Ol Man Oli Mekem i Nogud Long Olgeta Be Oli Haremgud Yet
Ol Man Oli Mekem i Nogud Long Olgeta Be Oli Haremgud Yet
“Yufala we ol man oli stap spolem nem blong yufala, mo oli stap mekem i nogud long yufala, mo oli stap giaman, oli stap talem ol rabis tok agens long yufala from we yufala i man blong mi, yufala i save harem gud.”—MATIU 5:11.
1. ?Jisas i talem wanem long ol man blong hem long saed blong fasin blong harem gud mo trabol we ol man bambae oli mekem long olgeta?
TAEM Jisas i sanem ol aposol blong hem oli go talemaot Kingdom, hem i givim woning long olgeta se ol man bambae oli agensem olgeta. Hem i se: “Bambae olgeta man oli no laekem yufala nating, oli agens long yufala, from we yufala i holem nem blong mi.” (Matiu 10:5-18, 22) Be bifo long taem ya, hem i bin givim Bigfala Toktok blong hem antap long Hil, nao i talem long ol aposol mo sam narafala we oli stap, se fasin agens ya i no nid blong spolem glad we i fulap long hat blong olgeta. !Yes, Jisas i go moa, i talem se ol Kristin oli save harem gud taem ol man oli mekem i nogud long olgeta! ?Olsem wanem trabol we ol man oli mekem agens long ol Kristin i save mekem olgeta oli harem gud?
Oli Kasem Trabol From We Oli Mekem i Stret
2. ?Jisas mo aposol Pita tufala i tokbaot wanem kaen fasin agens we yumi save harem gud long hem?
2 Namba eit fasin we Jisas i talem se i save mekem man i harem gud, hemia: ‘Yufala we oli stap ronem yufala from we yufala i stap mekem ol stret samting, yufala i save harem gud, From we yufala i man blong Kingdom blong heven.’ (Matiu 5:10, Gud Nyus Bilong Jisas Krais) Sipos ol man oli agensem yumi from wan nogud samting we yumi mekem, hemia i no wan samting blong leftemap yumi. Aposol Pita i raetem se: “Sipos yufala i mekem i no stret, mo oli givim panis long yufala, nao yufala i mekem tingting blong yufala i longfala blong karem panis ya, fasin ya i no samting blong leftemap yufala. Be sipos yufala i mekem i stret nomo, mo oli givim panis long yufala, nao yufala i mekem tingting blong yufala i longfala blong karem panis ya, God bambae i blesem yufala from.” Biaen bakegen hem i talem se: “Man we i kilim man, no i stil no i brekem loa, no i stap go insaed long ol bisnes blong narafala man, hem bambae i kasem panis. Be i no stret sipos wan long yufala i kasem panis from ol fasin olsem. Be sipos yufala i stap kasem panis from we yufala i man blong Kraes, hemia i no samting blong sem. Yufala i mas presem God from we nem blong Kraes i stap long yufala olsem.” (1 Pita 2:20; 4:15, 16) Folem tok ya blong Jisas, sipos ol man oli agensem yumi from we yumi mekem i stret, nao yumi stanap strong, ale yumi save harem gud.
3. (a) ?I minim wanem se ol man oli mekem trabol long yumi from stret fasin? (b) ?Fasin agens i mekem wanem long ol faswan Kristin?
3 Wan man blong stret fasin i mekem samting we God i wantem, mo i obei long ol loa blong Hem. Taswe taem ol man oli agensem yumi from we yumi mekem i stret, i min se oli mekem trabol long yumi from we yumi no wantem lego ol loa mo rul blong God. Ol lida blong ol man Jiu oli agensem ol aposol from we oli no wantem stop blong talemaot nem blong Jisas. (Ol Wok 4:18-20; 5:27-29, 40) ?Olsem wanem? ?Ol aposol oli harem nogud? ?Oli no moa gohed blong prij? !Si oli gohed strong! “Ol aposol oli goaot long Kaonsel, nao oli stap harem gud tumas from we God i luk olgeta olsem we oli naf blong kasem sem long fes blong ol man, from nem blong Jisas. Mo evri dei, long haos blong God, mo insaed long ol haos blong ol man, oli stap tijim ol man, mo oli stap talemaot gud nius ya blong Jisas, se hem i Mesaea.” (Ol Wok 5:41, 42) Fasin agens i mekem ol aposol oli glad, mo i mekem olgeta oli strong moa blong prij. Biaen bakegen, ol man Rom tu oli mekem i nogud long ol faswan Kristin ya from we oli no wantem mekem wosip long hed gavman blong Rom.
