Ol Samting We Oli Stap Spolem Ol Tri

LONG taem blong Baebol, ol man oli luk ol tri olsem ol samting we oli sas tumas. Eksampol, taem Ebraham i mekem kontrak blong pem wan pis graon blong berem gudfala waef blong hem, Sera, ol tri oli stap insaed long kontrak ya.​—⁠Jenesis 23⁠:​15-​18.

Long sem fasin tede, ol man oli lukluk ol tri olsem we oli sas tumas, mo from samting ya plante grup raon long wol oli wokhad blong protektem ol bus. Wan buk (State of the World 1998) i talem se: “Fulap man we oli laef long ol kantri we i kolkol long not blong wol, oli wari from ol bus we i stap long ol kantri we i hot. Be oli no luksave se ol bus blong prapa kantri blong olgeta, oli no plante tumas mo oli stap long denja we ol samting i save spolem olgeta isi nomo, i bitim ol narafala bus.” ?Wanem i stap spolem ol bigfala bus we oli stap long ol kantri long not blong Yurop mo Not Amerika? Plante man oli talem se wok blong katemdaon fulap tri i stap spolem ol bus. Be i gat sam narafala samting bakegen we oli stap spolem ol tri, be long fasin we i no kliagud. ?Wanem ol samting ya? Win we i doti mo ren we i foldaon we i karem wetem hem ol doti blong win. Ol doti ya oli save mekem we sloslou ol tri oli no moa strong, nao i isi nomo blong ol nogud sik mo bebet i spolem olgeta.

Blong plante yia, ol man we oli mekem wok blong lukaotgud long ol samting raonabaot long yumi oli givim woning se yumi nidim blong protektem fasin ya we ol tri oli dipen long olgeta bakegen blong oli save laef. Long ol yia 1980, ol sayentis long Jemani oli mekem wan stadi long ol nogud samting we doti long win mo ren i mekem long ol samting raonabaot long yumi. Nao oli talem se: ‘Sipos yumi no mekem wan samting naoia, long yia 2000, bambae ol man oli save lukluk ol bigfala bus long ol olfala foto mo sinema nomo.’ Yumi glad tumas long paoa we wol i gat blong mekem hem wan i kamgud bakegen, taswe trabol ya we ol sayentis oli bin tokbaot i no spolem wol ya fulwan yet.

Be, i no longtaem, bambae God nao i mekem bigfala wok blong sevem ol laef samting long wol. ‘[Hem i] sanem ren i aot long skae i kam, i wasem ol hil’ mo i ‘mekem gras i gru blong ol anamol oli kakae, mo hem i mekem ol samting we man i save planem. From samting ya, man i save wokem ol garen blong hem.’ Mo hem i promes blong “spolem ol man ya we oli stap spolem wol.” (Ol Sam 104⁠:​13,14; Revelesen 11⁠:18) !Bambae laef i nambawan tumas taem ol man oli save stap long wan wol we i neva gat doti long win mo doti long ren bakegen!​—⁠Ol Sam 37⁠:​9-​11.