Long plante Baebol, vas 2 i talem olsem: “Ol pikinini blong tru God oli stat blong lukluk ol gel blong ol man, oli luk we oli naes. Nao oli go tekem olgeta gel ya we oli jusumaot, blong oli woman blong olgeta.” (Jen. 6:2, NW) ?Wanem samting i pruvum se “ol pikinini blong God” ya oli ol enjel, olsem we Bislama Baebol i talem?

Tok ya “ol pikinini blong God,” i kamaot long Jenesis 6:2, 4; Job 1:6; 2:1; 38:7; mo Ol Sam 89:6, long ol olfala hanraet blong Hibru lanwis. Bambae yumi luk mining blong “ol pikinini blong God” long ol vas ya.

“Ol pikinini blong God” we yumi ridim long Job 1:6, i minim ol enjel long heven we oli kam stanap long fes blong God. Long olgeta ya, i gat Setan tu. Hem i kam stanap long fes blong God, afta we hem i “go olbaot long evri haf blong [wol].” (Job 1:7; 2:1, 2) Long Job 38:4-7, yumi ridim se “ol pikinini blong God” oli glad tumas, oli stap singsingaot taem God i “putum fas ston long kona” blong wol. Taswe, olgeta ya oli mas ol enjel long heven, from we long taem ya, God i no mekem ol man yet. Mo “ol pikinini blong God” we Ol Sam 89:6 i tokbaot, hem i minim ol enjel we oli stap wetem God long heven.

From samting ya, i stret nomo blong talem se Jenesis 6:2, 4, i minim ol enjel long heven we oli bin kam long wol ya.

Plante man oli faenem i had blong bilif se sam enjel oli wantem harem gud, olsem man mo woman we i mared. Tok blong Jisas long Matiu 22:30, i soemaot se i no gat fasin blong mared long heven. Be, i gat wan taem we sam enjel oli jenisim bodi blong olgeta i kam bodi blong man, nao oli joen wetem ol man blong dring mo kakae. (Jen. 18:1-8; 19:1-3) Taswe, sipos oli naf blong mekem olsem, oli naf tu blong mekem nogud wetem ol woman.

I gat sam vas long Baebol we oli pruvum se i gat sam enjel we oli bin mekem olsem. Jud 6, 7 i tokbaot sin blong ol man long taon ya Sodom, we oli mekem nogud wetem woman. Mo hem i talem se fasin blong olgeta i sem mak long “ol enjel ya we oli no glad blong holem hae nem we God i givim long olgeta, nao oli livim prapa ples blong olgeta, oli gowe long hem.” Yes, wan samting we ol man Sodom oli mekem we i sem mak long samting we ol enjel ya oli mekem, hemia se olgeta evriwan oli “mekem nogud wetem woman, mo oli mekem i krangke wetem olgeta nomo.” Long 1 Pita 3:19, 20 (Nyutesteman wetem Ol Sam long Bislama [NTB]), aposol Pita i tokbaot ol enjel we oli no obei, mo hem i joenem toktok blong hem wetem “taem blong Noa.” (2 Pita 2:4, 5) Taswe, i stret nomo blong talem se fasin blong ol enjel ya long taem blong Noa, i sem mak nomo long fasin blong ol man long taon ya Sodom mo Gomora.

Yes, ol vas ya we yumi jes luk, oli klia nomo. Yumi kasem save se, long ol olfala lanwis, tok ya “ol pikinini blong God” we Jenesis 6:2, 4, i tokbaot, hem i minim ol rabis enjel we oli jenisim bodi blong olgeta, mo oli bin mekem nogud fasin wetem ol woman.

Aposol Pita i talem se ol spirit ya, hemia olgeta we long taem blong Noa, “God i stap wet long olgeta, we tingting blong hem i longfala, be olgeta oli no obei long hem.” (1 Pita 3:20) I klia se Pita i stap tokbaot ol enjel we oli jusum blong biaen long Setan, blong agensem God. Disaepol Jud tu i tokbaot ol enjel we oli “no glad blong holem hae nem we God i givim long olgeta, nao oli livim prapa ples blong olgeta, oli gowe long hem.” Hem i talem se God “i fasem olgeta long jen we i no save brok samtaem, mo i lokem olgeta long ples blong tudak. Nao oli stap wet long bigfala Dei ya we God bambae i jajem olgeta long hem.”​—Jud 6.

?Long wanem fasin, ol enjel ya long taem blong Noa, oli no obei? Bifo we bigfala wota i ron, ol rabis enjel ya oli jenisim bodi blong olgeta i kam olsem man. Hemia wan samting we God i no talem long olgeta blong oli mekem. (Jen. 6:​2, 4) Mo bakegen, ol enjel ya oli kamdaon long wol mo oli slip wetem ol woman. Hemia wan samting we i no stret nating blong oli mekem. God i no mekem ol enjel blong oli save slip wetem ol woman mo harem gud wetem olgeta. (Jen. 5:⁠2) Long stret taem blong hem, God bambae i kilim i ded ol rabis enjel ya. Be naoia, olsem we Jud i talem, ol rabis enjel ya oli no moa fren gud wetem Jehova, i olsem we oli stap long wan kalabus we i “tudak.” Hemia i min se oli no moa save mekem wan samting.

?Wetaem Jisas i ‘prij long ol spirit we oli stap long kalabus’? ?Mo hem i prij long olgeta olsem wanem? Pita i talem se samting ya i hapen afta we “God i mekem Jisas i laef bakegen long laef blong hem long heven.” (1 Pita 3:​18, 19) I gud blong makem se Pita i talem se ​Jisas i “prij.” Long olfala lanwis we oli raetem Baebol long hem, Pita i yusum wan tok we i soemaot se Jisas i prij long ol spirit ya, bifo we hem i raetem fas leta blong hem. Taswe, i luk olsem se, samtaem afta we Jisas i laef bakegen, hem i talem wan strong tok long ol rabis spirit ya no ol rabis enjel ya, from panis we bambae oli kasem. Hem i no prij long olgeta blong leftemap tingting blong olgeta. Be hem i prij long olgeta blong talemaot jajmen blong olgeta. (Jona 1:​1, 2) Taem ​Jisas i stanap strong long bilif blong hem gogo kasem we hem i ded, mo biaen hem i laef bakegen, hem i soemaot se Setan i no gat paoa long hem. From samting ya, Jisas i save talemaot jajmen blong ol rabis enjel ya.​—Jon 14:30; 16:​8-11.

Long fiuja, bambae Jisas i fasem Setan mo ol rabis enjel blong hem, mo i sakem olgeta i go long bigfala hol ya we i godaon we i godaon. (Luk 8:​30, 31; Rev. 20:​1-3) Gogo kasem taem ya, olgeta rabis enjel ya oli stap long tudak long saed blong spirit mo bambae oli mas lus blong olwe.​—Rev. 20:​7-10.