1, 2. ?From wanem Jisas i lavem Mata? ?Mata i mekem wanem samting we i soemaot se hem i no stret gud olgeta?

?YU YU tingbaot wanem, taem yu harem nem blong sista blong Lasaros, Mata? Baebol i talem se hem i wan gudfala fren blong Jisas mo Jisas i lavem hem. Be Jisas i respektem ol narafala woman tu. Olsem mama blong hem Meri mo tu Meri we i sista blong Mata. (Jon 11:5; 19:25-27) ?Be from wanem Jisas i lavem Mata?

² Jisas i lavem Mata from we hem i kaen, hem i mekem i gud long ol man mo hem i woman blong wok. Be Jisas i lavem hem moa, from we hem i gat strong bilif. Hem i bilif long olgeta samting we Jisas i talem mo hem i bilif se Jisas nao hem i Mesaea ya we God i promes blong sanem hem i kam. (Jon 11:21-27) Nating se i olsem, Mata i no stret gud olgeta, hem tu i mekem mastik olsem yumi. Eksampol, taem Jisas i go long haos blong olgeta, Mata i no glad long sista blong hem Meri, mo hem i talem long Jisas blong tok long Meri. Mata i talem se: “Masta. ?Olsem wanem? ?Yu ting se i gud we sista blong mi i livim ol wok ya i  stap, blong mi wan nomo mi mekem? Plis yu tok long hem blong i kam givhan long mi.” (Ridim Luk 10:38-42.) ?From wanem Mata i talem tok ya? ?Yumi save lanem wanem long ansa we Jisas i givim?

3, 4. ?Jisas i glad long wanem samting we Meri i mekem? ?Mo Mata i lanem wanem samting? (Yu luk pija long stat blong stadi.)

³ Jisas i glad tumas we Mata mo Meri i singaot hem blong i go long haos blong tufala, mo hem i wantem yusum janis ya blong tijim tufala long ol gudfala trutok. Meri i kwik blong sidaon klosap long Jisas, blong “lesin long ol tok blong hem.” Hem i wantem lanem plante samting long Bigfala Tija ya, Jisas. Mo tu Mata i save mekem olsem Meri, blong lesin long ol tok blong Jisas. Sipos hem i mekem olsem, Jisas bambae i save talem ol gudfala toktok long hem.

⁴ Be Mata i tingting tumas long ol narafala samting. Hem i stap bisi blong rerem wan spesel kakae blong mekem Jisas i harem gud taem hem i stap wetem olgeta. Taem Mata i luk we Meri i no givhan long hem, hem i kros mo i komplen long Jisas. Jisas i save se Mata i bisi blong mekem plante samting, taswe Jisas i talem long hem long kaen fasin se: “Mata. Yu stap harem nogud, mo yu stap trabol long plante samting.” Mo tu hem i talem se wan smol kakae nomo i naf. Be Jisas i talem ol gudfala toktok long Meri from we hem i lesingud long hem. Jisas i talem se: “Meri, hem i jusumaot gudfala samting ya finis, mo mi mi no save tekemaot samting ya long hem.” Maet Meri i fogetem samting we hem i kakae long naet ya, be hem i no save fogetem ol samting we hem i lanem mo ol gudfala toktok we Jisas i talem long hem. Bitim 60 yia biaen, aposol Jon i talem se Jisas i lavem tumas Mata mo sista blong hem. (Jon 11:5) Ol tok ya oli soemaot se Mata i glad long gudfala fasin blong Jisas blong stretem hem mo i gohed blong mekem wok blong Jehova long ful laef blong hem.

5. ?From wanem tede i no isi blong mekem ol samting we oli moa impoten? ?Bambae yumi ansa long wanem kwestin?

⁵ Bifo i no olsem tede, we i gat plante samting we oli save blokem yumi blong mekem wok blong Jehova. Advaes we i kamaot long Wajtaoa blong 15 Septemba, 1958, i talem se ol brata mo sista oli no mas letem teknoloji i blokem olgeta blong mekem wok blong Jehova. Long taem ya, i gat plante niufala samting we oli kamaot evri dei. Ol samting ya, hemia ol naesfala magasin, radio, ol muvi mo televisin. Wajtaoa ya i talem se taem yumi stap go klosap long en blong rabis wol ya, “ol samting we oli save blokem yumi bambae oli kam plante moa.” Tede yumi luk se tok ya i tru. ?Yumi save folem fasin blong Meri olsem wanem blong no letem ol samting blong wol ya oli blokem yumi long wok blong Jehova?

