Sakemaot “Ol Wok We i No Gat Frut Blong Hem”

“Fasin ya we man i stap westem taem blong hem long ol wok we i no gat frut blong hem, hemia i krangke nomo.”—PROV. 12:11.

1. ?Wanem sam nambawan samting we yumi gat? ?Wanem nao beswan rod blong yusum ol samting ya?

YUMI ol Kristin, yumi gat sam nambawan samting blong yumi. Maet hemia gudfala helt, strong bodi, gud hed, mo mane. From we yumi lavem Jeova, yumi glad blong yusum ol samting ya long wok blong hem. Long rod ya, yumi folem advaes ya we i kamaot long God, se: “Yu mas tekem . . . ol nambawan samting . . . we yu kasem . . . , yu givim i go long Hae God, blong yu ona long hem.”—Prov. 3:9.

2. ?Baebol i givim wanem woning long saed blong ol wok we i no gat frut blong hem? ?Olsem wanem tok ya i stret long saed blong wok blong kasem prapa kakae blong yumi?

² Be Baebol i tokbaot sam samting we oli nogud tu, oli olsem nating nomo. Hemia ol wok we i no gat frut blong hem, mo Baebol i givim woning se yumi no mas westem taem blong yumi long ol wok ya. Ol Proveb 12:11 i tokbaot olgeta, i se: “Man we i stap wok had long garen blong hem, hem i gat plante kakae blong hem, be fasin ya we man i stap westem taem blong hem long ol wok we i no gat frut blong hem, hemia i krangke nomo.” I isi nomo blong luksave olsem wanem tok ya i stret long saed blong wok blong kasem prapa kakae blong yumi. Sipos wan man i yusum taem mo paoa blong hem blong wok had blong kasem evri samting we famle blong hem i nidim, bambae hem i save kasem plante samting mo famle i save stap gud. (1 Tim. 5:8) Be sipos hem i westem taem mo paoa blong hem long ol wok we i no gat frut blong hem, hem i wan “krangke” man, from we hem i no naf blong skelemgud samting mo tekem gudfala desisen, mo i no gat wan gudfala tingting i pusum hem. Ating man ya bambae i sot long plante samting.

3. ?Olsem wanem woning blong Baebol long saed blong ol wok we i no gat frut blong hem i joen long wosip blong yumi?

³ ?Be olsem wanem sipos yumi joenem tingting ya long proveb wetem wosip blong yumi? Bambae yumi luksave se wan Kristin we i wok strong mo i holemstrong long wok blong Jeova, hem i save stap gud, i no fraet long wan samting. Hem i save sua se God bambae i blesem hem naoia, mo i suagud long ol nambawan samting we God i promes blong givim long fiuja. (Mat. 6:33; 1 Tim. 4:10) Be wan Kristin we i westem taem long ol wok we i no gat frut blong hem, hem i save lusum gudfala fasin fren blong hem wetem Jeova, mo i save spolem janis blong hem blong kasem laef we i no save finis. ?Olsem wanem yumi save blokem samting ya? Yumi mas luksave ol wok mo ol samting long laef blong yumi we “i no gat frut” blong hem, mo yumi mas gat strong tingting blong sakemaot olgeta.—Ridim Taetas 2:11, 12.

4. ?Wanem bigfala mining blong ol wok we i no gat frut blong hem?

⁴ ?Oraet, wanem ol wok we i no gat frut blong hem? Bigfala mining blong tok ya, se eni samting we i mekem se yumi no moa mekem wok blong Jeova wetem ful laef blong yumi. Maet hemia sam samting we yumi mekem blong spel. I tru, yumi nidim blong spel smol. Be sipos yumi spenem tumas taem blong pleplei, bambae yumi no moa mekem ol wok we i joen wetem wosip blong yumi. Long taem olsem, spel mo pleplei i kam wan wok we i no gat frut blong hem, mo i save spolem fasin fren blong yumi wetem God. (Pri. 2:24; 4:6) Blong blokem samting ya, wan Kristin i mas lanem blong skelemgud ol samting, mo i mas lukaotgud olsem wanem hem i stap yusum taem blong hem, we i olsem wan nambawan samting blong hem. (Ridim Kolosi 4:5.) Be i gat sam wok we i no gat frut blong hem, we oli moa nogud i winim spel mo  pleplei. Wan long olgeta ya, hemia wosip blong ol giaman god.

