli gat kaen fasin. Plante long olgeta oli stap go long jos, be tu oli bilif strong long rabis spirit. Sipos wan narakaen samting i hapen, oli talem se hemia i wan saen blong wan samting.

Ol lida blong jos oli stap go nomo insaed long haos blong ol man mo oli stap terem ol buk blong Baebol we mitufala i bin livim wetem olgeta. Samfala we oli no strong oli fraet, be i gat samfala we oli no fraet long ol lida ya. Eksampol, wan woman blong 70 yia i no fraet nating. Hem i wantem kasem save long Baebol, mo i no longtaem biaen, hem wetem sam narafala oli kam ol Witnes. Mitufala i faenemaot se plante moa man oli intres. Taswe, long sam Sande, George i mas ron long trak i go 300 kilometa blong halpem olgeta oli kam long ol miting.

Long ol faswan manis, taem i no gat narafala Witnes, mi mo George mitufala i stap strong long bilif from we mitufala i rerem ol Kristin miting tugeta. Antap long samting ya, mitufala i folem wan nambawan program evri Mande naet blong stadi long Wajtaoa mo ridim Baebol. Mitufala i ridim olgeta Wajtaoa mo Wekap! taem mitufala i kasem olgeta.

Papa blong mi i ded taem mitufala i stap long aelan ya Long. Long hot taem long 1963,  mitufala i tekem Mama i kam stap wetem mitufala. Nating se hem i olfala tumas, hem i lan blong laef gud wetem mitufala long aelan ya go kasem we hem i ded long 1971. Tede, aelan ya Long i gat wan kongregesen wetem wan niufala Haos Kingdom.

Wan Hadtaem We i Mekem Mi Harem Nogud Tumas

Long 1980, George i faenemaot se helt blong hem i stap kam nogud. Stat long taem ya, mi harem nogud tumas taem mi luk hasban blong mi we mi lavem hem tumas, we mitufala i stap wok tugeta, mo wan gudfala fren blong mi, i kasem sik ya Alzeimer. Laef blong hem i jenis bigwan. Sik ya i kam strong tumas long ol laswan fo yia bifo we hem i ded long 1987. Hem i bin joen wetem mi long wok blong prij mo long ol miting kasem mak we hem i naf blong mekem. Nating se i olsem, plante taem ol traehad blong hem i mekem mi krae. Lav we ol Kristin brata oli bin soem long mi wetem kaen fasin, i mekem mi harem gud bigwan. Nating se i olsem, mi mestem George bigwan.

Wan nambawan samting long saed blong mared blong mi wetem George, hemia se mitufala i storian gud tugeta oltaem. Naoia we George i no moa stap, mi mi glad moa se Jeova i askem long ol man blong hem se ‘oltaem oli mas prea,’ mo ‘oli mas stap prea oltaem,’ mo yusum olgeta janis blong “oli mekem ol kaen prea.” (1 Tesalonaeka 5:​17; Rom 12⁠:​12, NW; Efesas 6:​18, NW ) Mi harem gud tumas blong save se Jeova i stap tingbaot ol nid blong yumi. Mi gat filing olsem man blong raetem Ol Sam we i singsing se: “Yumi presem Masta ya blong yumi, we evri dei, hem i stap karem ol hevi samting blong yumi.” (Ol Sam 68⁠:19) Mi tingbaot ol samting we mi wan mi naf blong mekem long ol wanwan dei, mo mi tangkiu from ol blesing we mi kasem evri dei. Hemia nao beswan rod blong laef we Jisas i tokbaot.​—⁠Matiu 6:​34.

Ol Nambawan Blesing Long Wok Blong Prij

Fasin blong stap bisi long Kristin wok blong prij i halpem mi blong no tingbaot ol samting we oli bin hapen bifo. Taswe mi naf blong winim ol filing ya we i save mekem man i wari tumas. Taem mi tijim ol narafala long trutok long Baebol, mi glad we mi glad. Mo samting ya i mekem se oltaem mi folem wan program long saed blong spirit, nao laef blong mi i gat oda.​—⁠Filipae 3:​16.

Wan dei, wan woman we mi bin prij long hem 47 yia bifo, i telefon long mi. Woman ya, hem i dota blong faswan studen we mi mo George, mifala i bin stadi Baebol wetem hem, taem mitufala i jes kasem Bahamas long 1947. Mama papa blong hem, mo olgeta brata sista blong hem, oli kam ol Witnes blong Jeova. Plante long ol pikinini  mo ol smol bubu blong hem, olgeta tu oli kam Witnes. Yes, moa long 60 memba blong famle blong woman ya oli ol Witnes. Be hem i neva akseptem trutok blong Baebol. Naoia, hem i rere blong kam wan man blong Jeova. !Mi glad tumas se smol grup blong ol Witnes blong Jeova long Bahamas we mi luk taem mi mo George mitufala i jes kamtru, naoia i gru bitim 1, 400 man!