6. ?Ol man blong Jehova oli yusum teknoloji olsem wanem?

⁶ Ol man blong Jehova oli yusum teknoloji blong talemaot gud nius. Eksampol, bifo long Wol Wo Wan, oli soemaot sinema ya “Photo-Drama of Creation.” (Sinema Blong Ol Samting We God i Mekem). Oli yusum ol slaed mo ol sot muvi we i gat kala mo saon long hem, blong prij long plante milian man long plante kantri. En blong sinema ya “Photo-Drama,” i tokbaot taem  blong pis we bambae i kamtru taem Jisas Kraes i rul long wol. Biaen, ol man blong Jehova oli yusum radio blong talemaot gud nius blong Kingdom long plante milian man raon long wol. Tede, yumi yusum ol kompiuta mo Intenet blong talemaot gud nius long ol man we oli stap long olgeta ples long wol.

7. (1) ?From wanem i wan denja blong yusum tumas ol samting blong wol ya? (2) ?Yumi mas lukaotgud long wanem samting? (Yu luk futnot.)

⁷ Baebol i givim woning long yumi blong yumi no spenem tumas taem long ol samting blong wol ya. (Ridim 1 Korin 7:29-31.) Sam long ol samting ya oli no rong blong yumi yusum, be oli save kakae tumas taem blong yumi. Eksampol, maet yumi yusum fri taem blong yumi blong ridim ol buk, wajem televisin, go long wan narafala kantri, go wokbaot long stoa, mo yumi wantem tumas blong save ol niufala teknoloji no ol sas samting. Plante man oli laekem blong yusum Intenet blong toktok wetem narafala, blong sanem ol mesej mo imel, no blong wajem nius mo spot. Be sam man oli laekem ol samting ya tumas, nao oli spenem tumas taem long hem. * (Prija 3:1, 6) Sipos yumi spenem tumas taem long ol samting we oli no impoten, bambae yumi no gat taem blong mekem samting we i moa impoten, hemia blong wosipim Jehova.—Ridim Efesas 5:15-17.

8. ?From wanem i impoten blong yumi no laekem ol samting blong wol ya?

⁸ Setan i wok strong blong pulum yumi blong laekem ol samting blong wol ya, mo blong blokem yumi long wok blong Jehova. Hem i mekem olsem long taem blong ol Kristin bifo, mo hem i wok strong moa tede. (2 Timoti 4:10) Taswe, i gud yumi jekem yumi wanwan oltaem blong luk wanem tingting we yumi gat long ol samting blong wol ya, mo blong yumi mekem sam jenis blong lego ol samting we oli stap blokem yumi. Baebol i talem se yumi no mas lavem ol samting blong wol ya. Defren olgeta, yumi mas gohed blong holemstrong  long lav we yumi gat long Jehova. Sipos yumi mekem olsem, bambae i isi moa blong yumi obei long Jehova mo yumi kam klosap long hem.—1 Jon 2:15-17.

9. ?Jisas i tijim ol disaepol blong hem blong tingbaot wanem? ?Hem i soemaot samting ya olsem wanem?

⁹ Jisas i tijim ol disaepol blong hem long sem samting we hem i tijim Mata long hem, hemia blong no letem wan samting i blokem olgeta long wok blong Jehova. Hem i leftemap tingting blong olgeta blong oli gohed blong mekem wok blong Jehova, mo sapotem Kingdom blong hem. (Ridim Matiu 6:22, 33.) Jisas i soemaot wan nambawan eksampol long yumi. Hem i no gat plante samting, hem i no gat haos mo graon.—Luk 9:58; 19:33-35.

10. ?Wanem gudfala eksampol we Jisas i soemaot long yumi?

