1-2. ?Yumi fesem wanem we i sem mak olsem yangfala man ya we paragraf i tokbaot?

 TRAEM tingbaot wan yangfala man we i gruap long wan famle we i rij. Be wan dei, perens blong hem i ded long wan aksiden. Nius ya i mas mekem hem i harem nogud tumas. Be i no hemia nomo, i gat wan narafala rabis nius. Hem i faenemaot se perens blong hem i spenem olgeta mane we oli gat mo taem tufala i ded, tufala i gat plante kaon i stap. Naoia tingbaot se yangfala man ya i no kasem ol mane blong famle blong hem, be hem i kasem ol kaon blong perens blong hem, mo ol man ya we tufala i gat kaon long olgeta oli wantem se hem i mas pembak kwiktaem. Be bambae hem i no naf nating blong pembak.

² Yumi tu, yumi fesem sem samting olsem yangfala man ya. Faswan perens blong yumi, Adam mo Iv, tufala i stret gud olgeta mo tufala i laef long wan naesfala paradaes. (Jen. 1:27; 2:​7-9) Mo tu, tufala i gat nambawan janis ya blong laef olwe. Be biaen evri samting i jenis. Tufala i lusum naesfala paradaes ya mo janis ya blong laef olwe. ?Nao tufala i pasem wanem i go long ol fiuja pikinini blong tufala? Baebol i talem se: “Wan man nomo [Adam] i mekem se sin i kam long wol, mo ded i kamaot from sin. Mo ded i kasem olgeta man from we olgeta evriwan oli mekem sin.” (Rom 5:12) Samting we Adam i pasem i kam long yumi, hemia sin, mo frut we i kamaot from hemia ded. Sin i olsem wan bigfala kaon mo i no gat wan long yumi we i naf blong pembak.—Sam 49:8.

 3. ?From wanem yumi talem se sin i sem mak long “ol kaon”?

³ Jisas i talem se sin i sem mak long “ol kaon.” (Mat. 6:12;  Luk 11:4) Taem yumi mekem sin, i olsem we yumi gat wan kaon long Jehova. Mo Jehova i save askem yumi blong pembak kaon ya. Be sipos i no gat rod blong pembak, ded nomo bambae i mekem se yumi fri long kaon ya.—Rom 6:​7, 23.

 4. (1) ?Sipos i no gat man i halpem yumi, wanem bambae i hapen long yumi evriwan? (Ol Sam 49:​7-9) (2) ?Long Baebol, tok ya “sin” i minim wanem? (Yu luk bokis ya “ Sin.”)

⁴ ?Olsem wanem? ?Yumi save kasembak olgeta samting we Adam mo Iv i bin lusum? Nogat, yumi no save kasem ol samting ya yumi wan. (Ridim Ol Sam 49:​7-9.) Sipos i no gat man i halpem yumi, bambae yumi sem mak nomo long ol animol we taem yumi ded, yumi no gat wan hop long saed blong fiuja o laef bakegen.—Pri. 3:19; 2 Pita 2:12.

 5. ?Jehova i mekem wanem blong pembak olgeta kaon o sin we yumi kasem long Adam? (Mo tu, yu luk pija.)

⁵ Traem tingbaot bakegen yangfala man ya we yumi tokbaot hem long stat. ?Bambae hem i harem olsem wanem sipos wan rijman i talem se bambae i pembak olgeta kaon blong hem? I sua se bambae hem i glad tumas long rijman ya mo i akseptem presen ya. Long sem fasin, Papa blong yumi Jehova we i lavem yumi, i givim wan gudfala presen we i save pembak olgeta kaon o sin we yumi kasem long Adam. Jisas i eksplenem se: “God i lavem tumas ol man long wol, nao hem i givim stret Pikinini blong hem, wan nomo we hem i gat, blong olgeta man we oli soemaot se oli bilif long hem, oli no ded be oli kasem laef we i no save finis.” (Jon 3:16) Antap long hemia, presen ya i openem rod blong yumi save fren gud bakegen wetem Jehova.

 6. ?Bambae yumi tokbaot wanem long stadi ya, mo from wanem?