Sakemaot Wosip Blong Ol God We Oli Nating Nomo

5. ?Plante taem Baebol i joenem tingting ya blong wok we i no gat frut blong hem, wetem wanem?

⁵ Yumi makem se plante vas blong Baebol we oli karem tingting ya blong wok we i no gat frut blong hem, oli stap tokbaot wosip blong ol giaman god. Tingbaot we Jeova i talem long ol man Isrel se: “Bambae yufala i no mas wokem ol aedol [“we oli no save givhan long yufala nating,” NW], mo yufala i no mas wokem ol pija blong wan samting long wud no long ston no wanem, blong yufala i mekem wosip long olgeta. Mo yufala i no mas stanemap ol longlongfala ston, mo ol ston we yufala i katemgud olgeta blong flasem, blong yufala i mekem wosip long olgeta.” (Lev. 26:1) King Deved i raetem se: “Hae God i hae we i hae, mo yumi mas presem hem, yumi mas leftemap nem blong hem. Hem i hae moa long ol narafala god, mo i stret blong yumi ona moa long hem, i winim we yumi ona long ol narafala god. Olgeta god ya blong ol man blong ol narafala kantri oli giaman god nomo, oli no save mekem wan samting, be Hae God ya, hem i mekem skae, wetem olgeta samting we i stap long hem.”—1 Kron. 16:25, 26.

6. ?From wanem wosip blong ol giaman god i wan wok we i no gat frut blong hem?

⁶ Olsem Deved i talem, plante samting we oli stap raonabaot long yumi, oli soemaot bigfala paoa blong Jeova. (Sam 139:14; 148:1-10) !Ol man Isrel oli kasem wan bigfala ona! !Jeova i mekem wan kontrak wetem olgeta! !Sipos oli tanem baksaed long hem blong bodaon long ol pija mo tabu ston, oli krangke nomo! Taem oli fesem trabol, ol giaman god ya oli no save givhan long olgeta nating. Ol god ya oli no gat paoa blong sevem ol man Isrel, mo oli no save mekem wan samting blong sevem olgeta wan bakegen.—Jaj. 10:14, 15; Aes. 46:5-7.

7, 8. ?Olsem wanem “mane” i save kam wan god?

⁷ Tede tu, long plante kantri, ol man oli stap bodaon long ol aedol we man nomo i katem. Ol god ya oli sem mak long ol giaman god long taem bifo, oli no gat paoa nating blong givhan long man. (1 Jon 5:21) Be i no ol aedol nomo we oli giaman god. Baebol i tokbaot sam narafala samting tu we oli save kam olsem giaman god. Tingbaot tok ya blong Jisas: “I no gat man we i save wok blong tu masta wantaem. Sipos man i mekem olsem, bambae hem i laekem wan, be i no laekem narawan, i agens long hem. No bambae hem i save ona long wan masta, be i stap lukluk nogud long narawan. Yufala i no save mekem we God i bos blong yufala, be long semtaem nomo, mane tu i bos blong yufala.”—Mat. 6:24.

⁸ ?Olsem wanem “mane” i save kam wan god? Tingbaot ol man Isrel long taem bifo. Sipos wan man Isrel i faenem wan ston long garen blong hem, hem i save yusum ston ya blong bildim haos no stonwol. No hem i save yusum ston ya long wan narafala fasin. Hem i save “stanemap” ston ya no ‘katemgud blong flasem,’ nao i bodaon long hem. Sipos man ya i wan man blong Jeova, ston ya i save kam wan samting we i mekem hem i foldaon. (Lev. 26:1) I sem mak long mane. Mane i save mekem i gud long yumi. Yumi nidim mane blong pem ol samting blong laef, mo yumi save yusum long wok blong Jeova tu. (Pri. 7:12; Luk 16:9) Be sipos yumi ronem mane tumas nao hem i kam moa impoten i bitim Kristin wok blong yumi, hem i kam olsem god blong yumi nao. (Ridim 1 Timoti 6:9, 10.) Ol man blong wol ya oli ting se i impoten tumas blong gat mane. Taswe, yumi mas lukaotgud se yumi holem stret tingting long saed blong mane.—1 Tim. 6:17-19.