4. ?From wanem samfala oli mekem i nogud long ol Kristin?
4 Tede tu, ol man oli mekem i nogud long ol Witnes blong Jeova from we ol Witnes oli no wantem stop blong talemaot “gud nius ya blong Kingdom.” (Matiu 24:14, NW ) Taem gavman i putum tabu long ol Kristin miting blong olgeta, oli no lego fasin ya blong joen wanples. Hemia wan oda blong Baebol, mo oli rere blong safa blong folem oda ya. (Hibrus 10:24, 25) Plante man oli mekem i nogud long ol Kristin ya from we oli no joen long wol, mo from we oli no tekem blad. (Jon 17:14; Ol Wok 15:28, 29) Nating se i olsem, ol man blong God tede oli stanap strong long ol stret fasin ya, mo from samting ya, oli gat pis long tingting blong olgeta mo oli harem gud.—1 Pita 3:14.
Spolem Nem Blong Ol Man Blong Kraes
5. ?Wanem bigfala risen from wanem ol man oli mekem i nogud long ol man blong Jeova tede?
5 Namba naen fasin blong mekem man i harem gud we Jisas i tokbaot long Bigfala Toktok blong hem antap long Hil, hem tu i joen wetem trabol we ol man oli mekem long ol Kristin. Hem i se: “Yufala we ol man oli stap spolem nem blong yufala, mo oli stap mekem i nogud long yufala, mo oli stap giaman, oli stap talem ol rabis tok agens long yufala from we yufala i man blong mi, yufala i save harem gud.” (Matiu 5:11) Bigfala risen from wanem ol man oli mekem i nogud long ol man blong Jeova, hemia from we oli no joen long ol fasin blong wol ya. Jisas i talem long ol disaepol blong hem se: “Sipos yufala i man blong wol ya, bambae ol man blong wol ya oli save lavem yufala, from we yufala i man blong wol ya. Be yufala i no man blong wol ya, mi mi jusumaot yufala finis, mo mi tekemaot yufala long ol man blong wol ya. Taswe ol man blong wol ya oli no laekem yufala, oli agens long yufala.” (Jon 15:19) Aposol Pita i talem samting we i klosap sem mak, i se: “Olgeta ya oli sapraes tumas, from we yufala i no moa go joen wetem olgeta long ol fasin blong olgeta we oli no tingbaot wan samting, oli jes gohed nomo. Mo taem oli luk we yufala i no moa go joen wetem olgeta, oli tok nogud long yufala.”—1 Pita 4:4.
6. (a) ?From wanem ol man oli mekem i nogud long smol grup blong ol tabu Kristin wetem ol fren blong olgeta? (b) ?Ol trabol ya i spolem glad blong yumi?
6 Yumi luk finis se ol man oli mekem i nogud long ol faswan Kristin from we oli no wantem stop blong talemaot nem blong Jisas. Kraes i bin givim wok long ol man blong hem se: “Bambae yufala i mas go talemaot mi . . . gogo yufala i finisim olgeta ples long wol.” (Ol Wok 1:8) Smol grup blong ol tabu brata blong Kraes we oli stap yet long wol, wetem “bigfala kampani” blong ol gudfala fren blong olgeta, oli wok strong blong obei long oda ya. (Revelesen 7:9, NW ) Taswe Setan i stap faet ‘agens long ol pikinini [blong “woman ya” we i minim ogenaesesen blong God long heven], hemia olgeta ya we oli stap obei long ol tok blong God’ mo we oli witnes long saed blong Jisas. (Revelesen 12:9, 17) Yumi ol Witnes blong Jeova, yumi witnes long saed blong Jisas se hem i rul olsem King finis long Kingdom gavman blong hem long heven. Mo tu, yumi witnes se Kingdom ya bambae i spolem ol gavman blong man long wol, blong mekem rod blong niufala wol blong God we stret fasin nomo bambae i stap long hem. (Daniel 2:44; 2 Pita 3:13) From we yumi witnes olsem, ol man oli spolem nem blong yumi mo oli mekem i nogud long yumi. Be nating, yumi harem gud blong kasem trabol from nem blong Kraes.—1 Pita 4:14.
