Jisas i Gat Strong Tingting Mo Fasin Luksave
“Nating we yufala i no luk Jisas Kraes samtaem, be yufala i lavem hem. Yufala i no luk hem naoia, be yufala i stap bilif long hem.”—1 PITA 1:8.
1, 2. (1) ?Yumi save kasem laef olsem wanem? (2) ?Wanem i save givhan long yumi blong stanap strong kasem en?
TAEM yumi kam Kristin, yumi stat blong wokbaot long wan niufala rod blong kasem laef. Sipos oltaem yumi holemstrong long God, bambae yumi glad long rod ya we yumi stap folem, mo bambae yumi save kasem laef we i no save finis. Jisas i talem se: “Man we i stanap strong gogo olgeta samting ya i finis, bambae God i sevem hem.” (Matiu 24:13) Yes, blong kasem en blong rod we yumi stap wokbaot long hem, yumi mas gohed blong holemstrong long God. Nating se hem i en blong laef blong yumi, no en blong rabis wol ya. Yumi mas lukaot gud se, ol samting blong wol ya oli no pulum yumi. (1 Jon 2:15-17) ?Yumi mas mekem wanem blong yumi stap oltaem long rod ya blong kasem laef?
2 Jisas i soemaot nambawan eksampol long yumi. Taem yumi ridim mo stadi long stori blong Jisas long Baebol, yumi save lanem plante samting. Ale, bambae yumi lavem hem, mo yumi bilif strong long hem. (Ridim 1 Pita 1:8, 9.) Aposol Pita i talem se, Jisas i soemaot wan eksampol long yumi blong yumi save folem. (1 Pita 2:21) Mo sipos yumi folem gud eksampol blong Jisas, bambae yumi naf blong stanap strong go kasem en. * Long las stadi, yumi lanem olsem wanem yumi save folem fasin blong Jisas we i gat tingting daon, mo i kaen. Long stadi ya, bambae yumi tokbaot olsem wanem yumi save folem fasin blong Jisas blong gat strong tingting mo fasin luksave.
JISAS I GAT STRONG TINGTING
3. ?Strong tingting i minim wanem? ?Olsem wanem yumi save gat fasin ya?
3 Strong tingting i wan fasin we i save givim paoa long yumi, mo i givhan long yumi blong winim ol trabol blong yumi. Mo tu, strong tingting i givhan long yumi blong mekem samting we i stret. Hem i save mekem tingting blong yumi i stap kwaet mo i save givhan long yumi blong holemstrong long God, taem yumi kasem trabol. Strong tingting i joen wetem fasin ya blong trastem Jehova, lavem hem mo putum tingting i stap strong long ol promes blong hem. ?Olsem wanem strong tingting i joen wetem ol fasin ya? Sipos yumi no wantem mekem Jehova i harem nogud, bambae yumi no letem fraet long man i lidim yumi. (1 Samuel 11:7; Ol Proveb 29:25) Taem yumi trastem Jehova, hemia bambae givhan long yumi blong yumi no putum tingting blong yumi long ol trabol we yumi stap kasem, be yumi tingbaot ol promes blong fiuja. (Ol Sam 27:14) Lav i pusum yumi blong gat strong tingting, nating se ol man oli mekem i nogud long yumi. (Jon 15:13) Yumi save gat strong tingting, sipos yumi trastem God mo yumi folem ol fasin blong Pikinini blong hem.—Ol Sam 28:7.
4. ?Jisas i soemaot olsem wanem se hem i gat strong tingting, taem hem i stap long haos blong God? (Yu luk pija long stat blong stadi.)
4 Taem Jisas i gat 12 yia, hem i soemaot finis se hem i gat strong tingting taem “hem i stap insaed long haos blong God, i stap sidaon long medel blong ol tija blong ol laen blong Isrel.” (Ridim Luk 2:41-47.) Ol tija ya, oli savegud Loa blong Moses mo kastom blong ol man Jiu. Ol kastom ya oli mekem se i had long ol man blong oli folem Loa blong Moses. Be Jisas i no letem tingting blong olgeta i blokem hem blong toktok. Hem i no fraet, hem i “askem kwestin long olgeta.” Hem i no askem ol kaen kwestin we wan yangfala i save askem. Be yumi save se hem i askem ol dip kwestin we i mekem ol tija ya, oli lesin gud mo oli stap tingting. Mo ol tija ya oli traem blong trikim Jisas, taem oli askem ol kwestin we oli save mekem rao i kamaot. Be oli no win nating. Evriwan we oli stap lesin, oli sapraes tumas long “save blong hem, mo long ol ansa blong hem.” !Yes, Jisas i gat strong tingting blong leftemap trutok we i stap long Tok blong God!