⁶ ?Yumi save kasem wanem gudfala samting from presen ya we i mekem se Jehova i save fogivim ol sin o “ol kaon” blong yumi? Yumi faenem ansa blong kwestin ya long ol tok we Baebol i yusum olsem fren bakegen wetem God, atonmen, kavremap sin, ransom, pembak, mo talemaot se oli stret man. Long stadi ya, bambae yumi tokbaot mining blong ol tok ya. Sipos yumi tingting dip long mining blong olgeta, bambae yumi wantem talem tangkiu moa long Jehova.

MAK: FREN BAKEGEN WETEM GOD

 7. (1) ?Adam mo Iv i lusum wanem moa? (2) ?Yumi evriwan we i kamaot biaen long Adam mo Iv, yumi nidim wanem? (Rom 5:​10, 11)

⁷ Adam mo Iv i lusum nambawan janis ya blong laef olwe, be antap moa gudfala frensip blong tufala wetem Papa blong tufala Jehova. Bifo, Adam mo Iv i pat blong famle blong  God. (Luk 3:38) Be taem tufala i no obei, Jehova i putumaot tufala i gowe long famle blong hem. Mo hem i mekem olsem, bifo we tufala i gat ol pikinini. (Jen. 3:​23, 24; 4:1) Taswe, i no gat wan long ol pikinini blong tufala wetem yumi tu, we yumi save kam pat blong famle blong Jehova. From samting ya, yumi nidim help blong yumi save fren bakegen wetem Jehova. (Ridim Rom 5:​10, 11.) Yes, yumi mas traehad blong fren gud bakegen wetem Jehova. Wan buk i eksplenem se Grik tok we oli tanem i kam “fren bakegen,” i save minim se yu “mekem wan enemi i kam fren blong yu.” Yumi glad se Jehova nao i tekem faswan step ya blong mekem se yumi save kam fren blong hem bakegen. ?Hem i mekem wanem?

PLAN: ATONMEN

 8. ?Wanem ya (1) atonmen? (2) ?kavremap sin?

⁸ Atonmen hem i wan plan we Jehova i mekem blong yumi ol sinman i save fren gud wetem hem bakegen. Mo tu, plan ya i blong mekem se yumi save kasembak evri samting we Adam i bin lusum. Kristin Grik Haf Blong Baebol i yusum wan tok we mining blong hem i sem mak long “atonmen,” hemia tok ya kavremap sin. (Rom 3:25) Tok ya i soemaot wan aksen we Jehova i mekem blong yumi gat pis mo fren gud bakegen wetem hem.

 9. ?Wanem plan we Jehova i mekem blong hem i save fogivim sin blong ol man Isrel blong smoltaem?

⁹ Blong ol man Isrel oli fren gud wetem Jehova, hem i stanemap wan rod o plan blong fogivim sin blong olgeta blong smoltaem. Wan dei evri yia, ol man Isrel oli mas mekem wan spesel lafet, mo oli singaot dei ya se Dei Blong Atonmen. Long dei ya, hae pris bambae i sakrefaesem ol animol long bihaf blong ol man. I tru, sakrefaes blong animol i no save tekemaot fulwan sin blong olgeta, from we animol i daon moa long ol man. Be sipos ol man Isrel we oli tanem tingting blong olgeta, oli givim ol sakrefaes we Jehova i askem, bambae hem i glad blong fogivim ol sin blong olgeta. (Hib. 10:​1-4) Antap long hemia, sakrefaes we oli givim long Dei Blong Atonmen mo long ol narafala taem, i halpem olgeta blong luksave se oli sinman mo se oli nidim wan sakrefaes we i gud moa, we i naf blong tekemaot sin blong olgeta fulwan.

10. ?Jehova i mekem wanem plan blong hem i save fogivim fulwan sin blong ol man?

