TAEM Jisas i tijim ol disaepol blong hem blong oli prij, hem i givim woning long olgeta se samtaem ol man bambae oli no wantem lesin long olgeta. (Luk 10:3, 5, 6) Hemia i semak taem yumi prij, maet sam man oli no glad long yumi o oli kros long yumi. Taem oli mekem olsem, maet i had blong yumi soem sore long olgeta mo wantem blong prij long olgeta.

Man we i gat sore i luksave nid o problem blong narafala, i sore long olgeta, mo i wantem blong givhan long olgeta. ?Be olsem wanem sipos yumi no moa gat sore long olgeta we yumi mitim olgeta long wok blong prij? Bambae yumi no moa gat strong tingting blong prij long olgeta, mo bambae yumi no naf blong halpem olgeta. Strong tingting we yumi gat i olsem faea. Blong mekem faea i laet gud, i nidim plante oksijen. Long sem fasin, blong gat strong tingting blong prij, yumi nidim blong gat sore long narafala. —1 Tesalonaeka 5:19.

?Yumi save mekem wanem blong gat sore long ol man nating se samtaem i had? Bambae yumi tokbaot eksampol blong Jehova, Jisas, mo aposol Pol, mo luk olsem wanem yumi save folem eksampol blong olgeta.

Blong plante taosen yia finis, ol man oli talem ol giaman tok long saed blong Jehova. Nating se i olsem, hem i “kaen long ol rabis man mo long olgeta we oli no stap talem tangkiu long hem.” (Luk 6:35) ?Olsem wanem Jehova i kaen long olgeta? Hem i gat longfala tingting, mo hem i wantem sevem “ol defdefren kaen man.” (1 Timoti 2:3, 4) Nating se God i no laekem nogud fasin, be hem i tinghae long laef blong ol man mo hem i no wantem se wan man i ded. —2 Pita 3:9.

Jehova i save se Setan i waes blong mekem ol man oli bilivim ol giaman toktok. (2 Korin 4:3, 4) Plante man oli kasem ol giaman tijing long saed blong God, stat taem oli smol. Nao i had blong oli akseptem trutok, from ol giaman tijing ya i stap long tingting mo filing blong olgeta. Be Jehova i wantem blong halpem olgeta. ?Olsem wanem yumi save samting ya?

Yu traem tingbaot filing we Jehova i gat long ol man Nineve. Nating se oli ol rabis man, be Jehova i talem long Jona se: “I stret nomo blong mi mi sore moa long bigfala taon ya Nineve, from we long ples ya i gat moa long wan handred twanti taosen pikinini oli stap, we oli no save wanem i gud mo wanem i nogud.” (Jona 4:11) Jehova i sore long ol man Nineve we oli no save trutok. Ale hem i sanem Jona blong givim woning long olgeta.

Yumi gat sem filing olsem we Jehova i gat long ol man. Yumi tinghae long laef blong olgeta. Olsem Jehova, yumi wantem givhan long olgeta blong oli save Jehova nating sipos oli no wantem akseptem trutok.

Taem ol man oli no glad blong lesin long  mesej we yumi talemaot, i gud yumi traem blong kasemsave from wanem i olsem. Maet oli gat nogud tingting long saed blong Baebol o long ol Kristin, from we oli luk se sam man we oli talem se oli Kristin oli mekem ol rabis samting. Samfala maet oli harem sam giaman toktok long saed blong bilif blong yumi. Mo sam narafala oli fraet se ol famle o ol man long komuniti blong olgeta bambae oli jikim olgeta sipos oli toktok wetem yumi.

Maet sam man we yumi mitim olgeta, oli bin fesem sam trabol we i afektem olgeta bigwan. Kim we i wan sista mo i misinari, i talem se i gat wan wo i hapen long teritori blong hem, mo plante man oli lusum evri samting we oli gat. Ale oli no gat hop long fiuja, oli kam kros mo oli no trastem wan man. Plante taem ol man long teritori ya oli traem blong stopem ol Witnes blong oli no prij. Wan taem oli kilim Kim taem hem i stap prij.

