SAMWE long yia 670 B.K.T., Asiria i kam bigfala politik paoa blong wol. Websaet ya The British Museum i talem se “hem i stat rul long wes blong Saepras i go kasem is blong Iran, mo sam yia biaen, hem i rulum Ijip tu.” Mo taon blong hem, Nineve, i bigwan moa i bitim olgeta taon long wol. Hem i gat plante naesfala garen, ol bigbigfala pales, mo ol bigfala laebri. Ol disaen long wol blong olfala Nineve oli soemaot se King Ashurbanipal, hem i sem mak long ol narafala king blong Asiria, we oli stap singaot olgeta wan se “king blong wol.” Long taem ya, i luk olsem se i no gat wan nara kantri we i save winim Asiria mo Nineve.

Be taem rul blong Asiria i stap kam strong moa, profet blong Jehova, hemia Sefanaea, i talem se: “Bambae [Jehova] . . . i distroem Asiria, mo bambae hem i mekem Nineve i emti, i drae olgeta olsem draeples.” Mo tu, profet Neham i talemaot se: “!Karem ol silva, karem ol gol! . . . !Taon ya i emti, i stap nating nomo, mo i nogud olgeta! . . . Evriwan we oli luk yu bambae oli ronwe long yu mo oli se, ‘!Oli distroem Nineve finis!’” (Sef. 2:13; Neham 2:9, 10; 3:7) Ating taem ol man oli harem ol profet tok ya, oli save gat tingting se: ‘?Hemia i posibol ya? ?I gat wan narafala kantri we i naf blong winim Asiria? Maet i had blong bilivim samting ya.

!Nating se i olsem, ol profet tok ya oli kamtru! Smol taem bifo long yia 600 B.K.T., ol man Babilon mo Media oli winim Asiria. !Afta long taem ya, ol man oli no moa laef long Nineve, mo sloslo ol man oli fogetem taon ya fulwan! Buk ya The Metropolitan Museum of Art in New York i talem se: “Taon ya i lus fulwan, mo ol man oli save Nineve nomo from ol stori we i stap long Baebol.” Long stat blong ol yia 1800, The Biblical Archaeology Society i talem se, “i nogat man i save talem sipos bigfala taon blong Asiria i bin stap.” Be biaen long yia 1845, akeolojist ya Austen Henry Layard, i stat blong digim graon long ples we olfala taon blong Nineve i bin stap long hem. Samting we hem i faenem i soemaot se bifo, Nineve i wan naesfala taon.

Ol profet tok we oli kamtru long saed blong Nineve, oli mekem yumi bilif strong se ol profet tok we oli tokbaot en blong ol politik paoa blong wol ya, oli mas kamtru tu.—Dan. 2:44; Rev. 19:15, 19-21.