¹⁰ Jehova i gat wan plan long tingting blong hem, hemia blong fogivim fulwan sin blong ol man. Hem i mekem plan blong Boe blong hem we Hem i lavem tumas, i “givim laef blong hem wan taem nomo mo blong olwe, blong karem sin blong plante man.” (Hib. 9:28) Yes, Jisas i givim “laef blong hem olsem wan ransom, blong pembak plante man oli go fri.” (Mat. 20:28) ?Be wanem ya ransom?

PRAES: RANSOM

11. (1) ?Long Baebol, ransom hem i wanem? (2) ?Hu i save givim ransom?

¹¹ Long Baebol, tok ya ransom hem i praes we man i pem blong i save gat atonmen mo i mekem man i fren bakegen wetem God. a Long lukluk blong Jehova, ransom nao i stamba samting we i save mekem se yumi kasembak samting we i bin lus. ?From wanem yumi talem olsem? Tingbaot se Adam mo Iv i bin lusum laef ya we i stret gud olgeta, wetem janis ya tu blong laef olwe. Taswe, ransom i mas wan praes we i stret gud long samting we i lus. (1 Tim. 2:6) Man we i givim praes ya i mas wan bigman we (1) i stret gud, (2) i save laef olwe long wol, mo (3) i rere blong givim o sakrefaesem laef blong hem from yumi. Olsem  nao, laef blong hem i save kam olsem jenis blong laef we i bin lus.

12. ?From wanem Jisas i naf blong givim ransom?

¹² Traem luk tri risen from wanem Jisas i naf blong pem praes ya ransom. (1) Hem i stret gud olgeta, hem i no mekem sin.” (1 Pita 2:22) (2) Hem i save laef olwe long wol. (3) Hem i rere blong ded mo givim laef blong hem from yumi. (Hib. 10:​9, 10) From we Jisas i stret gud olgeta, hem i sem mak long faswan man ya Adam, bifo we hem i mekem sin. (1 Kor. 15:45) Taswe, ded blong Jisas i naf blong pemaot yumi long sin blong Adam, mo givimbak samting we Adam i lusum. (Rom 5:19) Jisas i kam “las Adam.” From samting ya, i no nidim wan narafala man bakegen blong i kam mo pembak samting we Adam i lusum, from we Jisas i ded “wan taem nomo mo blong olwe.”—Hib. 7:27; 10:12.

13. ?Olsem wanem atonmen i defren long ransom?

¹³ ?Olsem wanem atonmen i defren long ransom? Atonmen hem i plan we God i mekem blong yumi ol sinman i save fren gud bakegen wetem hem. Mo ransom, hem i praes we Jisas i givim blong mekem se plan ya i save kamtru long ol man. Praes ya, hemia blad blong Jisas we i ron long bihaf blong yumi.—Efes. 1:7; Hib. 9:14.

SAMTING WE I KAMAOT FROM: PEMBAK OL MAN MO TALEMAOT SE OLI STRET MAN

14. ?Bambae yumi tokbaot wanem naoia, mo from wanem?

¹⁴ ?Wanem i kamaot from plan ya blong atonmen? Baebol i yusum tu toktok we i soemaot gudfala samting we i kamaot from. Nating se mining blong tufala toktok ya i klosap sem mak, be tufala wanwan i soemaot olsem wanem plan ya blong atonmen i openem rod blong Jehova i save fogivim yumi. Taem yumi stadi moa long tufala toktok ya, bambae yumi luk tu olsem wanem oli save gat paoa long yumi wanwan.

15-16. (1) ?Long Baebol, tok ya “pembak” i minim wanem? (2) ?Yumi harem olsem wanem taem yumi save se yumi save kam fri long sin mo ded?

¹⁵ Long Baebol, tok ya pembak i givim tingting ya se wan samting i kamaot o i kam fri. Mo ransom nao i mekem se i hapen olsem. Aposol Pita i tokbaot samting ya, taem i se: “Yufala i save finis we taem God i pemaot yufala blong mekem yufala i fri [PT: “olsem wan ransom blong pemaot yufala”] long rabis laef ya we yufala i kasem long ol olfala blong yufala bifo, hem i no yusum ol samting we oli save kam nogud, olsem silva o gol. Be hem i yusum blad we i sas tumas, we i olsem blad blong wan smol sipsip we i no gat wan samting i rong long bodi blong hem mo i no gat soa, hemia blad blong Kraes.”—1 Pita 1:​18, 19; fut.