5. ?Jisas i soemaot olsem wanem se hem i gat strong tingting?
5 Taem Jisas i stap prij, hem i soemaot se hem i gat strong tingting long plante defren rod. Yu traem tingbaot. Jisas i talem stret long ol man se ol tija blong Loa, mo ol Farisi, oli stap tijim ol giaman tijing, we i lidim ol man oli go krangke. (Matiu 23:13-36) Mo tu, Jisas i no letem ol fasin blong wol ya, oli spolem hem. (Jon 16:33) Hem i gohed blong prij, nating se ol man oli agensem hem. (Jon 5:15-18; 7:14) Mo i gat tu taem we Jisas i ronemaot ol man we oli stap sakem doti long tru wosip, long haos tempol blong God. Hemia i soemaot bakegen se Jisas i gat strong tingting.—Matiu 21:12, 13; Jon 2:14-17.
Jisas i gat strong tingting blong talemaot long hae kot blong ol man Jiu, se hem i Jisas Kraes mo hem i pikinini blong God
6. ?Olsem wanem Jisas i soemaot strong tingting, long ol laswan dei blong hem long wol ya?
6 I gud yumi luk strong tingting we Jisas i gat long ol laswan dei blong hem long wol. Jisas i save wanem bambae i hapen taem Judas i salem hem long ol enemi blong hem. Nating se i olsem, taem hem wetem ol disaepol oli stap mekem lafet blong Pasova, hem i talem long Judas se: “Samting ya we bambae yu mekem, yu hareap long hem.” (Jon 13:21-27) Taem oli stap long garen blong Getsemane, Jisas i gat strong tingting blong talemaot hem wan, long ol soldia we oli kam blong arestem hem. Nating se laef blong Jisas i stap long denja, be hem i toktok blong protektem ol disaepol blong hem. Hem i talem long ol soldia se: “Yufala i letem ol man ya blong mi oli gohom.” (Jon 18:1-8) Biaen, taem hae kot blong ol man Jiu i askem kwestin long Jisas, hem i no fraet blong talemaot long olgeta se hem i Kraes mo hem i Pikinini blong God, nating se hem i save we hae pris i stap traem blong faenem poen blong kilim hem i ded. (Mak 14:60-65) Jisas i holemstrong long Jehova mo i ded long wan pos. Mo taem hem i pulum laswan win blong hem, hem i talem se: “!Olgeta samting i finis nao!”—Jon 19:28-30.
YUMI MAS GAT STRONG TINGTING OLSEM JISAS
7. ?Ol yangfala, yufala i harem olsem wanem blong stap olsem wan Witnes blong Jehova? ?Olsem wanem yu save soemaot se yu gat strong tingting?
7 ?Olsem wanem yumi save folem fasin blong Jisas blong gat strong tingting? Long skul. Ol yangfala, taem yufala i talemaot se yufala i wan Witnes blong Jehova, hemia i soemaot se yufala i gat strong tingting. Long rod ya, yufala i soemaot se yufala i glad blong karem nem blong Jehova, nating se samtaem ol narafala oli laf mo oli jikim yufala. (Ridim Ol Sam 86:12.) Maet samfala oli wantem se yufala i bilif long tijing blong evolusen. Be yufala i save ol trutok we Baebol i talem long ol samting we God i wokem. Yufala i save yusum ol save blong buklet ya, The Origin of Life—Five Questions Worth Asking blong givim ansa long olgeta we oli askem long yufala from wanem yufala i bilif olsemia. (1 Pita 3:15) Taem yufala i mekem olsem, bambae yufala i harem gud from we yufala i gat strong tingting, blong leftemap ol trutok blong Baebol.
8. ?From wanem yumi mas prij wetem strong tingting?