¹⁰ Jisas i no letem wan samting i blokem hem long wok blong prij. Eksampol, smoltaem afta we hem i prij long Kapaneam, ol man long ples ya oli wantem se hem i stap wetem olgeta. ?Jisas i mekem wanem? Hem i putum tingting blong hem long wok blong hem nomo. Hem i talem se: “Mi mas go long ol narafala vilej tu, mi mas talemaot gud nius ya long olgeta, se God i stap kam King blong olgeta man long wol, from we God i sanem mi blong mi mekem olsem.” (Luk 4:42-44) Jisas i wokbaot i go long ol ples farawe blong talemaot gud nius mo blong tijim ol man we hem i faenem olgeta. Jisas i stret gud olgeta, be samtaem hem i taed mo i mas spel from we hem i wok had tumas.—Luk 8:23; Jon 4:6.

11. Taem wan man i askem long Jisas blong stretem trabol blong hem, ?Jisas i mekem wanem? ?Jisas i tijim ol disaepol blong hem long wanem lesen?

¹¹ Biaen, taem Jisas i stap tijim ol disaepol blong hem long wan impoten lesen, wan man i kam mo i talem long hem se: “Tija. Papa blong mi i ded finis. Plis yu talem long brata blong mi blong i seraot ol samting ya, we papa blong mitufala i putum i stap se i blong mitufala.” Jisas i no traem blong stretem trabol blong man ya mo hem i no letem samting ya i blokem hem blong tijim ol disaepol blong hem. Hem i yusum janis ya blong tijim olgeta se sipos man i wantem gat plante samting, bambae samting ya i save blokem hem blong mekem wok blong God.—Luk 12:13-15.

12, 13. (1) ?Ol man Gris long Jerusalem oli sapraes tumas long wanem samting we Jisas i mekem? (2) ?Jisas i mekem wanem taem Filip i talem long hem blong i go luk olgeta?

¹² Klosap long taem we Jisas bambae i ded, hem i harem nogud tumas. (Matiu 26:38; Jon 12:27) Hem i save se bambae oli mekem i nogud long hem mo bambae oli kilim hem i ded. Be hem i save tu se hem i gat plante wok blong mekem bifo we hem i ded. Eksampol, long Sande Nisan 9, Jisas i kamtru long Jerusalem long wan dongki mo plante man oli glad blong luk hem olsem King blong olgeta. (Luk 19:38) Long nekis dei, Jisas i go long haos blong God mo i ronemaot ol man we oli stap mekem  maket mo oli stap mekem rabis fasin blong stil.—Luk 19:45, 46.

¹³ Sam man Gris we oli kam long Jerusalem blong mekem lafet blong Pasova, oli sapraes tumas taem oli luk samting we Jisas i mekem. Nao oli askem long Filip sipos oli save luk Jisas. Be Jisas i no wantem we ol narafala man oli givhan long hem blong hem i agensem ol enemi blong hem. Hem i save wanem samting we i moa impoten blong mekem. Hem i putum tingting blong hem i stap strong long samting we Jehova i wantem hem blong i mekem, hemia blong givim laef blong hem olsem wan sakrefaes blong sevem olgeta man. Taswe hem i talem long ol disaepol blong hem se i no longtaem bambae hem i ded, mo olgeta man we oli wantem biaen long hem, bambae oli mas rere blong lego ol samting we olgeta nomo i wantem. Hem i talem se: “Man we i tinghae tumas long laef blong hem long wol ya, hem bambae i lusum laef blong hem. Be man we i no tingbaot tumas laef blong hem olsem, hem bambae i holem laef blong hem gogo hem i kasem laef ya we i no save finis.” Be Jisas i promes tu se man we i mekem wok blong hem, “bambae Papa blong hem i leftemap nem blong hem” mo bambae hem i kasem laef we i no save finis. I sua se Filip i talemaot ol gudfala tok ya long ol man Gris we oli wantem luk Jisas.—Jon 12:20-26.

14. ?Wanem narafala samting we Jisas i mekem?

