Taem mi mi smol, mifala i stap long wan vilej long notis blong Franis, nem blong hem Telanko. Papa blong mi i blong Franis, mama blong mi i blong Itali. Taem mi gat 8 yia, mifala i muf i go long wan ples we ol puaman oli stap long hem, long taon ya Rom, long Itali. Long ples ya, laef i had tumas. Papa mo mama blong mi, tufala i faet oltaem from mane.

Taem mi gat 15 yia, mama blong mi i talem se mi mas go faenem sam fren. Taswe samtaem mi goaot, mo mi no moa kambak long haos blong longtaem. Mi stat joen wetem ol rabis fren. Wan dei, wan man we mi ting se i wan gudfala man, i kam toktok long mi. Hem i givim drag long mi, mo mi tekem from we mi wantem we ol man oli ting se mi bigwan finis. Biaen, mi joen wetem ol man we oli salem drag long fasin haed, mo oli mekem rabis fasin blong man wetem woman. Plante taem, oli fosem mi blong mekem rabis fasin wetem olgeta. Mi harem se laef i nating nomo. Mi no wari sipos mi ded. Mi harem se mi stap mi wan nomo. Taem mi gat 16 yia, mi wantem kilim mi wan i ded. Ale mi dring wan ful botel wiski mo mi jam long wan dip wota. From samting ya, mi stap hafded blong tri dei, we mi no moa toktok nating.

Mi stat blong tinghevi long laef blong mi, be mi kam raf moa, mo mi trikim ol man. Mi pulum olgeta blong oli slip wetem mi, mo mi givim drag long olgeta long haos blong olgeta, nao mi stilim ol sas samting blong olgeta. Ol grup blong ol raf man oli yusum mi blong mi karem drag i go long olgeta ples long Itali. Plante taem polis i ronem mi. Mi harem se mi no moa bos long laef blong mi, mo laef blong mi i blong nating nomo. Be mi bilif yet se i gat wan risen blong laef. Ale mi prea long God, mo mi askem long hem blong i givim wan yia blong glad mo pis long mi.

Taem mi gat 24 yia, mi wantem muf i go long Inglan. From we mi wok wetem ol man blong salem drag, laef blong mi i stap long denja. Bifo we mi aot, mi go luk mama blong mi. Mi sapraes blong luk we hem i stap storian long Baebol wetem wan man we nem blong hem Annunziato Lugara. * Mi mi savegud se bifo man ya i wan rabis man we i joen long ol fasin  blong brekem loa. Taswe mi fraet, mo mi askem long hem from wanem hem i stap long ples ya. Hem i tokbaot ol bigfala jenis we hem i mekem long laef blong hem blong kam wan Witnes blong Jehova. Mo hem i talem se mi mas toktok wetem ol Witnes taem mi kasem Inglan. Mi promes se bambae mi mekem olsem. Be taem mi kasem Inglan, mi gobak long ol rabis fasin blong mi.

Wan dei, mi luk wan Witnes long London, we i stap givimaot Wajtaoa mo Wekap! long ples we fulap man oli stap wokbaot long hem. Mi tingbaot promes we mi mekem long Annunziato, nao mi go askem long Witnes ya blong i stadi Baebol wetem mi.

Mi sapraes long ol samting we mi lanem long Baebol. Wan samting, hemia vas long 1 Jon 1:9, we i talem se: “Sipos yumi talemaot ol sin blong yumi long God, yumi save bilif long hem, from we fasin blong hem i stret oltaem. Hem bambae i fogivim yumi from ol sin blong yumi, mo . . . i mekem yumi klin.” Vas ya i tajem hat blong mi bigwan, from we mi harem se ol rabis fasin blong mi oli mekem mi mi doti. Kwiktaem nomo, mi stat blong go long ol miting long Haos Kingdom blong ol Witnes blong Jehova. Ol Witnes oli welkamem gud mi. Taem mi luk se oli fren gud olsem wan famle nomo, mi wantem joen wetem olgeta, from we longtaem finis mi mi wantem wan famle olsem.

Mi luk se i no had tumas blong lego drag mo ol rabis fasin blong man wetem woman, be i had blong lanem ol gudfala fasin, olsem respek mo tingbaot ol narafala. Mi stap traehad yet blong lanem ol fasin olsem. Be Jehova i stap givhan long mi, i stap mekem mi mi win. Mi stadi Baebol klosap sikis manis, nao mi baptaes blong kam wan Witnes blong Jehova. Hemia long yia 1997.

Afta we mi baptaes, mi mared wetem wan yangfala woman, nem blong hem Barbara, we hem tu i jes kam wan Witnes blong Jehova. Wan fren blong mi bifo i luk we laef blong mi i jenis bigwan, ale hem tu i stadi Baebol. Hem mo sista blong hem, tufala i kam Witnes. Afta, sista blong bubu blong mi, we i gat 80 yia finis, i stadi, mo hem tu i baptaes bifo we hem i ded.

Naoia, mi mi wan elda long kongregesen, mo mi wetem woman blong mi, mitufala i spenem 70 aoa evri manis blong stadi Baebol wetem ol man Itali we oli stap long London. Sam samtaem, tingting blong mi i foldaon yet from ol nogud fasin we mi mekem bifo. Be Barbara i stap givhan bigwan long mi. Naoia, mi gat wan gudfala famle olsem mi wantem longtaem finis i kam. Mo mi gat wan Papa we i lavem mi, olsem mi wantem taem mi smol. Mi askem long God blong i givim wan yia blong glad mo pis long mi, be hem i givim plante moa.