8 Long wok blong prij. Yumi ol tru Kristin, yumi mas gohed ‘blong talemaot gud nius we yumi no fraet, from we God i givim paoa long yumi.’ (Ol Wok 14:3) ?From wanem yumi mas prij wetem strong tingting? Faswan risen se, yumi save se ol tok we yumi talemaot oli tru from oli kamaot long Baebol. (Jon 17:17) Namba tu risen se, yumi “stap joen wetem God blong mekem wok blong hem,” mo hem i givim tabu spirit blong givhan long yumi. (1 Korin 3:9; Ol Wok 4:31) Namba tri risen se, yumi lavem Jehova mo ol man, taswe yumi traehad blong talemaot gud nius long olgeta. (Matiu 22:37-39) From we yumi gat strong tingting, bambae yumi no stop blong prij. Be bambae yumi gohed blong tijim trutok long ol man we Setan i “satem tingting blong olgeta,” no olgeta we ol lida blong skul oli lidim olgeta i go krangke. (2 Korin 4:4) Mo bambae yumi gohed blong talemaot gud nius, nating se ol man oli no wantem lesin, no oli agensem yumi.—1 Tesalonaeka 2:1, 2.
9. ?Taem yumi kasem trabol, olsem wanem yumi soemaot se yumi gat strong tingting?
9 Taem yumi kasem trabol. Taem yumi trastem God, hem bambae i mekem yumi gat strong bilif mo strong tingting, nating se yumi kasem trabol. Sipos wan we yumi laekem hem tumas i ded, yumi krae, be yumi save se bambae hem i laef bakegen. Yumi gat strong tingting se “God ya we i stamba blong fasin blong givhan,” bambae i mekem yumi strong. (2 Korin 1:3, 4; 1 Tesalonaeka 4:13) Sipos yumi sik, no yumi kasem wan aksiden, nao yumi harem bodi blong yumi i soa bitim mak, be bambae yumi no tekem eni tritmen we i agensem ol rul blong Jehova. (Ol Wok 15:28, 29) Taem tingting blong yumi i foldaon, yumi harem se “yumi mekem wan samting we i rong,” be yumi no mas lego Jehova. Yumi trastem Jehova, God ya we i “stap klosap long ol man we tingting blong olgeta i kam nogud.” *—1 Jon 3:19, 20; Ol Sam 34:18.
JISAS I GAT FASIN LUKSAVE
10. ?Fasin luksave i minim wanem? ?Wan Kristin we i gat fasin luksave i save talem wanem kaen tok, mo i mekem wanem fasin?
10 Fasin luksave i min se man i kasemsave samting we i stret mo samting we i no stret, mo biaen hem i jusum blong mekem samting we i stret. (Hibru 5:14) Wan Kristin we i gat fasin luksave, bambae i mekem ol desisen we oli givhan long hem blong gohed blong fren gud wetem God. Bambae hem i lukaotgud blong no talem ol tok we oli save spolem filing blong narafala. Hem i mekem Jehova i glad, from we hem i jusum ol toktok we oli givhan long narafala. (Ol Proveb 11:12, 13) Hem “i no save kros kwik.” (Ol Proveb 14:29) “Hem i stap mekem ol fasin we i stret, mo i stap traehad from.” Hemia i min se, hem i stap mekem ol gudfala desisen long laef blong hem. (Ol Proveb 15:21) ?Olsem wanem yumi save gat fasin luksave? Yumi mas stadi long Tok blong God, mo folem ol samting we yumi lanem. (Ol Proveb 2:1-5, 10, 11) Mo tu, yumi mas stadi mo folem nambawan eksampol blong Jisas blong gat fasin luksave.
11. ?Olsem wanem Jisas i soemaot se hem i gat fasin luksave long ol toktok blong hem?
