Man we i mekem gud wok, narafala i trastem hem se bambae hem i mekem gud wok we oli givim long hem, mo i save finisim long stret taem.

Nating se pikinini i smol yet, hem i save stat blong lanem blong mekem gud wan wok. Buk ya Parenting Without Borders i talem se: “Taem pikinini i gat 15 manis, hem i mekem evri samting we papa mama i talem. Be taem hem i gat 18 manis, hem i kopi samting we papa mama i mekem. Long plante ples, taem pikinini i gat samwe long 5 kasem 7 yia, papa mama i stat blong soem olsem wanem hem i save mekem ol wok long haos. Nating se hem i smol yet, be hem i naf blong mekem plante wok.”

Plante yangfala oli traem blong laef olgeta wan. Be taem oli kasem trabol, oli gobak long papa mama blong olgeta. Samting ya i hapen long yangfala we papa mama i neva tijim hem blong yusumgud mane, lukaot long famle, mo mekem ol narafala wok.

Taswe i gud yu stat naoia blong tijim pikinini blong i mekem gud wok, nao taem hem i kam bigwan, bambae hem i save wanem blong mekem. Buk ya How to Raise an Adult i talem se: “I nogud pikinini i dipen long yu kasem we hem i gat 18 yia, nao yu letem hem i go laef hem wan we i no save wanem blong mekem.

Givim wok long hem.

ADVAES BLONG BAEBOL: “Sipos man i stap wok had, bambae hem i stap win.”—Ol Proveb 14:23.

Pikinini i glad blong givhan long papa mama. Taswe, i gud yu tekem janis ya blong givim sam smol wok raon long haos.

Sam papa mama oli no wantem pikinini i mekem ol wok long haos from we hem i gat fulap homwok finis.

Be pikinini we i mekem ol wok long haos, hem i wok gud long skul from hem i lanem blong statem mo finisimgud wan wok. Buk ya Parenting Without Borders, i talem se: “Sipos yumi no letem pikinini i givhan taem hem i wantem, bambae hem i ting se i no impoten blong givhan long narafala . . . Mo se narafala bae i mekem evri samting blong hem.”

Yes, taem pikinini i mekem ol wok long haos, hem i lanem blong halpem narafala mo i no tingbaot hem wan. Mo hemia i halpem hem blong luksave se hem i gat wan impoten wok insaed long famle, mo hem i mas mekem gud wok ya.

 Halpem pikinini blong i stretem mastik blong hem.

ADVAES BLONG BAEBOL: “Lesin long advaes, mo letem [narafala] i stretem yu, blong yu save kam waes long fiuja blong yu.”—Ol Proveb 19:20, NW.

Taem pikinini i mekem mastik, eksampol, sipos hem i spolem samting blong narafala, yu no mas haedem samting we i hapen. Pikinini i rere blong lanem lesen from mastik blong hem. Taswe papa mama i mas givhan long hem blong talem sori mo givimbak samting we hem i spolem.

Taem pikinini i luksave se hem i stamba blong trabol ya, bambae hem i . . .

• tok tru mo i talemaot rong blong hem

• no blemem narafala

• no mekem eskius

• talem sori taem i stret blong mekem