Hemia toktok blong ol man we tingting blong olgeta i trabol. ?Olsem wanem? ?Yu o wan we yu save i harem olsem tu?

No wari, i no yu nomo we i harem olsem. Plante man oli harem se tingting blong olgeta i trabol, maet olgeta wan i harem olsem o maet famle blong olgeta.

From we yumi laef long wan taem we ‘laef i strong tumas mo i had blong winim ol trabol,’ hemia i mekem se i gat plante defren problem. (2 Timoti 3:1) Wan stadi i soemaot se long fulwol, long evri eit man i gat wan we tingting blong hem i trabol. Sipos yumi skelem taem blong COVID-19 pandemik long 2020 wetem 2019, namba blong ol man we oli wari i go antap samwe 26 pesen. Mo namba blong olgeta we oli kasem sik ya dipresen, i go antap samwe long 28 pesen.

I tru, i gud blong save namba blong ol man we oli stap wari mo oli kasem dipresen, be i moa impoten blong save olsem wanem yu mo olgeta we yu lavem i save haremgud bakegen.

Taem tingting i trabol, hemia i min se yu no glad mo bodi i slak. Bambae yu no naf blong dil wetem ol stres blong evri dei, yu no mekem gud ol wok blong yu, mo yu no glad long laef.

• I NO MIN se wan man i no strong.

• I MIN se man i sik long tingting, mekem se hem i no save tingting gud, i no save kontrolem ol filing mo ol aksen blong hem.

• I mekem se i had blong man i gat ol fren, mo blong mekem ol samting we hem i mas mekem long dei ya.

• I save afektem ol man blong ol defren kalja, laen, traeb, relijen, edukesen, yia, mo olgeta we oli rij o pua.

Sipos yu o wan we yu lavem hem i luk se fasin blong yufala i jenis bigwan, maet yufala i stat blong slip plante o no slip inaf, kakae tumas o smol nomo, mo wari tumas o harem nogud. I gud yufala i go luk wan profesenol blong faenemaot from wanem yufala i harem olsem, mo wanem tritmen blong folem. ?Be bambae yu go wea blong kasem help ya?

Jisas Kraes, we i waes moa bitim eni narafala man long wol, i talem se: “Ol man we oli no sik, oli no nidim dokta, be olgeta we oli sik, yes, oli nidim.” (Matiu 9:12) Taem olgeta we oli sik long tingting o bodi oli kasem wan medikol tritmen, hemia i givhan blong oli kam gud bakegen, oli save wok gud, mo oli gat wan hapi laef. Sipos yu luk se problem ya i afektem nogud helt blong yu mo sipos i bin stap longtaem finis, i gud yu go jekap hariap. a

Nating se Baebol i no wan buk blong meresin, be samting we hem i talem i save givhan long man we tingting blong hem i trabol. Mifala i enkarejem yu blong tingting long atikol ya we i tokbaot olsem wanem Baebol i save givhan long yu, blong dil wetem ol problem we i kamaot from tingting we i trabol.