Samtaem ol man oli askem mi, se mi no harem nogud we mi no gat pikinini. I tru se hem i wan blesing blong gat pikinini. Be, lav we ol pikinini blong mi long saed blong spirit, mo ol smol bubu blong mi oli soemaot long mi, i bitim lav we ol pikinini oli stap soem long ol stret papa mama blong olgeta. Tru tumas, olgeta we oli “mekem ol gudfala fasin” mo oli ‘kam rij long ol gudfala fasin’ oli moa glad bitim enikaen man. (1 Timoti 6:​18) Taswe mi stap bisi oltaem long wok blong prij kasem mak we mi naf blong kasem.

Wan dei, taem mi stap long ofis blong dentis, wan yangfala woman i kam talem long mi se, “Yu no save mi, be mi mi save yu, mo mi wantem talem long yu se mi lavem yu.” Ale, hem i tokbaot olsem wanem hem i faenem trutok blong Baebol mo i talem se hem i glad se ol misinari oli bin kam long Bahamas.

Long wan narafala taem, taem mi kambak long holide, mi faenem sam flaoa long doa blong rum we mi stap long hem long branj ofis blong ol Witnes blong Jeova long Nassau. Wetem flaoa ya, i gat wan not i stap we i talem se, “Mifala i glad se yu gat wan haos.” !Mi talem bigfala tangkiu long Jeova, mo samting ya i mekem se mi lavem Jeova tumas, from we Tok blong hem, ogenaesesen, mo spirit blong hem i wokem ol man we oli rili gat kaen fasin! Yes, oltaem Jeova i stap yusum ol man raonabaot long yumi blong givhan long yumi.

Fulap Long Fasin Tangkiu

Bifo mo naoia, laef blong mi i no isi oltaem. Be i gat plante samting we mi talem bigfala tangkiu long God from. Hemia ol samting olsem, glad we i kamaot from wok blong prij, lav mo fasin kaen blong plante Kristin brata sista, lav mo fasin kea long ogenaesesen blong Jeova, ol naesfala trutok long Baebol, hop blong laef wetem olgeta we bambae oli laef bakegen, mo ol memori blong 42 yia we mi mared wetem wan gudfala man blong Jeova. Bifo we mitufala i mared, mi bin prea se bambae mi halpem gud hasban blong mi blong hem i gohed oltaem long fultaem wok blong prij, we hem i laekem tumas. Jeova i kaen tumas, nao i ansarem prea ya. Taswe mi wantem holemstrong long Jeova blong soemaot bigfala tangkiu we mi gat long hem.

Bahamas i wan ples blong ol turis. Oli stap spenem plante taosen U.S. dola blong kam mo haremgud long hot ples ya. From we mi jusum finis blong mekem wok blong Jeova long eni ples we ogenaesesen blong hem i sanem mi long hem, mi gat janis blong go talemaot gud nius blong Kingdom blong God long olgeta ples long ol aelan. Be samting we i moa impoten, hemia se naoia mi kasemsave mo mi tinghae bigwan long lav blong ol gudfala man Bahamas.

Mi talem bigfala tangkiu long God from olgeta we oli bin karem trutok i kam long papa mama blong mi, nao taem mi pikinini, papa mama blong mi i tijim mi blong putum Kingdom blong God fastaem long laef blong mi. Ol yangfala man blong Jeova tede, oli save kasem plante blesing sipos oli go insaed long “doa” ya we i givim plante janis long olgeta blong mekem moa long wok blong prij. (1 Korin 16:⁠9) Bambae yu haremgud tumas sipos yu yusum laef blong yu blong givim ona long God ya we i “hae moa, i winim ol narafala god,” hemia Jeova.​—⁠Dutronome 10⁠:17; Daniel 2:​47.

[Tok blong pija long pej 24]

Prij long taon long Victoria, B.C., long 1944

[Tok blong pija long pej 24]

Mi mo George i joen long Gilead Skul long 1946

[Tok blong pija long pej 25]

Mi mo George long fored blong misinari haos long Nassau, Bahamas, long 1955

[Tok blong pija long pej 26]

Haos blong ol misinari long Deadman’s Cay, mitufala i wok long ples ya long 1961-1972