Wan Kwestin

?Ol rabis enjel bambae oli stap wea long Taosen Yia Rul blong Kraes?

Baebol i no ansa stret long kwestin ya. Nating se i olsem, yumi save luksave weples ol rabis enjel bambae oli stap, long Taosen Yia Rul blong Kraes.

Aposol Jon i talem wan profet tok long saed blong ol samting we bambae i hapen long stat mo long en blong Taosen Yia Rul blong Kraes, i se: “Nao mi luk wan enjel we i aot long heven i kamdaon. Long han blong hem, hem i stap holem ki blong lokem bigfala hol ya we i godaon we i godaon olgeta, mo i stap holem wan bigfala jen. Nao hem i holem bigfala algita ya, we hemia snek ya blong bifo, we nem blong hem ‘Setan’, no ‘Man we i stap agensem man’. Nao hem i fasem hem long jen ya blong i stap wan taosen yia, mo i sakem hem i go long bigfala hol ya, mo i lokem doa blong hol. Mo hem i putum mak long doa ya blong bambae man i no openem, blong bambae algita ya i no moa giaman long ol man, blong pulum olgeta oli go krangke, gogo wan taosen yia i pas. Taem we wan taosen yia ya i finis, algita ya bambae i fri bakegen, be blong smol taem nomo.” (Revelesen 20:1-3) Ol vas ya oli tokbaot nomo se Setan bambae i stap long bigfala hol, mo se bambae hem i fri bakegen blong smol taem. I tru, ol vas ya oli no tokbaot ol rabis enjel, be taem Baebol i talem se enjel ya we i holem ki blong bigfala hol​—hemia Jisas Kraes we God i givim paoa long hem— i holem Setan mo i sakem hem i go long bigfala hol, i stret nomo blong ting se Hem i sakem ol rabis enjel tu oli go wetem Setan.​—Revelesen 9:11.

Taem Jisas Kraes i kam King long heven long 1914, hem i mekem wan bigfala samting long Setan mo ol rabis enjel. Revelesen 12:7-9 i talem se: “Nao i gat bigfala faet i stat long heven. Mikael wetem ol enjel blong hem oli stap faet agens long bigfala algita ya. Nao bigfala algita ya wetem ol enjel blong hem [ol rabis enjel] oli traem faet agens long Mikael olgeta, be oli lus, mo i no moa gat ples blong olgeta long heven. Bigfala algita ya, hem i snek ya blong bifo we nem blong hem ‘Setan’ no ‘Man we i agensem man’, we i stap giaman long olgeta man long wol, i lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol.” Stat long taem ya kam kasem tede, Setan wetem ol rabis enjel blong hem oli stap raonabaot long wol nomo. Taswe, i stret blong ting se taem Jisas bambae i blokem Setan, blong hem i no moa spolem ol man long wol, bambae Hem i blokem ol rabis enjel blong Setan tu.

Traem tingbaot faswan profet tok blong Baebol. Hem i talem se: “Bambae mi [God] mi mekem we yu [Setan] mo woman ya [ogenaesesen blong Jeova long heven], yutufala i enemi blong yutufala, mo laen blong yu [blong Setan] mo laen blong hem [laen ya Jisas Kraes], tufala i enemi blong tufala. Hem bambae i smasem hed blong yu, mo yu bambae yu smasem bak blong leg blong hem.” (Jenesis 3:15, NW ) Taem we bambae Jisas i smasem hed blong snek, hemia taem we bambae Hem i sakem Setan i go long bigfala hol blong Wan Taosen Yia. Profet tok i gohed i talem se Hemia we i smasem hed blong snek, hem i enemi blong laen blong Setan. Long laen ya blong Setan, i gat ol rabis enjel we yumi no save luk. Taswe, i stret blong talem se taem Jisas i sakem Setan i go long bigfala hol, long semtaem hem i fasem ol rabis enjel mo i sakem olgeta tu. Ol rabis enjel oli fraet long bigfala hol ya from we oli save finis se, olgeta tu bambae oli go long hol ya.​—Luk 8:31, NW.

 ?Be olsem wanem? ?Maet Revelesen 20:1-3 i no tokbaot ol rabis enjel from we maet bambae oli ded long Amageden, wetem haf blong laen blong Setan we i stap long wol ya? Baebol i no talem se samting ya bambae i hapen. Hem i tokbaot taem ya we Setan bambae i ded, i se: “Nao Setan ya we i giaman long olgeta enjel i sakem hem i go long bigfala hol ya blong faea, we i fulap long faea mo salfa nomo, we anamol ya we i nogud, mo giaman profet ya, tufala i stap long hem finis. Nao long ples ya, long dei mo long naet, bambae trifala i stap harem nogud tumas oltaem from faea ya, gogo i no save finis.” (Revelesen 20:10) Anamol ya we i nogud mo giaman profet ya, tufala i minim ol politik paoa, mo tufala i wan haf blong ogenaesesen blong Setan long wol. (Revelesen 13:1, 2, 11-14; 16:13, 14) Bambae tufala i lus long Amageden, taem Kingdom blong God i smasem mo i spolemgud olgeta kingdom blong wol. (Daniel 2:44) Baebol i tokbaot “faea ya we bambae i no save ded samtaem, we oli mekem i rere finis blong Setan wetem ol enjel blong hem.” (Matiu 25:41) Setan wetem ol rabis enjel blong hem bambae oli go long “bigfala hol ya blong faea, we i fulap long faea mo salfa,” hemia semfala hol we anamol ya we i nogud mo giaman profet i stap long hem finis. Hemia i min se long taem ya nao bambae oli lus blong olwe. Sipos haf ya blong ogenaesesen blong Setan we yumi no save luk mo we i gat plante paoa (hemia ol rabis enjel), oli ded long Amageden, ating Baebol i mas talem se ol rabis enjel ya oli stap finis long bigfala hol blong faea wetem anamol we i nogud mo giaman profet. Be Revelesen 20:10 i no talem samting ya. Taswe, yumi sua we ol rabis enjel oli no ded long Amageden.

Baebol i no talem stret se bambae ol rabis enjel oli go long bigfala hol blong wan taosen yia, taswe hem i no talem tu se bambae oli fri long bigfala hol ya bakegen. Nating se i olsem, bambae oli ded olsem Devel Setan. Ol rabis enjel mo Setan tugeta bambae oli fri, mo bambae oli wok wetem Setan blong traem ol man laswan long en blong taosen yia. Biaen, olgeta tu bambae oli go long hol blong faea, mo bambae oli ded blong olwe.​—Revelesen 20:7-9.

Taswe, nating se Revelesen 20:1-3 i tokbaot Setan nomo, se Jisas bambae i holem hem mo i sakem hem i go long bigfala hol blong i no save mekem wan samting, be i stret nomo blong ting se bambae Jisas i fasem ol rabis enjel tu, mo bambae i sakem olgeta oli go long hol wetem Setan. Setan mo ol rabis enjel blong hem tugeta, oli no save blokem stamba tingting blong God. Bambae Jeova i mekem wol ya i kam wan paradaes, mo bambae i mekem ol man oli kam stretgud olgeta, long Taosen Yia Rul blong Kraes.