7, 8. ?Wanem giaman toktok we ol man oli mekem agens long ol faswan Kristin?
7 Jisas i talem se ol disaepol blong hem oli mas harem gud, nating se ol man “oli stap giaman, oli stap talem ol rabis tok” agens long olgeta from we oli man blong Kraes. (Matiu 5:11) Mo i tru, ol faswan Kristin oli harem gud taem oli kasem trabol. Taem aposol Pol i stap kalabus long Rom long ol yia 59 K.T. kasem 61 K.T., ol lida blong ol man Jiu oli tokbaot ol Kristin se: “Olbaot long evri ples, ol man oli stap tok nogud long grup ya.” (Ol Wok 28:22) Samfala oli tok agens long Pol mo Saelas se tufala i stap “mekem tumas trabol long olgeta ples,” tufala i stap “brekem ol loa blong Sisa.”—Ol Wok 17:6, 7.
8 Man blong stadi long histri, K. S. Latourette, i tokbaot ol Kristin long taem ya we Rom i rul, i se: “Ol man oli talem ol defdefren tok agens long ol Kristin. From we ol Kristin oli no joen long ol hiten seremoni, ol man oli talem se oli no bilif long God nating. From we ol Kristin oli no joen wetem ol man blong wol blong mekem ol hiten lafet mo ol pleplei long pablik ples . . . ol man oli tok agens long olgeta se oli no laekem ol narafala man. . . . Oli talem tu se ol Kristin man mo woman, oli kam wanples long naet . . . blong mekem rabis fasin long saed blong seks. . . . Taem ol Kristin oli joen wetem ol narafala Kristin nomo blong mekem lafet [blong makem ded blong Kraes], ol man oli mekem toktok se ol Kristin ya oli stap kilim pikinini blong mekem sakrefaes mo oli stap kakae blad mo mit blong hem.” Mo tu, from we ol faswan Kristin oli no mekem wosip long hed gavman blong Rom, ol man oli talem se oli agensem gavman.
9. ?Ol faswan Kristin oli mekem wanem taem ol man oli talem ol giaman toktok agens long olgeta? ?Mo olsem wanem long taem blong yumi?
9 Be ol giaman toktok ya i no mekem ol faswan Kristin oli harem nogud nao oli lego wok ya blong talemaot gud nius blong Kingdom, nogat. Long yia 60-61 K.T., Pol i talem se “gud nius . . . i stap goaot moa yet long olgeta ples long wol, i stap mekem i gud long olgeta man,” mo se “ol man oli talemaot finis [gud nius ya] long olgeta man long wol.” (Kolosi 1:5, 6, 23) Sem mak tede, ol man oli talem ol giaman toktok agens long ol Witnes olsem oli bin mekem agens long ol Kristin long faswan handred yia. Be tede tu wok blong talemaot Kingdom i stap goaot moa long olgeta ples, mo olgeta we oli stap talemaot gud nius ya oli harem gud tumas.
Harem Gud Olsem Ol Profet Bifo
10, 11. (a) ?Jisas i talem wanem blong finisim toktok blong hem long saed blong namba naen samting we i save mekem man i harem gud? (b) ?From wanem ol man oli mekem i nogud long ol profet bifo? Tokbaot sam long ol profet ya.