11 Jisas i soem se hem i gat fasin luksave long olgeta samting we hem i talem mo i mekem. Ol toktok blong hem. Taem hem i stap talemaot gud nius, hem i jusum ol tok we i mekem ol man we oli lesin, oli sapraes tumas. (Matiu 7:28; Luk 4:22) Oltaem hem i ridim Baebol, mo i pulum ol man blong oli tingbaot samting we Baebol i talem. Hem i save gud wanem vas blong yusum. (Matiu 4:4, 7, 10; 12:1-5; Luk 4:16-21) Mo tu, taem Jisas i stap eksplenem mining blong ol vas blong Baebol, hem i mekem long fasin we i gat paoa long man we i lesin. Afta we Jisas i laef bakegen, hem i toktok wetem tu disaepol blong hem long rod we i go long Emeas. Hem i eksplenem mining blong ol vas we oli tokbaot hem. Biaen, tufala disaepol ya tufala i talem se: “Man. Taem hem i stap toktok long yumitufala long rod, i stap talemaot ol tok ya blong Baebol, tok blong hem i nambawan, i mekem yumi harem gud tumas.”—Luk 24:27, 32.
12, 13. ?Wanem sam eksampol we oli soemaot se Jisas i gat longfala tingting, mo i no mekem i strong long ol man?
12 Ol filing mo ol fasin blong hem. Fasin luksave i givhan long Jisas blong “i save mekem tingting blong hem i longfala.” (Ol Proveb 16:32) Hem i naf blong bos long ol filing blong hem, mo hem i “wan kwaet man.” (Matiu 11:29) Oltaem Jisas i gat longfala tingting long ol disaepol blong hem, nating se oli mestem. (Mak 14:34-38; Luk 22:24-27) Mo hem i stap kwaet nomo, nating se ol man oli mekem i nogud long hem.—1 Pita 2:23.
13 Fasin luksave i givhan long Jisas blong i no mekem i strong tumas long narafala. Jisas i kasemsave from wanem Jehova i givim Loa blong Moses, mo samting ya i gat paoa long fasin we hem i mekem long narafala. Yu traem tingbaot wan woman we “sik blong woman” i stap long hem blong twelef yia. (Ridim Mak 5:25-34.) Woman ya i pas long medel blong plante man we oli stap biaen long Jisas, mo hem i tajem klos blong Jisas, nao wantaem nomo sik blong hem i finis. Folem Loa blong Moses, woman ya i no klin, taswe hem i no save tajem eni man. (Levitikas 15:25-27) Be Jisas i no tok strong long woman ya. ?From wanem? Hemia from we hem i kasem save se ol gudfala fasin, olsem ‘sore mo fasin blong holem promes,’ oli moa impoten long ol loa ya we oli strong tumas blong folem. (Matiu 23:23) Long kaen fasin, Jisas i talem long woman ya se: “Dota blong mi. Bilif blong yu i mekem yu yu gud bakegen. Yu go, yu no moa wari bakegen. Sik blong yu i finis nao.” !Hemia wan nambawan eksampol we i soemaot olsem wanem fasin luksave i pusum Jisas blong kaen long narafala!
14. ?Jisas i jusum blong mekem wanem? ?Olsem wanem hem i putum tingting blong hem long wok we hem i stap mekem?
14 Long fasin blong laef blong hem. Jisas i soemaot se hem i gat fasin luksave long samting we hem i mekem long laef blong hem. Hem i jusum blong mekem wok blong talemaot gud nius. (Luk 4:43) Mo tu, Jisas i mekem ol desisen we oli givhan long hem blong putum tingting blong hem long wok we hem i stap mekem, mo blong hem i finisim wok ya. Hem i mekem laef blong hem i no fasfas, blong hem i save yusum taem mo paoa blong hem long wok blong prij. (Luk 9:58) Hem i luksave se hem i mas trenem ol narafala blong oli gohed blong mekem wok ya, afta we hem i ded. (Luk 10:1-12; Jon 14:12) Mo hem i promes long ol disaepol blong hem, se bambae hem i givhan long olgeta oltaem long wok blong prij, “gogo wol ya i finis.”—Matiu 28:19, 20.
YUMI MAS GAT FASIN LUKSAVE OLSEM JISAS
Fasin luksave i givhan long yumi blong kasemsave samting we ol man oli nidim, mo jusum gud ol toktok blong yumi (Yu luk haf 15)
15. ?Olsem wanem yumi save soemaot se yumi gat fasin luksave long ol toktok blong yumi?
