?I Gat Wan ‘Jos Nomo We i Tru’?

“I GAT wan Kraes nomo, mo long sem fasin i gat wan bodi blong Kraes nomo, mo wan Woman nomo we bambae i mared long Kraes: hemia ‘Katolik Jos we i kasem paoa blong hem long ol aposol.’ ”​—Dominus Iesus.

Hemia nao toktok we wan kadinol blong Katolik Jos, nem blong hem Joseph Ratzinger, i talem blong soemaot tijing blong jos blong hem se i gat wan jos nomo we i tru. Hem i talem se jos ya “we hem nomo i Jos blong Kraes, hemia Katolik Jos.”

“Oli No Ol Prapa Jos”

Pop John Paul 2 i strong blong talem se, ol tok we oli raetem long deklaresen ya we oli kolem Dominus Iesus, i “no min se [Katolik Jos] i flas, no i no gat respek long ol narafala jos.” Nating se i olsem, ol lida blong ol Protestan jos oli tok strong agensem deklaresen ya. Eksampol, Presbiterian Jos i mekem wan Jenerol Asembli blong olgeta long Belfast, Not Aealan, long Jun 2001. Long miting ya, wan pasta i talem se deklaresen ya i kamaot nomo long tingting blong “wan grup blong man insaed long Katolik Jos we oli gat paoa . . . [mo] we oli fraet tumas long fasin ya we Namba Tu Kaonsel blong Vatikan i statem, hemia fasin blong lesin long ol niufala tingting.”

Robin Eames, we i ajbisop blong Jos blong Aealan, i talem se bambae hem i “harem nogud tumas” sipos deklaresen ya i “karembak tingting [we Katolik Jos] i bin holem bifo long Namba Tu Kaonsel blong Vatikan.” Tingting we Vatikan i gat bifo hemia se, ol jos we oli sakemaot ol tijing blong Katolik “oli no ol prapa Jos.” Long saed ya Masta Eames i talem se: “Long lukluk blong mi, tingting ya i daonem ol narafala [jos].”

?From wanem Katolik Jos i stanemap deklaresen ya, Dominus Iesus? I luk olsem se olgeta we oli lidim Katolik jos oli trabol from tingting ya we i stap kam antap nao, se man i fri blong jusum wanem bilif no skul we hem i harem se i stret long tingting blong hem. Niuspepa ya The Irish Times i talem se: “Ol defdefren tijing we oli stat blong kamaot​—olsem [tijing ya] se evri skul oli gud, i no gat wan we i moa gud long narawan, . . . i mekem Kadinol Ratzinger i wari tumas.” I luk olsem se tingting ya nao i pusum hem blong talem se i gat wan jos nomo we i tru.

?I Rili Impoten Blong Tingbaot Se Yumi Blong Wanem Jos?

Sam man oli ting se, “evri man i fri blong jusum wanem bilif no skul i stret long tingting blong hem” mo i oraet blong gat “ol defdefren bilif.” Oli se, tingting ya i moa stret mo i save pulum moa man i bitim bilif se i gat wan trufala skul nomo. Yes, long tingting blong olgeta, i stap long ol man wanwan blong jusum skul we oli laekem. Oli se ‘i no rili impoten blong tingbaot se yu yu blong wanem skul.’

 Maet i luk olsem se tingting ya i stret from we i no jajem man​—nating se tingting ya nao i mekem se ol skul oli seraot long plante handred smosmol skul olbaot. Plante man oli talem se, ‘Olgeta defdefren skul ya we oli stanap, i wan gudfala samting we i soemaot se wanwan man i stap yusum fasin fri blong hem blong jus.’ Be, Steve Bruce, wan man blong raetem buk, i talem se “fasin ya blong letem wanwan man i jusum skul blong hem” i soem stret se ol “man oli no moa tinghae long skul.”​—A House Divided: Protestantism, Schism, and Secularization.

?Olsem wanem nao? ?Weswan tingting i stret? ?I tru se i gat wan trufala skul nomo? ?Katolik Jos nao hem i trufala skul? ?God i agri long ol narafala skul? From we ol kwestin ya oli joen wetem fasin fren we yumi gat wetem Bigman we i Wokem yumi, i stret we yumi faenemaot tingting blong hem. ?Olsem wanem yumi save mekem samting ya? Yumi mas lukluk insaed long Tok blong God, Baebol. (Ol Wok 17:11; 2 Timoti 3:​16, 17) Bambae yumi luk wanem we Baebol i talem long saed blong tingting ya se i gat wan skul nomo we i tru.