?Olsem wanem Kim i soemaot se hem i gat sore, nating se ol man oli mekem i nogud long hem? Oltaem Kim i tingbaot Ol Proveb 19:11, we i se: “Sipos yu gat hed, bambae yu no save kros kwik.” Taem hem i tingbaot trabol we i bin hapen long ol man long teritori ya, hemia i givhan long hem blong gat sore long ol man. Be i gat sam man long teritori we oli kaen long hem mo hem i gat sam gudfala visit.

I gud yu askem se: ‘?Sipos mi mi no save trutok, bambae mi mekem wanem taem ol Witnes oli prij long mi?’ Eksampol, ?olsem wanem sipos yu bin harem plante giaman toktok long saed blong ol Witnes? Maet yu tu bambae yu no glad mo yu nidim blong oli soem kaen fasin long yu. Jisas i talem se yumi mas mekem i gud long narafala, olsem we yumi wantem se narafala i mekem i gud long yumi. Taswe, yumi mas kasemsave filing blong narafala mo gat longfala tingting long olgeta, nating sipos i had. —Matiu 7:12.

Aposol Pol i soem sore long ol man we oli agensem hem long wok blong prij. ?From wanem hem i mekem olsem? From we hem i tingbaot laef we hem i bin gat bifo. Hem i se: “Bifo mi mi stap tok nogud long God, mo mi stap ronem mo kilim ol man blong hem, mo mi no gat respek nating long ol narafala. Be mi mi mekem ol samting ya from we mi mi no gat save mo mi no gat bilif, taswe hem i sore long mi.” (1 Timoti 1:13) Pol i save se Jehova mo Jisas tufala i sore bigwan long hem. Hem i kasemsave from wanem ol man oli wantem stopem hem taem hem i prij, from we bifo hem tu i mekem fasin ya.

Samtaem Pol i mitim ol man we oli bilif strong long ol giaman tijing. ?Hem i gat wanem filing long taem olsem? Long Ol Wok 17:16, yumi ridim se taem Pol i stap long Atens, “hem i luk we taon ya i fulap gud long ol aedol,  nao hem i no glad nating.” Nao Pol i yusum sem samting we i bin hapen long hem, olsem wan rod blong tijim ol man ya. (Ol Wok 17:22, 23) Hem i jenisim fasin blong hem blong prij, mo hem i yusum ol defdefren rod blong toktok long ol man we oli gat defdefren fasin blong laef, blong hem i “save sevem sam long olgeta.” —1 Korin 9:20-23.

Taem yumi prij long ol man we oli no soem kaen fasin o oli gat ol giaman bilif, yumi save folem eksampol blong Pol. Hemia blong yusum save we yumi gat long saed blong olgeta, mo halpem olgeta blong save “gud nius, we i nius blong pis.” (Aesea 52:7) Wan sista we nem blong hem Doroti i talem se: “Long teritori blong mifala, plante man oli gat tingting ya se God i no gat sore mo i kwik blong jajem man. Mi mi talem gudfala tok long olgeta from we oli gat strong bilif long God, be mi pulum olgeta blong luk wanem we Baebol i talem long saed blong ol gudfala fasin blong Jehova, mo promes blong hem long fiuja.”

Mo tu, yumi mas leftemap tingting blong ol brata mo sista taem yumi prij wetem olgeta. Taem Jesika i prij wetem ol narafala, mo wan long olgeta i gat wan nogud ekspiriens, Jesika i no wantem gohed blong tokbaot samting ya, be hem i traem blong tokbaot ol gudfala samting, olsem ol gudfala frut we i kamaot long wok blong prij, nating se samfala oli no glad blong lesin.

Jehova i savegud se samtaem i had blong yumi prij. !Be hem i glad tumas taem yumi gat sore olsem hem! (Luk 6:36) I tru, Jehova i sore mo i gat longfala tingting long ol man, be i gat mak blong hem. Yumi sua se hem i save stret taem blong finisim ol rabis man. Be go kasem taem ya, oltaem yumi mas prij. (2 Timoti 4:2) Taswe i gud yumi gohed blong gat strong tingting blong prij mo blong gat sore long “ol defdefren kaen man.”