?I Gat Rod Blong Mekem Fulwol i Joengud?

?WANEM bambae i hapen long fiuja blong wol ya, bambae i gat pis no bambae i gat bigfala trabol? Sam man oli givim ol pruf blong soem se bambae i gat pis, be sam narafala man oli givim pruf se bambae i gat bigfala trabol.

Long wan saed, sam lida blong wol oli talem se oli sua se fulwol bambae i gat pis long hem—maet from we oli fraet blong tingbaot se wol ya bambae i olsem wanem sipos i no gat pis. Long nara saed, plante man oli wari tumas long ol kwestin olsem: ?Wanem ol kantri we oli gat ol rabis tul blong faet we oli save spolem plante plante man? ?Bambae oli yusum ol tul ya wan dei? ?Wanem bambae i hapen sipos oli yusum ol tul ya?

Histri blong man i soem se, longtaem i kam, fasin blong wantem winim narafala no fasin blong no laekem narafala from we i defren, i olsem wan faea we i blokem ol man blong oli no save joengud. Mo plante taem, ol jos oli no givhan nating long ol man blong lego ol fasin ya we oli seraotem man, be oli mekem i kam moa wos, i olsem we oli stap blo long faea ya blong mekem i kam bigwan moa. James A. Haught, wan man blong raetem ol stori blong niuspepa, i talem se: “Eni samting we i mekem man i seraot i save pulum man blong no laekem nating narafala, mo ol jos oli seraotem man moa bitim olgeta narafala samting. . . . Nating se bighaf blong ol man oli ting se ol jos oli mekem fasin blong man i kam ‘gud,’ i klia se oli pulum sam man blong mekem samting we i nogud olgeta.” Steven Weinberg we hem i wan man blong raetem ol buk, i gat semfala tingting. Hem i raetem se: “Wan samting nomo i save pulum wan gudfala man blong mekem samting we i nogud olgeta, hemia ol jos we oli mekem ol man oli seraot.”

?Yumi rili save hop se wan dei bambae olgeta man long wol oli joengud? !Yes! Be, ol man mo ol jos we man i stanemap, oli no stamba blong fasin joengud long wol we bambae i kamtru long wol. Bambae yumi luk samting ya long nekis haf.

[Tok blong makem poen long pej 3]

?Olsem wanem? ?Wol ya i olsem wan hanbom we i rere blong bosta?