“Blong Leftemap Nem Blong Jeova”

RAON long wol, ol man oli laekem Wajtaoa mo Wekap! from ol samting we oli tokbaot long saed blong spirit mo from ol save we oli givim long man. Long Franis, wan woman we i laekem ridim ol magasin ya, i raetem leta ya se:

“Mi mi wan yangfala woman Afrika, we mi no skul gud. I no longtaem i pas, mi stat ridim ol magasin blong yufala. Ol samting we i stap insaed, oli pulum tingting blong mi, nao mi faenemaot se i impoten tumas blong rid. Tangkiu long yufala, from we naoia mi kam moa gud long fasin blong toktok blong mi, mo mi save raetem wan leta we i no gat tumas mastik long hem.

“Mi sapraes we yufala i tokbaot plante samting long saed blong ol man, wol, mo God ya we i Wokem Olgeta samting. Ol toktok we i stap insaed long ol magasin ya oli isi blong kasem save mo oli mekem man we i ridim i wantem gohed moa blong ridim bakegen mo bakegen. Yumi no save faenem wan man we i naf blong tijim olkaen man wetem ol sem toktok nomo.

“Mi mi sapraes tumas blong luk we yufala i no mekem olgeta samting ya blong winim mane long hem, be yufala i mekem blong leftemap nem blong Jeova. Mi save we Jeova i stap yusum yufala, mo mi tangkiu from. Mi mi wantem we God i gohed blong givim paoa long yufala blong yufala i gohed blong tijim ol man.”

Tede, ol Witnes blong Jeova oli gohed blong mekem wok ya blong tijim man long Baebol long 235 kantri. Oli prentem Wajtaoa long 148 lanwis mo Wekap! long 87 lanwis. Oli no mekem ol magasin ya blong leftemap wan man. Ol advaes blong Baebol mo ol infomesen we oli stret long taem blong yumi, we yumi faenem insaed long ol magasin ya, oli blong givim ona long God ya we i Wokem Olgeta samting, we i talem se: “Mi, Jeova, mi mi. God ya we i stap tijim yufala blong karem gudfala frut long laef blong yufala.” (Aesea. 48:​17, NW ) Sipos yu ridim Baebol evri dei wetem ol magasin ya we oli givhan long yumi blong stadi Baebol, samting ya bambae i save halpem yu.