Trenemgud Tingting We i Save Jajem Yu

Ol pasenja mo kru we oli stap long Air New Zealand Flight 901 blong go long Antaktika, oli sua se nambawan dei ya we i stap fored long olgeta, bambae oli no save fogetem. Oli rere blong tekem plante foto. Taem plen ya DC-10 i stat blong foldaon long Antaktika, ol man ya oli glad tumas. Sno i kavremap evri ples, mo pija we oli save lukluk, tru long windo blong plen, i naes we i naes.

KAPTEN blong plen we i paelot 15 yia finis, i pasem bitim 11,000 aoa we hem i bin flae long plen. Jes bifo we plen i flae, hem i makem long kompiuta blong plen, rod we bambae plen i folem. Be wan samting we hem i no bin save long hem, se ol namba we oli givim long hem blong makem rod ya, oli rong. Taem plen ya DC-10 i stap flae 600 mita hae tru long klaod, hem i sperem wan saed blong Bigfala Hil ya Erebus, mo ol 257 man we oli stap long plen ya oli ded evriwan.

Ol plen tede oli dipen long kompiuta blong lidim olgeta. Ol man tu, olsem ol plen, oli gat wan samting blong lidim olgeta long laef evri dei. Hemia tingting we i save jajem olgeta. Nogud aksiden ya blong Flight 901 i save tijim sam impoten lesen long yumi long saed blong tingting we i save jajem yumi. Eksampol, blong wan plen i sef blong flae, spesel mesin ya we i soemaot stret ples we plen i stap long hem mo rod we hem i folem, i mas wokgud. Mo paelot i nidim stret save blong lidim hem. Long sem fasin, yumi tu, yumi nidim se tingting we i save jajem yumi i wokgud, olsem nao, yumi stap gud long saed blong spirit, fasin, mo bodi. Mo tu, blong lidim tingting ya, yumi nidim stret save long saed blong samting we i gud mo samting we i nogud.

Sore tumas, ol man long wol tede oli no gat stret save, no oli no wantem folem stret save ya long laef blong olgeta. Wan tija long Amerika i talem se: “Tede, plante pikinini we oli skul long Yunaeted Stet, oli no save rid, raet, mo oli no save weples long wol Franis i stap. Mo tu, oli no save jusumaot wanem fasin i gud mo wanem fasin i nogud. Taswe, antap long problem ya we pikinini i no save rid mo ademap ol namba, ol tija oli mas dil wetem problem ya we pikinini i no save luksave wanem fasin i gud mo wanem fasin i nogud.” Tija ya i gohed i talem se: “Tingting blong ol yangfala tede i no klia nating. Traem askem long wan yangfala sipos i gat sam fasin we oli ‘gud mo sam we oli nogud,’ bambae yu luk we tingting blong hem i fasfas, hem i no save olsem wanem blong ansa long kwestin ya, bambae hem i seksek, mo i fraet. . . . Taem hem i go long haeskul, bambae tingting blong hem i fasfas moa, i no save kam klia.”

Wan samting we i mekem tingting i fasfas, hemia bilif we fulap man oli gat se oli jajem wanem fasin i gud folem wanem we olgeta wanwan oli wantem, no folem ol kastom long ples blong olgeta. !Be, tingbaot wanem i save hapen sipos wan paelot i no folem ol laet long graon we ol man oli putum longtaem finis blong lidim plen, be hem i folem enikaen laet, ol laet we oli muvmuf olbaot no wan laet we sloslou i lus olgeta! Ating bambae i gat plante aksiden, olsem hemia we plen i sperem wan saed blong Bigfala Hil ya Erebus. Long sem fasin, wol ya tede i fulap long trabol mo ded, from we plante man oli lego ol gudfala rul we oli save long olgeta longtaem finis. Plante famle oli seraot from we papa mama, tufala i no stap tru long tufala. Mo plante milian man oli safa from sik ya AIDS no wan narafala nogud sik long saed blong seks.

Tingting ya we ol man wanwan oli jajem wanem fasin i gud mo wanem fasin i nogud, maet i luk olsem se i waes. Be, ol man we oli folem tingting ya oli olsem ol man Nineve, “we oli no save wanem i gud mo wanem i nogud.” Mo oli olsem ol man Isrel we oli bin lego trufala wosip, nao oli talem se ‘ol fasin we oli nogud, oli gud.’​—⁠Jona 4⁠:11; Aesea 5⁠:⁠20.

?Taswe, weples nao yumi save faenem ol klia loa mo rul we oli save trenem tingting we i jajem yumi, mo mekem se i lidim gud yumi? Plante milian man oli faenem ol rul ya long Baebol. Baebol i tijim yumi long ol fasin we oli gud. Hem i tijim yumi se wok i wan samting we i mekem i gud long yumi. Hem i tokbaot olsem wanem blong tijimgud pikinini, mo  stret rod blong wosip long God. Baebol i tokbaot olgeta samting we oli impoten, i no mestem wan samting. (2 Timoti 3⁠:16) Long ol handred yia we oli pas, ol man oli luk se oli save trastem Baebol fulwan. Ol gudfala rul blong Baebol oli stret long laef blong olgeta man, from we Man we i Wokem yumi, we i hae olgeta, hem nao i stanemap ol rul ya. Taswe, yumi no save yusum eskius ya se yumi no save wanem fasin i gud mo wanem fasin i nogud.

Be tede bitim olgeta taem bifo, i gat plante samting blong spolem tingting ya we i save jajem yu, blong hem i no moa wokgud. ?Olsem wanem samting ya i save hapen? ?Mo yu save mekem wanem blong holem tingting ya i stap gud? Fastaem, i gud blong kasem save hu nao i stamba blong trabol ya mo ol trik we hem i yusum blong spolem tingting ya. Bambae yumi tokbaot samting ya long haf we i kamaot biaen.