Fasin Blong Lesingud Wetem Lav

“TANGKIU blong lesingud long mi.” ?Wan man i bin talem wan tok olsem long yu finis? !Hemia wan gudfala tok! Klosap evri man i laekem taem narafala i lesingud long hem. Fasin ya blong lesingud long narafala i save mekem man we tingting blong hem i foldaon no i gat ol problem long laef, i harem gud bakegen. Taswe fasin ya blong lesingud i save halpem yumi blong mekem i gud long ol man. Insaed long Kristin kongregesen, fasin blong lesingud long narafala wetem lav i wan impoten haf blong fasin ya we yumi “tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin.”​—Hibrus 10:24.

Be plante man oli no gat fasin ya blong lesingud. Oli laekem blong givim advaes, blong tokbaot laef blong olgeta mo blong talemaot tingting blong olgeta long saed blong wan samting be oli no save lesingud long wanem we narafala i wantem talem. Fasin blong lesingud i wan fasin we yumi mas lanem. ?Olsem wanem yumi save lanem blong lesingud long narafala wetem lav?

Wan Impoten Samting

Jeova i “Bigfala Tija” blong yumi. (Aesea 30:​20, NW ) Hem i save tijimgud yumi long saed blong fasin blong lesingud. Tingbaot olsem wanem Jeova i halpem profet Elaeja. Elaeja i fraet long strong tok blong Kwin Jesebel, nao i ronwe i go long draeples mo i prea long God from hem i wantem i ded. Ale wan enjel blong God i toktok long hem. Taem profet Elaeja i eksplenem long Jeova, risen from wanem hem i fraet mo i ronwe, Jeova i lesin long hem mo i soemaot bigfala paoa blong Hem long Elaeja. ?Wanem frut i kamaot from? Elaeja i no moa fraet, nao i gobak blong mekem wok blong hem bakegen. (1 King 19:​2-15) ?From wanem Jeova i tekem taem blong lesingud long ol man blong hem taem oli talemaot ol wari blong olgeta long hem? From we hem i kea long olgeta. (1 Pita 5:7) Hemia nao wan impoten samting we i save halpem man blong lesingud: Fasin blong kea long narafala mo blong soemaot se yumi rili intres long olgeta.

Wan man Bolivia we i mekem wan bigfala sin i glad we narafala i soemaot se i tingbaot hem. Man ya i eksplenem se: “Long taem ya mi harem nogud tumas. Sipos wan brata i no bin tekem taem blong lesingud long mi, ating mi lego Jeova finis. Brata ya i no toktok tumas be mi save se hem i kea from we hem i lesingud long mi mo samting ya i rili leftemap tingting blong mi. Mi no nidim wan narafala rod bakegen blong givhan long mi. Mi save wanem we mi mas mekem. Mi nidim nomo we narafala i tingbaot ol filing blong mi. Fasin blong brata ya blong lesingud long mi i givhan long mi blong no harem nogud tumas.”

Jisas Kraes i soemaot wan nambawan eksampol long fasin ya blong lesingud long narafala wetem lav. Smoltaem afta we Jisas i ded, tu disaepol blong hem oli aot blong go long wan vilej we i stap 11 kilometa longwe long Jerusalem. I sua se tingting blong tufala i foldaon. Ale, Jisas ya we i laef bakegen i stat blong wokbaot wetem tufala. Jisas i askem ol kwestin long tufala disaepol ya blong faenemaot ol wari blong tufala mo biaen tufala i talemaot tingting blong tufala long hem. Tufala i talemaot hop we tufala i gat mo tu ol filing we oli mekem tingting blong tufala i foldaon mo i fasfas. Jisas i kea long tufala mo fasin blong hem blong lesingud long tufala i soemaot se hem i lavem tufala, mo i rerem tufala disaepol blong hem blong gat fasin blong lesingud tu. Afta, Jisas i “talemaotgud long tufala, olgeta tok  blong Baebol we oli bin raetem blong tokbaot hem.”​—Luk 24:​13-27.