15 ?Olsem wanem yumi save gat fasin luksave olsem Jisas? Ol toktok blong yumi. Taem yumi toktok long ol brata mo sista, i gud we yumi yusum ol tok we oli leftemap tingting blong olgeta, be i no blong daonem olgeta. (Efesas 4:29) Taem yumi tokbaot Kingdom blong God long ol narafala, ol tok blong yumi oli mas ‘olsem sol we yumi putum long kakae blong mekem i tes gud.’ Hemia i min se toktok blong yumi i mas soemaot se yumi respektem ol man. (Kolosi 4:6) Yumi traem kasem save samting we ol man oli stap tingbaot, oli nidim, mo oli intres long hem, biaen yumi save jusum gud ol tok blong yumi. Sipos yumi yusum ol tok we oli kaen, ol man bambae oli wantem lesin long yumi, mo ol tok blong yumi oli save tajem hat blong olgeta. Mo tu, taem yumi tokbaot bilif blong yumi, i gud we yumi ridim wan vas blong Baebol taem yumi luk se i gat janis blong mekem, from we Tok blong God i gat paoa. Yumi save se ol tok blong Baebol oli gat moa paoa i bitim eni narafala tok we yumi save talem.—Hibru 4:12.
16, 17. (1) ?Olsem wanem yumi save soemaot se yumi no hareap blong kros, mo yumi no mekem i strong tumas long narafala? (2) ?Olsem wanem yumi save putum tingting blong yumi long wok blong prij?
16 Long ol filing mo ol fasin blong yumi. Taem wan samting i mekem yumi kros, fasin luksave i save givhan long yumi blong bos long filing blong yumi mo no “hareap blong kros.” (Jemes 1:19) Taem ol man oli mekem yumi harem nogud, i gud yumi traem kasemsave from wanem oli talem tok olsem, no from wanem oli mekem fasin olsem. Ale, bambae i isi long yumi blong fogivim olgeta mo no kros long olgeta. (Ol Proveb 19:11) Mo tu, fasin luksave i givhan long yumi blong yumi no mekem i strong tumas long narafala. Yumi no mas ting se ol brata mo sista oli stret gud olgeta. Yumi mas tingbaot se maet oli gat sam problem we yumi no kasemsave long olgeta. Yumi mas glad blong lesin taem oli talemaot tingting blong olgeta. Mo sipos i stret, yumi lego prapa tingting blong yumi mo folem tingting blong olgeta. Yumi no fosem olgeta blong mekem samting we yumi talem.—Filipae 4:5.
17 Long fasin blong laef blong yumi. Yumi save se i wan bigfala blesing long yumi, blong mekem wok ya blong talemaot gud nius. Taswe, yumi wantem mekem ol desisen we bambae oli givhan long yumi blong putum tingting blong yumi long wok blong prij. Yumi jusum blong putum Jehova long fasples long laef blong yumi. Yumi mekem laef blong yumi i no fasfas, blong yumi save yusum taem mo paoa blong yumi blong talemaot gud nius, bifo we en i kam.—Matiu 6:33; 24:14.
18. ?Olsem wanem yumi save gohed blong stap long rod ya blong kasem laef we i no save finis? ?Yu yu gat strong tingting blong mekem wanem?
18 !Yumi glad tumas blong lanem sam long ol gudfala fasin blong Jisas! Yu traem tingbaot ol gudfala blesing we bambae yumi kasem, taem yumi stadi long ol narafala fasin blong Jisas, mo lanem olsem wanem blong kam olsem hem. Taswe, i gud yumi gat strong tingting blong folem ol fasin blong Jisas. Taem yumi mekem olsem, bambae yumi fren gud moa wetem Jehova, mo bambae yumi gohed blong stap long rod ya blong kasem laef we i no save finis.
^ par. 2 Tok we i stap long 1 Pita 1:8, 9 i go long ol Kristin we bambae oli laef long heven. Nating se i olsem, tok blong Pita i go tu long ol Kristin we bambae oli laef olwe long wol ya.
^ par. 9 Yu luk eksampol blong ol man we oli gat strong tingting taem oli kasem trabol long, Wajtaoa blong 1 Disemba 2000, pej 24-28, Wekap! blong 22 Eprel 2003, pej 18-21 (Franis mo Inglis), mo Wekap! blong 22 Jenuware 1995 pej 11-15 (Franis mo Inglis).