10 Jisas i finisim toktok blong hem long saed blong namba naen samting we i save mekem man i harem gud, i se: “Yufala i mas harem gud. . . . Ol profet bifo, ol man oli mekem i nogud long olgeta long sem fasin ya nomo.” (Matiu 5:12) Ol stronghed man Isrel oli no lesin long ol profet we Jeova i sanem olgeta blong givim woning long olgeta, mo plante taem oli girap agens long olgeta. (Jeremaea 7:25, 26) Aposol Pol i tokbaot samting ya i se: “Mi mi no save gohed moa. Mi mi no gat taem blong tokbaot . . . [ol profet we] oli stap bilif strong long God . . . [we] ol man oli laf nogud long olgeta, mo oli wipim olgeta. Mo sam long olgeta, ol man oli fasem olgeta long jen, oli putum olgeta long kalabus.”—Hibrus 11:32-38.
11 Taem rabis King Ehab mo woman blong hem Jesebel i stap rul, tufala i kilim i ded plante profet blong Jeova. (1 King 18:4, 13; 19:10) Profet Jeremaea, oli fasemtaet ol han mo leg blong hem long samting olsem ol bigfala hankaf, mo biaen bakegen, oli sakem hem i go long wan wel we i fulap long sofmad. (Jeremaea 20:1, 2; 38:6) Profet Daniel, oli sakem hem i go long wan bigfala hol we i fulap long ol laeon. (Daniel 6:16, 17) Olgeta profet ya we oli laef bifo long taem blong Jisas, ol man oli mekem i nogud long olgeta from we oli leftemap klin wosip blong Jeova. Plante profet, ol lida blong ol man Jiu oli mekem i nogud long olgeta. Taswe Jisas i singaot ol tija blong Loa mo ol Farisi se oli ‘laen blong ol olfala we oli kilim ol profet ya.’—Matiu 23:31.
12. ?From wanem yumi ol Witnes blong Jeova yumi luk se i wan ona blong kasem trabol olsem ol profet bifo?
12 Tede tu, ol man oli mekem i nogud long yumi ol Witnes blong Jeova, from we yumi strong blong talemaot gud nius blong Kingdom. Ol enemi blong yumi oli tok agens long yumi se yumi “fosem ol man blong jenisim skul blong olgeta.” Be yumi save se ol man oli bin talem semfala tok agens long ol gudfala man blong Jeova bifo tu. (Jeremaea 11:21; 20:8, 11) Hem i wan ona blong safa from semfala samting we ol gudfala profet bifo oli bin safa from. Disaepol Jemes i raetem se: “Ol brata mo sista. I gud yufala i stap tingbaot ol profet ya bifo we oli stap tok long nem blong Hae God. Ol man oli mekem olgeta oli harem nogud tumas, be tingting blong olgeta i no foldaon. Long fasin ya, olgeta oli soemaot wan gudfala rod long yumi. Mo from we olgeta oli stap stanap strong longtaem, yumi talem se God i mekem olgeta oli harem gud.”—Jemes 5:10, 11.
Ol Bigfala Risen Blong Harem Gud
13. (a) ?From wanem, tingting blong yumi i no foldaon taem ol man oli mekem i nogud long yumi? (b) ?Wanem i mekem se yumi save stanap strong? ?Mo samting ya i pruvum wanem?
13 Tingting blong yumi i no foldaon taem ol man oli agensem yumi. Defren olgeta, yumi harem gud from we yumi stap folem sem rod we ol profet, ol faswan Kristin, mo Jisas Kraes hem wan i bin folem. (1 Pita 2:21) Yumi harem gud tumas long ol tok blong Baebol, olsem tok ya blong aposol Pita: “Ol fren. I nogud yufala i sapraes long ol strong samting ya we oli kam blong traem bilif blong yufala. Ol samting olsem, i no yufala nomo i kasem, be plante narafala Kristin man tu oli kasem. Sipos ol man oli tok nogud long yufala from we yufala i man blong Kraes, yufala i save harem gud. Hemia i min se Spirit ya blong heven, we i Spirit blong God, hem i kamdaon finis, i stap long yufala.” (1 Pita 4:12, 14) Long ol trabol we i kasem yumi finis, yumi luksave se yumi save stanap strong nomo from we spirit blong Jeova i stap long yumi, mo spirit ya i stap mekem yumi strong. Paoa we tabu spirit i givim long yumi i pruvum se Jeova i stap blesem yumi, mo from samting ya, yumi harem gud tumas.—Ol Sam 5:12; Filipae 1:27-29.