Wan nambawan rod blong narafala i lesingud long yumi hemia se yumi mas faswan blong lesingud long olgeta. Wan woman Bolivia i talem se: “Papa mo mama blong mi mo blong man blong mi tu oli stat blong no laekem fasin blong mi blong tijim ol pikinini blong mi. Mi no laekem ol toktok blong olgeta be tu mi harem olsem se mi no mekem gud wok blong mi olsem wan mama. Long taem ya, wan woman we i Witnes blong Jeova i kam long mi. Woman ya i storian long mi long saed blong ol promes blong God. Be taem woman ya i askem tingting blong mi, mi luksave kwiktaem nomo se woman ya i rere blong lesingud long mi. Mi singaot hem i kam insaed long haos mo mi stat blong tokbaot ol problem blong mi long hem. Hem i lesingud long mi wetem longfala tingting. Ale hem i askem long mi se wanem samting nao mi laekem mekem blong ol pikinini blong mi mo wanem tingting blong hasban blong mi long saed ya. Mi harem se mi glad tumas blong storian wetem wan man olsem, we i rere blong kasem save long ol filing blong mi. Taem woman ya i stat blong soem long mi wanem we Baebol i talem long saed blong famle laef, mi luksave se mi stap storian wetem wan man we i tingbaot ol problem blong mi.”

Baebol i talem se, ‘Lav i no save tingbaot hem nomo.’ (1 Korin 13:​4, 5) Sipos yumi lesingud long man wetem lav, hemia i min se yumi lego ol samting we yumi wan i wantem. Taem narafala i wantem tokbaot wan problem blong hem no wan samting we i impoten, maet yumi mas livim niuspepa we yumi stap ridim, kilim televisin, ofem mobael fon. Fasin blong lesingud long man wetem lav i minim se yumi rili intres long ol tok blong narafala. Blong mekem olsem, yumi mas lukaotgud blong no statem blong tokbaot yumi taem yumi talem ol tok olsem se, “Samting ya i mekem mi mi tingbaot wan samting we i hapen long mi i no longtaem.” I tru se i no rong blong talem ol tok olsem taem yumi stap storian, be yumi nidim blong lego ol samting we yumi wan i wantem taem wan i stap storian wetem yumi long wan problem blong hem. I gat wan narafala rod bakegen blong soem bigfala intres long narafala.

Lesingud Blong Kasem Save Ol Filing Blong Narafala

Ol fren blong Job oli no lesingud long evri tok blong Job. Nating se i olsem be Job i talem se: “Sipos i gat man i save lesin long ol tok ya blong mi, bambae i gud tumas.” (Job 31:35) ?From wanem Job i tok olsem? From we fasin blong olgeta ya blong lesin long hem i no leftemap tingting blong hem nating. Oli no tingbaot Job nating mo oli no wantem kasem save long ol filing blong hem. I sua se olgeta ya oli no gat filing olsem wan trufala man blong lesin i gat taem i kea long narafala. Be aposol Pita i givim advaes se: “Yufala evriwan i mas gat wan tingting nomo, mo yufala i mas gat sore long yufala. Yufala i mas lavlavem yufala olsem we yufala i wan brata nomo, mo yufala i mas mekem i gud long yufala, we tingting blong yufala i stap daon.” (1 Pita 3:8) ?Olsem wanem yumi save soemaot filing olsem? Wan rod hemia blong soem se yumi tingbaot ol filing blong ol narafala mo traehad blong kasem save long olgeta. Ol toktok olsem se “tru ya, ating samting ya i mas mekem yu yu harem nogud ya” no “ating yu filim nogud se narafala i no kasem save long yu ?a?”, hem i wan rod blong soem se yumi tingbaot olgeta. Wan narafala rod hemia blong talem bakegen wanem we man ya i talem long yumi wetem ol prapa tok blong yumi. Samting ya i soemaot se yumi kasem save wanem we hem i talem long yumi. Fasin blong lesingud long narafala wetem lav i minim se yumi lesingud long ol tok mo long ol filing blong hem tu.