¹⁴ Bigfala wok we Jisas i mekem taem hem i stap long wol, hemia blong talemaot gud nius. Hem i yusum gud laef blong hem blong prij, be i no hemia nomo. Hem i go long wan lafet blong mared mo hem i tanem wota i kam waen. (Jon 2:2, 6-10) Hem i go kakae long haos blong ol fren blong hem tu mo long haos blong ol narafala man we oli intres long gud nius. (Luk 5:29; Jon 12:2) Be samting we i moa impoten, se oltaem hem i meksua se hem i tekem taem blong prea, blong tingting dip, mo blong spel.—Matiu 14:23; Mak 1:35; 6:31, 32.

15. ?Aposol Pol i talem se ol Kristin oli mas mekem wanem samting? ?Hem i soemaot wan gudfala eksampol olsem wanem?

¹⁵ Aposol Pol i talem se ol Kristin oli olsem ol man we oli stap long wan longfala resis, mo blong finisim resis ya oli mas lego ol samting we i save blokem olgeta. (Ridim Hibrus 12:1.) Pol i soemaot wan gudfala eksampol. Hem i save kam wan rijman mo i gat haenem olsem wan lida blong ol man Jiu, be hem i no mekem olsem. Hem i “jusumaot ol samting we oli moa impoten.” Hem i wok strong long wok blong prij long plante ples, olsem long Siria, Esia Maena, Masedonia, mo Judia. Pol i lukluk i go long praes we bambae hem i kasem, hemia blong kasem laef we i no save finis long heven. Hem i talem se: “Mi mi fogetem olgeta samting we oli stap long bak blong mi, nao mi stap traehad oltaem blong kasem ol samting we oli stap long fes blong mi. I olsem we mi stap resis i go stret long mak, we i gat praes blong man we i win.” (Filipae 1:10, NW; 3:8, 13, 14) Pol i no mared, mo samting ya i givhan long hem blong hem i  ‘mekem wok blong Masta blong yumi, we i no gat narafala tingting i pulum hem.’—1 Korin 7:32-35.

16, 17. ?Yumi save folem eksampol blong Pol olsem wanem, nating se yumi mared no yumi no mared? ?Mark mo Claire i folem eksampol blong Pol olsem wanem?

¹⁶ Sam man blong Jehova tede oli jusum blong no mared blong oli save mekem moa long wok blong Jehova olsem Pol. (Matiu 19:11, 12) Olgeta we oli no mared oli no gat tumas wok blong mekem, be olgeta we oli mared oli mas mekem plante samting blong lukaot long famle. Nating se yumi mared no yumi no mared, be yumi evriwan i “mas lego ol samting we oli stap blokem yumi” blong mekem wok blong Jehova. Maet yumi mas lego ol samting we yumi laekem mekem oltaem, blong yumi naf blong mekem moa long wok blong Jehova.

¹⁷ Eksampol, Mark mo Claire, we tufala i gruap long Wales, tufala i statem blong mekem wok blong paenia taem tufala i finisim skul. Afta we tufala i mared, tufala i gohed blong mekem wok blong paenia. Be tufala i wantem blong mekem moa. Mark i talem se: “Mitufala i salem bigfala haos blong mitufala mo mitufala i lego wok blong mitufala, blong joen long wok blong bildim ol haos wosip long ol defdefren ples long wol.” Long ol 20 yia we i pas, tufala i go long plante ples long Afrika blong givhan blong bildim ol Haos Kingdom. Samtaem tufala i sot long mane, be oltaem Jehova i lukaot gud long tufala. Claire i talem se: “Mitufala i glad tumas blong mekem wok blong Jehova evri dei. Mitufala i gat plante fren mo mitufala i no sot long wan samting nating. Mitufala i harem gud moa, taem mitufala i lego ol samting we mitufala i gat, blong mekem wok blong Jehova fultaem.” Olgeta we oli mekem wok blong Jehova fultaem oli gat sem tingting olsem. *

18. ?Wanem ol kwestin we yumi save tingbaot?

¹⁸ ?Olsem wanem? ?Yu yu harem se yu mas traehad moa blong mekem wok blong Jehova? ?I gat sam samting we oli stap blokem yu blong mekem samting we i moa impoten? Sipos i olsem, ?yu save mekem wanem? Maet i gud yu traehad blong kam gud moa long fasin blong yu blong ridim mo stadi long Baebol. Nekis stadi bambae i tokbaot olsem wanem yu save mekem samting ya.