9, 10. (a) ?Wanem tingting blong ol Kristin long saed blong edukesen? (b) ?Wanem trabol i save kamaot long hae edukesen?

⁹ Wan narafala samting we i save kam wan wok we i no gat frut blong hem, hemia edukesen. I tru, yumi wantem we ol pikinini blong yumi oli skulgud. Olsem nao, oli save lukaotgud long ol prapa nid blong olgeta taem oli kam bigwan. Mo tu, wan Kristin i mas skulgud blong i save ridim Baebol mo kasem mining blong hem, skelem ol problem, tekem gudfala desisen, mo tijim ol narafala long ol trutok blong Baebol, long fasin we i klia mo i halpem olgeta blong kasem bilif. I tekem taem blong kasem wan gudfala edukesen, be hemia taem we yumi no westem.

¹⁰ ?Be olsem wanem long hae edukesen long yunivesiti? Plante man oli ting se ol yangfala oli nidim edukesen ya blong oli save win long laef. Be traem tingbaot: Plante we oli kasem hae edukesen oli finis wetem wan tingting we i fulap long ol rabis waes blong wol ya nomo. Edukesen olsem i westem ol beswan yia blong laef, we yangfala i save yusum long wok blong Jeova. (Pri. 12:1) Mo long ol kantri we plante oli kasem hae edukesen, namba blong ol man we oli bilif long God i stap godaon. Ol Kristin oli no lukluk i go long hae edukesen blong wol ya blong mekem laef blong olgeta i stanap gud, be oli trastem Jeova nomo.—Prov. 3:5.

 No Letem Samting We Yumi Nomo i Wantem i Kam Wan God

11, 12. ?From wanem Pol i tokbaot samfala se, “kakae nomo i god blong olgeta”?

¹¹ Leta we aposol Pol i raetem long ol Kristin long Filipae, i soemaot wan narafala samting we i save kam wan god. Hem i tokbaot ol man we fastaem oli bin mekem trufala wosip, i se: “I gat plante man naoia, we long laef blong olgeta, oli enemi blong gud nius blong ded blong Kraes . . . Mi mi talem tok ya long yufala plante taem finis, mo naoia mi mi talem bakegen, we wota i stap ron long ae blong mi. Olgeta ya oli man blong lus nomo. Kakae nomo i god blong olgeta . . . Olgeta oli stap putum tingting blong olgeta long ol samting blong wol ya nomo.” (Fil. 3:18, 19) ?Olsem wanem kakae i save kam wan god?

¹² I luk olsem we ol fren blong Pol oli letem ol samting we olgeta nomo oli wantem, i kam moa impoten i bitim wok blong Jeova we oli mekem wetem Pol. Maet sam long olgeta oli foldaon long fasin ya blong kakae bitim mak no dring gogo oli fuldrong. (Prov. 23:20, 21; skelem wetem Dutronome 21:18-21.) Maet sam narafala long faswan handred yia oli tekem janis we wol i givim long olgeta, ale oli no moa spenem plante taem long wok blong Jeova. Yumi no mas wantem tumas blong gat wan gudfala laef long wol ya, nao yumi kam slak blong mekem wok blong Jeova wetem ful laef blong yumi.—Kol. 3:23, 24.

13. (a) ?Man we i stap wantem evri samting, hem i gat wanem fasin? ?Pol i talem se fasin ya i olsem wanem samting? (b) ?Olsem wanem yumi save stap longwe long fasin ya?