Robert * i wan Witnes blong Jeova. Hem i talem se: “Wan taem long laef blong mi, mi no glad long wok blong prij we mi mekem. Taswe mi toktok  wetem elda we i stap goraon blong visitim ol kongregesen. Elda ya i lesingud long mi mo i traehad blong kasem save long ol filing blong mi. Mo tu, hem i save se mi mi fraet we bambae hem i jikim mi from ol nogud fasin ya blong mi. Brata ya i talem long mi se hem i kasem save long ol filing blong mi from we hem tu i bin gat ol filing olsem bifo. Samting ya i rili halpem mi blong gohed gud bakegen.”

?Olsem wanem? ?I stret we yumi lesingud long narafala nating sipos yumi no agri long evri samting we hem i talem? ?Yumi save talem long hem se yumi glad tumas from we hem i talemaot long yumi ol wari blong hem? Yes. Traem tingbaot sipos wan yang boe i faet long skul no wan yang gel i kambak long haos mo i talem long papa mo mama blong hem se hem i laekem wan boe. Long taem olsem ating i gud we fastaem papa mo mama i lesingud mo i traehad blong kasem save tingting blong yangfala ya mo biaen tufala i save eksplenem long hem wanem samting i gud mo wanem samting i nogud.

Ol Proveb 20:5 i talem se: “Ol tingting blong man i olsem wota long wel, we i godaon we i godaon, be man we i save luksave ol had samting, hem i save faenemaot ol tingting olsem.” Sipos wan man we i waes mo i gat save i no wantem givim advaes, yumi mas pulum hem blong givim advaes. I sem mak taem yumi lesingud long narafala wetem lav. I nidim blong gat fasin luksave blong mekem se hemia we yumi toktok long hem i talemaot ol tingting blong hem. I gud blong askem ol kwestin, be yumi mas lukaotgud se ol kwestin blong yumi oli no blong yumi pusum nus blong yumi long bisnes blong hem. I gud sipos yumi letem hem i toktok fastaem mo i talemaot ol trabol blong hem we hem i harem se i stret blong i tokbaot. Eksampol, maet wan waef we i wantem tokbaot ol problem insaed long mared laef blong hem, bambae i harem se i isi blong tokbaot fastaem olsem wanem hem mo hasban blong hem tufala i mitim tufala mo biaen tufala i mared. Maet wan man we i kam slak long Kristin wok blong prij i harem se i isi long hem blong eksplenem fastaem olsem wanem hem i faenem trutok.

Fasin Blong Lesingud Wetem Lav—Wan Fasin We i No Isi

I no isi blong lesingud long wan man we i kros long yumi from we oltaem yumi wantem pruvum se yumi no gat fol. ?Olsem wanem yumi save lesingud long narafala long taem olsem? Ol Proveb 15:1 i talem se: “Sipos yu toktok gud long man we i kros, bambae yu save mekem tingting blong hem i kam kwaet.” Wan rod blong ansa wetem kwaet fasin long man we i kros hemia blong askem hem wetem kaen fasin blong i toktok mo afta yumi mas lesingud taem hem i stap toktok.

Plante taem, tu man we tufala i stap rao bigwan tufala i stap ripitim ol semfala tok. Wanwan long tufala i harem se narawan i no lesin long hem. !Ating bambae i gud tumas sipos wan long tufala i stop mo i lesin long narawan! Yes, i impoten tumas we yu bos long yu wan mo toktok long narafala long wan fasin we i soemaot se yu waes mo yu gat lav. Baebol i talem long yumi se: “Man we i waes, hem i save satem maot blong hem, i no tok.”​—Ol Proveb 10:19.

Yumi no bon wetem fasin ya blong lesingud wetem lav. Be, hem i wan fasin we yumi save lanem taem yumi traehad mo stretem yumi wan. Fasin ya i wan impoten fasin. Yumi soemaot se yumi lavem narafala sipos yumi rili lesingud taem hem i stap toktok. Mo samting ya i save mekem se yumi glad. !Yes i waes tumas taem yumi wokem fasin ya blong lesingud wetem lav!

[Futnot]

[Tok blong pija long pej 11]

Taem yumi stap lesin, yumi mas lego ol samting we yumi wan i wantem

[Tok blong pija long pej 12]

I no isi blong lesingud long wan man we i kros