“Sipos yufala i askem long Papa eni samting long nem blong mi, bambae hem i givim long yufala.”—Jon 16:23.

Jisas i soemaot se Jehova i no wantem we yumi prea long hem tru long ol aedol, ol tabu man, ol enjel, o ol olfala blong yumi we oli ded finis. Be yumi mas prea tru long nem blong Jisas Kraes. Hemia i soemaot se yumi luksave bigfala wok we Jisas i mekem blong yumi. Jisas i talem se: “I no gat man i save kam long Papa blong mi, sipos hem i no pas long mi.”—Jon 14:6.

“Long fes blong hem, yufala i talemaot olgeta samting we i stap long hat blong yufala.”—Ol Sam 62:8.

Taem yumi prea long Jehova, yumi mas toktok olsem we yumi toktok long wan papa we i lavem yumi. Yumi no mas ridimaot ol prea, o ripitim prea we yumi lanem baehat, be yumi toktok wetem respek mo talemaot samting we i stap long hat.

“Nomata wanem samting yumi askem long hem, mo sipos i laenap wetem wil blong hem, hem i harem yumi.”—1 Jon 5:14.

Long Baebol, Jehova i talem samting we bambae hem i mekem blong yumi, mo samting we yumi mas mekem blong hem. Blong God i harem prea blong yumi, yumi mas mekem i “laenap wetem wil blong hem.” Taswe yumi mas stadi Baebol blong save gud hem. Nao bambae hem i glad long ol prea blong yumi.

Prea From Ol Samting We Yumi Nidim. Yumi save prea long God from ol samting we yumi nidim evridei, olsem kakae, klos, mo ples blong slip. Yumi save prea tu blong kasem waes blong mekem ol gudfala desisen, mo blong kasem paoa blong stanap strong taem yumi fesem trabol. Yumi save askem long God blong i mekem bilif i kam strong moa, i fogivim yumi, mo i givhan long yumi.—Luk 11:3, 4, 13; Jemes 1:5, 17.

Prea From Ol Narafala. Ol papa mo mama we oli lavem ol pikinini blong olgeta, oli glad taem ol pikinini oli lavlavem olgeta. Jehova tu i wantem se ol pikinini blong hem long wol oli lavlavem olgeta. I stret we yumi prea from hasban o waef blong yumi, ol pikinini, ol famle, mo ol fren blong yumi. Disaepol Jemes i talem se: “Yufala i prea from yufala.”—Jemes 5:16.

Talem Tangkiu Long God. Baebol i tokbaot God Ya We i Wokem yumi, i se: “Hem i givim ren long yufala mo i mekem ol frut oli givim kakae long stret taem blong olgeta, mo hem i stap givim kakae long yufala mo i stap mekem yufala i glad.” (Ol Wok 14:17) Taem yumi tingbaot evri samting we God i mekem blong yumi, yumi wantem talem tangkiu long hem. Mo tu, yumi soemaot se yumi glad long ol samting we God i givim, taem yumi folem ol tok blong hem long laef blong yumi.—Kolosi 3:15.

Samtaem, maet yumi harem nogud from we yumi no kasem ansa kwiktaem long prea blong yumi. ?Hemia i min se God i no kea long yumi? !I no minim olsem! Maet yumi nidim nomo blong gohed blong prea, olsem ol stori long nekis haf oli soemaot.

Stiv we yumi tokbaot finis, i talem se: “Sipos mi no stap prea, bambae mi lusum hop longtaem finis.” ?Wanem i jenisim tingting we hem i gat fastaem? Taem hem i stat blong stadi Baebol, hem i lanem se hem i mas gohed nomo blong prea. Stiv i talem se: “Mi prea long God blong talem tangkiu long hem from help we ol gudfala fren oli givim. Naoia mi glad moa i bitim ol narafala taem long laef blong mi.”

?Olsem wanem long Jeni, we i ting se i no stret blong God i harem prea blong hem? Hem i talem se: “Mi askem long God blong i givhan long mi blong kasem save, from wanem mi harem se mi gud blong nating nomo.” ?Prea i givhan olsem wanem long hem? Hem i se: “Prea i givhan long mi, blong mi gat stret tingting. Mi luksave se nating we hat blong mi i jajem mi, be God i no mekem olsem. Taem mi luk we God i ansarem prea blong mi, hemia i givim paoa long mi blong gohed.” ?Wanem i kamaot from? Hem i talem se: “Mi luk Jehova olsem wan God we i laef, i lavem mi, mo i kea long mi. Hem i Papa mo Fren blong mi, we i stap oltaem blong givhan long mi, sipos mi gohed blong mekem samting we hem i wantem.”

Traem tingbaot samting we i hapen long Isabel. Taem hem i gat bel, dokta i talem se pikinini blong hem bambae i handikap. Hem i harem nogud tumas. Samfala oli talem long hem blong i kilim pikinini ya long bel blong hem. Isabel i talem se: “Mi harem se bambae mi ded nomo, from mi wari tumas.” ?Hem i mekem wanem? Hem i se: “Mi prea oltaem blong God i givhan long mi.” Biaen, hem i bonem wan pikinini boe we i handikap, nem blong hem Gerard. ?Olsem wanem? ?Isabel i harem se God i ansa long prea blong hem? !Yes! ?Hem i ansa olsem wanem? Isabel i talem se: “Naoia boe blong mi i gat 14 yia, mo hem i harem gud long laef nating se hem i gat disabiliti. Hem i wan bigfala blesing. Taem mi luk hem, mi luksave se Jehova i ansarem prea blong mi.”

Ol tok ya i mekem yumi tingbaot tok blong man we i raetem Sam ya se: “O Jehova, bambae yu lesin long ol man we oli gat tingting daon, taem oli askem samting long yu. Bambae yu mekem hat blong olgeta i strong, mo yu lesin gud long olgeta.” (Ol Sam 10:17) !Hemia gudfala risen blong prea oltaem!

Plante prea blong Jisas oli stap long Baebol. Ol man oli save gud prea we Jisas i tijim long ol disaepol blong hem. ?Yumi save lanem wanem long prea ya?