?Yu Yu Wantem Stap Long Wan Wol We i No Gat Fasin Fraet Long Hem?

“Evri dei yumi ‘wari from we yumi mas lukaot se trabol i no kasem yumi mo . . . yumi harem se yumi no naf blong blokem ol trabol fulwan.’ [Yumi laef olsem] from we yumi no naf blong save wanem kaen . . . denja i stap, we i save kamaot eni taem mo long eni rod we i no gat woning fastaem.’ ”

OL TOKTOK ya oli kamaot las yia long niuspepa ya Newsweek, mo i stap tokbaot filing blong ol man we oli laef tede long wol ya we i stap muvmuf plante. Jisas Kraes i talem se i no longtaem ol filing ya bambae oli kam antap moa. Hem i tokbaot wan taem we ol nesen bambae oli harem nogud tumas, bambae oli no save faenem rod blong stretem ol trabol blong olgeta mo bambae ol man oli ded from fraet mo from we oli stap harem nogud long ol samting we i kam kasem wol ya. Nating se i olsem, yumi no nid blong fraet bigwan mo i nogud yumi harem olsem se i no gat rod blong winim ol trabol ya, from we Jisas i talem se: “Taem ol samting ya oli stat kamtru, yufala i mas stanap stret, yufala i leftemap hed blong yufala, from we bambae i no longtaem, mi bambae mi kam blong sevem yufala, mi mekem yufala i fri.”​—Luk 21:25-28.

Jeova God i tokbaot fasin blong laef blong ol man blong hem long wol ya afta we hem i mekem oli fri i se: “Be olgeta ya, bambae i no moa gat wan samting blong spolem tingting blong olgeta. Bambae olgeta oli no moa wari, oli save stap gud long ol haos blong olgeta, we i no gat samting i save spolem olgeta, laef blong olgeta bambae i stap gohed gud nomo.” (Aesea 32:18, 19) Jeova i talem long profet blong hem Maeka se: “Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.”​—Maeka 4:4.

Hemia wan samting we i defren bigwan long laef blong yumi tede. Ol man bambae oli no moa fraet long denja we i save kamaot enitaem blong spolem olgeta. Yes, bambae oli no moa nid blong wari se trabol i kasem olgeta mo oli no moa harem se oli no naf blong blokem ol trabol. Bambae oli gat pis mo gladtaem we i no gat en blong hem.