Kasem Blesing From Wan Longfala Trip

WAN ripot i kamaot long Demokratik Ripablik blong Kongo long saed blong tu Kristin we tufala i stret sista. Tufala i mekem wan longfala trip i go long ples we i gat faet long hem. Tufala i go long Lisala, blong joen long Distrik Asembli ya “Leftemap Nem Blong God.” Tufala i go long ples ya blong kasem ol tijing long saed blong spirit mo blong joen wetem ol narafala Kristin brata sista long asembli ya, mo tufala i wantem mitim ol elda we oli kam long branj ofis blong ol Witnes blong Jeova long Kinshasa. From we i gat faet long kantri ya, plante yia nao i pas we tufala i no bin luk ol brata blong branj ofis, taswe tufala i wantem tekem janis ya blong mitim olgeta.

Tufala sista ya i aot long taon blong tufala, Basankusu, tufala i pul long kenu blong go long Lisala, hemia wan trip blong samwe 300 kilometa tru long bus mo folem tu reva. Tufala i spenem tri wik long trip ya. Tufala tugeta i prij fultaem, wan i mekem wok ya blong 3 yia finis mo narafala 19 yia. From samting ya, tufala i tekem janis blong talemaot gud nius blong Kingdom taem tufala i stap mekem trip ya. Tufala i spenem samwe 110 aoa blong prij long ol man we tufala i faenem long rod, mo tufala i givimaot 200 traket mo 30 magasin.

Long reva, tufala i mas pul long medel blong ol hipopotamus mo ol krokodael we oli plante long ples ya. !Long naet, tufala i no save pul long reva​—taem tudak i kam, tufala i no moa save luk ol hipopotamus mo ol krokodael! Mo tu, tufala i pastru long plante ples we ol ami oli stap stopem ol man blong jekem olgeta.

Nating se trip ya i longfala mo i mekem tufala sista ya i taed, be tufala i glad tumas blong mekem. Tufala tugeta i haremgud tumas mo gat tangkiu blong stap long asembli long Lisala. Hat blong tufala i glad tumas from trutok, mo taem tufala i joen wetem ol 7,000 brata mo sista long asembli ya, samting ya i rili leftemap tingting blong tufala. Taem asembli i finis, tufala sista ya i mekem sem trip blong gobak long ples blong tufala, mo tufala i luk bakegen ol famle blong tufala we oli stap gud mo oli sef.