14. ?Wanem sam risen blong harem gud taem ol man oli agensem yumi from stret fasin?
14 Taem ol man oli agensem yumi from stret fasin, samting ya i pruvum se yumi stap laef olsem ol trufala Kristin we oli fasgud long God. Hemia wan narafala risen blong harem gud. Aposol Pol i raetem se: “Yu yu save we olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save mekem i nogud tumas long olgeta.” (2 Timoti 3:12) Yumi harem gud tumas blong save se taem yumi kasem trabol mo yumi stanap strong, yumi stap ansa long tok we Setan i bin sakem, se ol man blong Jeova oli mekem wok blong Hem nomo from we Hem i stap mekem i gud long olgeta. (Job 1:9-11; 2:3, 4) Yumi glad tumas we yumi save givhan blong mekem stret rul blong Jeova i win, nating se samting we yumi mekem i smol nomo.—Ol Proveb 27:11.
Glad From Blesing We Bambae Yumi Kasem
15, 16. (a) ?Jisas i talem wanem risen bakegen blong ‘harem gud mo glad’? (b) ?Wanem blesing i stap wet long ol tabu Kristin long heven? ?Mo wanem blesing we ol fren blong olgeta, “ol narafala sipsip,” bambae oli kasem?
15 I gat wan moa risen blong glad taem ol man oli talemaot ol giaman tok mo mekem i nogud long yumi, olsem oli bin mekem long ol profet bifo. Jisas i talem risen ya long en blong namba naen samting we i save mekem yumi harem gud, i se: “Yufala i mas harem gud yufala i glad, from we i gat bigfala pei [“blesing,” NW ] blong yufala i stap long heven. Ol profet bifo, ol man oli mekem i nogud long olgeta long sem fasin ya nomo.” (Matiu 5:12) Aposol Pol i raetem se: “Ol man we oli stap mekem sin, pei blong olgeta, bambae oli ded from, be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.” (Rom 6:23) Yes, ‘bigfala blesing ya’ hemia laef. Laef i no wan pei we yumi kasem from wok we yumi mekem, nogat. Hem i wan presen we God i givim nomo. Jisas i talem se presen ya “i stap long heven,” from we Jeova nao i givim blesing ya.
16 Ol Kristin we tabu spirit i makemaot olgeta, bambae oli kasem ‘praes blong laef,’ hemia laef wetem Kraes long heven, we i no moa gat ded long hem. (Jemes 1:12, 17) “Ol narafala sipsip,” oli stap wet blong kasem laef we i no save finis long paradaes long wol. (Jon 10:16; Revelesen 21:3-5) Tufala grup ya evriwan, tufala i no kasem “blesing” ya olsem wan pei we oli bin wok from, nogat. ‘Gladhat blong Jeova’ we i bigwan tumas, hemia nao samting we i pulum Hem blong givim ‘blesing ya’ long ol tabu Kristin mo “ol narafala sipsip.” From samting ya, aposol Pol i talem se: “Yumi mas talem tangkiu long God from presen ya blong hem we i gud tumas, i bitim mak olgeta, yumi no save makem.”—2 Korin 9:14, 15.
17. ?Taem ol man oli mekem i nogud long yumi, from wanem yumi save harem gud olsem we yumi jamjam from “glad”?