¹⁶ Ransom sakrefaes blong Jisas nao i mekem se yumi save kam fri long sin mo ded. (Rom 5:21) Taswe yumi wantem tumas blong talem tangkiu long Jehova mo Jisas, from we tufala i pembak yumi tru long blad o laef blong Jisas.—1 Kor. 15:22.

17-18. (1) ?Tok ya “talemaot se oli stret man” i minim wanem? (2) ?Save ya i mekem i gud long yumi olsem wanem?

¹⁷ Long Baebol, tok ya talemaot se oli stret man i givim tingting ya se Jehova i no moa save askem ol man blong hem blong oli pem wan praes from ol sin we oli mekem. Be hemia i no min se hem i go agensem ol loa blong hem long saed blong stret fasin. Hem i talemaot se yumi stret man, i no from we yumi traehad blong gat ol gudfala fasin, o se Jehova i no luk ol sin blong yumi. Nogat. Hem i talem se yumi stret man from yumi bilif long plan ya blong atonmen, mo long ransom we i olsem stamba rod blong Jehova i kanselem ol kaon blong yumi.—Rom 3:24; Gal. 2:16.

 ¹⁸ ?Save ya i mekem i gud long yumi olsem wanem? Olgeta we Jehova i jusumaot olgeta blong go rul wetem Jisas long heven, hem i talemaot finis se oli stret man, oli olsem ol pikinini blong God. (Taetas 3:7; 1 Jon 3:1) Mo hem i fogivim sin blong olgeta finis. I olsem we oli neva mekem sin mo oli stret blong kasem Kingdom. (Rom 8:​1, 2, 30) Olgeta we oli gat hop blong laef long wol, God i talemaot finis se oli stret man, oli olsem ol fren blong hem, mo hem i fogivim ol sin blong olgeta finis. (Jem. 2:​21-23) Bigfala hip blong ol man we bambae oli pastru long Amagedon, oli gat janis ya we bambae oli neva ded. (Jon 11:26) “Ol man we oli stret” mo “ol man we oli no stret” we oli stap long beregraon, bambae oli laef bakegen. (Wok 24:15; Jon 5:​28, 29) Yes, olgeta man blong Jehova long wol we oli obei, bambae “oli kasem nambawan laef ya we oli fri olsem ol pikinini blong God.” (Rom 8:21) !Hemia wan nambawan blesing we yumi save kasem from plan ya blong atonmen, we Papa blong yumi Jehova i mekem blong yumi save fren gud wetem hem bakegen!

19. ?Olsem wanem problem we yumi fesem i jenis i kam gud moa? (Mo tu yu luk bokis ya “ Fasin Blong Jehova Blong Fogivim Man.”)

¹⁹ I tru se samting we yumi fesem i sem mak olsem blong yangfala man ya we yumi tokbaot hem long stat, we i lusum evri samting mo i kasem wan bigfala kaon we hem i no save pembak. Be yumi glad se Jehova i givhan long yumi. Problem we yumi fesem i jenis from plan ya blong atonmen mo ransom. Bilif we yumi gat long Jisas Kraes i mekem se God i save pembak yumi o mekem yumi kam fri long sin mo ded. Mo tu, Jehova i save kanselem ol kaon mo waepemaot ol sin blong yumi. Mo samting we i moa impoten, hemia se naoia yumi save fren gud bakegen wetem Papa blong yumi Jehova.

20. ?Bambae yumi tokbaot wanem long nekis stadi?

²⁰ Taem yumi tingting dip long samting we Jehova mo Jisas i mekem blong yumi, bambae yumi wantem tumas blong talem tangkiu long tufala. (2 Kor. 5:15) !Sipos tufala i no bin givhan long yumi, bambae yumi no gat hop nating! ?Be olsem wanem fasin blong Jehova blong fogivim yumi, i mekem i gud long yumi wanwan? Hemia nao samting we bambae yumi tokbaot long nekis stadi.