PLANTE MAN OLI TALEM SE, BLONG GAT WAN GUDFALA LAEF MO STAP GLAD, YU MAS GAT MANE MO PLANTE SAMTING. Taswe plante milian man oli wok had plante aoa evri dei blong winim mane. ?Be mane mo olting oli rili givim glad? ?Laef blong ol man i soemaot wanem?

Wan buk (Journal of Happiness Studies) i talem se, taem yumi kasem moa mane i bitim wanem we yumi nidim, hemia i no mekem yumi glad moa. Wan magasin (Monitor on Psychology) i talem se i no mane we i mekem trabol long yumi, “be sipos yumi traehad oltaem blong kasem moa [mane], hemia nao samting we i mekem se yumi no glad.” Ol tok ya oli sem mak long advaes we Baebol i givim klosap 2,000 yia bifo, i se: ‘Fasin blong laekem mane tumas, hem i stamba blong olgeta samting we i save mekem man i harem nogud. Sam man oli wantem tumas blong gat fasin ya, nao oli stap harem nogud long plante samting.’ (1 Timoti 6:9, 10) ?Oli harem nogud long wanem samting?

RIJMAN I WARI MO I NO SLIP GUD. ‘Man we i stap wok strong oltaem, maet hem i kakae we i fulap gud no i no fulap gud, be long naet, hem i save slip gud. Be rijman hem i no save slip gud, from we i stap tingting tumas long ol samting we hem i gat.’—Prija 5:12.

HAREM NOGUD TAEM SAMTING WE YU WANTEM I NO KAMTRU. Samting ya i save hapen taem man i wantem kam rij, be i neva kasem inaf. Baebol i talem se: ‘Sipos yu laekem mane tumas, nating we mane blong yu i plante olsem wanem, be neva yu save talem se yu harem gud. Mo neva yu save kasem ol samting we yu yu wantem.’ (Prija 5:10) Mo tu, man we i wantem tumas blong kam rij, i lego plante impoten samting we oli save mekem hem i glad, olsem spenem taem wetem ol fren mo famle, mo mekem wosip.

TINGTING I FOLDAON MO YU KROS TAEM BISNES O MANE I GODAON. Baebol i talem se: “I nogud yu stap hadwok tumas blong kam rijman. Man we i waes i no save mekem olsem. Mane blong yu bambae i flae kwiktaem nomo.”—Ol Proveb 23:4, 5.

GLAD LONG SAMTING WE YU GAT. Baebol i talem se: “Taem yumi bon i kam long wol ya, yumi no karem wan samting, mo taem yumi ded, bambae yumi no karem wan samting i go wetem yumi. Taswe sipos yumi gat kakae blong yumi mo klos blong yumi, hemia i naf.” (1 Timoti 6:7, 8) Man we i harem gud long samting we hem i gat i no stap komplen, mo i no kavetem samting we narafala i gat. Hem i no wantem samting we hem i no naf blong pem, taswe hem i no wari tumas mo kam sik from.

GIVIM PRESEN. Baebol i talem se: “Man i harem gud moa taem hem i givim samting long narafala, i bitim we hem i kasem samting.” (Ol Wok 20:35) Man we i givim presen, hem i glad from we i traehad blong mekem narafala i glad, nating se hem i givim taem mo paoa blong hem nomo. Hem i kasembak samting we mane i no save pem, hemia lav, respek, mo ol trufala fren we oli glad blong givim samting long hem.—Luk 6:38.

TINGBAOT NARAFALA BE I NO OLTING. Baebol i talem se: “Sipos man i stap kakae drae nomo wetem ol man we oli lavem hem, hemia i moa gud, i winim we i stap kakae gudfala mit wetem ol man we oli no laekem hem nating.” (Ol Proveb 15:17) ?Vas ya i tijim yumi long wanem? Ol gudfala fren we oli lavem yumi oli sas moa i bitim ol samting we yumi save kasem. Mo tu, blong glad, yumi nidim we narafala i lavem yumi.

Wan woman long Saot Amerika, nem blong hem Sabina, i faenemaot olsem wanem ol rul blong Baebol oli givhan blong mekem hem i glad. Man blong hem i lego hem, taswe hem i mas wok had blong kasem ol samting we hem mo tufala gel blong hem oli nidim. Hem i mas wekap evri moning long 4 klok from we hem i mekem tu wok. Nating se hem i bisi tumas mo i taed, be hem i wantem stadi Baebol. ?Wanem i kamaot from?

!Hem i no winim moa mane, be hem i harem gud moa! ?From wanem? From we hem i luksave se hem i nidim God long laef blong hem. (Matiu 5:3) Hem i faenem ol trufala fren we oli wosipim God. Mo taem hem i serem ol save we hem i lanem, hem i glad moa.

“Baebol i talem se: “Ol gudfala wok blong man we i waes, oli soemaot se waes ya i tru.” (Matiu 11:19) !Ol gudfala frut we i kamaot taem yu harem gud long samting we yu gat, yu givim presen, mo yu tingbaot narafala be i no olting, i soemaot se rod ya i beswan!