17 Aposol Pol i raetem leta i go long ol Kristin we smoltaem biaen, hed gavman ya Nero i mekem i nogud tumas long olgeta. Pol i talem se: “Taem yumi kasem hadtaem, yumi save glad, from we yumi save we hadtaem i stap mekem yumi strong, nao yumi save mekem tingting blong yumi i longfala. Nao taem yumi mekem tingting blong yumi i longfala, God i save glad long yumi. Mo taem hem i glad long yumi, hemia i save mekem tingting blong yumi i stap moa long hem. Mo taem tingting blong yumi i stap strong long hem, yumi no save harem nogud.” Biaen, hem i talem bakegen se: “From we tingting blong yufala i stap strong long God, oltaem yufala i mas harem gud. Sipos yufala i gat trabol, yufala i mas mekem tingting blong yufala i longfala.” (Rom 5:3-5; 12:12) Nating se yumi putum tingting blong yumi i stap strong long laef long heven no long wol ya, be blesing we bambae yumi kasem from we yumi holemstrong long God taem ol man oli agensem yumi, i bigwan tumas, yumi no naf nating blong kasem blesing olsem. Hop we yumi gat blong laef olwe blong mekem wok blong Papa blong yumi, Jeova, mo blong presem hem aninit long King blong yumi, Jisas Kraes, i mekem yumi glad bitim mak, olsem we yumi jamjam from “glad.”
18. ?Yumi save se olgeta man bambae oli mekem wanem taem en i kam klosap moa? ?Bambae Jeova i mekem wanem?
18 Long sam kantri, ol man oli mekem nogud finis long ol Witnes blong Jeova mo oli stap gohed yet blong mekem olsem. Long profet tok long saed blong en blong rabis fasin blong wol ya, Jisas i givim woning long ol trufala Kristin se: “Bambae olgeta man oli no laekem yufala nating, oli agens long yufala, from we yufala i holem nem blong mi.” (Matiu 24:9) Taem yumi kam klosap moa long en blong wol, Setan bambae i pusum olgeta man blong soemaot se oli no laekem nating ol man blong Jeova. (Esikel 38:10-12, 14-16) Hemia bambae i wan saen se stret taem blong Jeova i kam finis blong hem i tekem aksin. Hem i se: “Bambae mi soemaot long ol man blong olgeta kantri we mi mi tabu mo mi gat olgeta paoa. Nao bambae oli savegud we mi mi Hae God.” (Esikel 38:23) Olsem nao, Jeova bambae i mekem hae nem blong hem i tabu, mo bambae hem i sevem ol man blong hem oli aot long ol trabol we ol man oli mekem long olgeta. From samting ya, “taem ol samting oli kam blong traem bilif blong man, be hem i stap stanap strong, hem i save harem gud.”—Jemes 1:12.
19. ?Taem yumi stap wet long bigfala ‘dei blong Jeova,’ yumi mas mekem wanem?
19 Taem bigfala ‘dei blong Jeova’ i stap kam klosap moa, yumi mas glad tumas we yumi “naf blong kasem sem long fes blong ol man” from nem blong Jisas. (2 Pita 3:10-13; Ol Wok 5:41) Olsem ol faswan Kristin, yumi mas gohed nomo blong ‘tijim ol man, mo blong talemaot gud nius ya blong Jisas, se hem i Mesaea.’ Yumi no mas stop blong talemaot Kingdom gavman blong hem, taem yumi stap wet blong kasem blesing blong laef long niufala wol blong Jeova, we stret fasin nomo bambae i stap long hem.—Ol Wok 5:42; Jemes 5:11.
Tingtingbak
• ?I minim wanem se yumi safa from we yumi mekem i stret?
• ?Fasin agens i mekem wanem long ol faswan Kristin?
• ?From wanem yumi save talem se ol man oli mekem i nogud long ol Witnes blong Jeova olsem oli bin mekem long ol profet bifo?
• ?From wanem yumi save ‘harem gud mo glad’ taem ol man oli agensem yumi?
[Kwestin]
[Tok blong pija long pej 16, 17]
“Yufala we ol man oli stap spolem nem blong yufala, mo oli stap mekem i nogud long yufala, . . . yufala i save harem gud”
[Credit Line]
Group in prison: Chicago Herald-American