¹³ Pol i tokbaot sam narafala samting bakegen we oli olsem wosip blong ol giaman god. Hem i raetem se: “Yufala i mas kilimaot ol fasin ya blong yufala, we oli blong wol ya nomo. Hemia ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas, mo olgeta oli stap wantem tumas ol sin. Mo olgeta oli stap wantem evri samting, be fasin ya, we man i stap wantem evri samting, hemia i olsem nomo we hem i stap mekem wosip long ol narafala god.” (Kol. 3:5) Sipos yumi gat fasin ya blong wantem evri samting, yumi stap traem blong kasem samting we i no blong yumi. Maet hemia olting, no maet rabis fasin long saed blong seks. (Eks. 20:17) Ol samting ya we yumi stap wantem oli save kam olsem wan aedol, no wosip blong wan giaman god. !Hemia wan nogud samting ya! Jisas i talem wan klia pijatok blong soemaot olsem wanem i impoten blong sakemaot ol samting we yumi wantem we oli no stret, nating se yumi mas harem nogud from.—Ridim Mak 9:47; 1 Jon 2:16.

Lukaot Se Toktok Blong Yumi i No Kam Wan Wok We i No Gat Frut Blong Hem

14, 15. (a) ?Wanem samting we ‘i no givhan’ long plante man long taem blong Jeremaea? (b) ?From wanem ol tok blong Moses i olsem wan wok we i gat frut blong hem?

¹⁴ Ol toktok blong yumi tu i save kam wan wok we i no gat frut blong hem. Taswe, Jeova i talem long Jeremaea se: “Ol profet ya oli stap yusum nem blong mi, be oli giaman nomo. Mi mi no sanem olgeta i kam, mo mi no givim tok long olgeta blong oli kam talemaot. Mo ol vison ya we oli stap tokbaot long yufala, mi mi no soemaot long olgeta nating. Ol samting ya we oli stap talem se bambae i kamtru, hemia i tingting blong olgeta nomo, mo i no save givhan long yufala.” (Jer. 14:14) Ol giaman profet ya oli stap talem se oli toktok long nem blong Jeova. Be oli stap talemaot tingting blong olgeta nomo, ol prapa waes blong olgeta. Taswe, ol tok blong olgeta “i no save givhan”  long ol man. Ol tok ya i nating nomo, mo i save spolem trufala wosip. Plante man we oli bin lesin long ol toktok blong olgeta ya, oli ded long han blong ol soldia blong Babilon long yia 607 B.K.T. *

¹⁵ Be Moses i tokbaot ol tok we i save givhan long ol man Isrel, i se: “Yufala i mas lukaot gud blong obei long olgeta loa ya we [God i] givim long yufala tede. . . . !Yufala i mas save! Ol tok ya oli no toktok nating nomo, laef blong yufala i stap long hem, mo yufala i mas obei long hem, blong bambae yufala i save stap longtaem long kantri ya we i stap narasaed Jodan Reva, we yufala i stap go blong holem.” (Dut. 32:46, 47) Yes, ol tok ya blong Moses oli kamaot long God. From samting ya, oli ol gudfala samting we bambae i gat frut blong hem. Yes, ol tok ya i save givhan long neson ya mo mekem i gud long olgeta. Olgeta we oli lesin long tok ya oli gat wan longfala laef mo plante samting. Oltaem yumi mas sakemaot ol tok we i toktok nating nomo, mo holemtaet ol trutok we oli gud tumas.

16. ?Wanem tingting blong yumi long saed blong tok blong ol saentis we i agensem Tok blong God?

¹⁶ ?Olsem wanem? ?I gat ol toktok tede we i olsem wok we i no gat frut blong hem? Yes. Sam saentis oli talem se tijing blong evolusen mo sam narafala save blong olgeta, oli soemaot se yumi no moa nidim bilif long God. Oli talem se evri samting i kamaot olsem nomo, i no kamaot long God. ?Yu ting se yumi mas lesin long ol flas tok olsem? !Nogat! Waes blong man i narakaen long waes blong God. (1 Kor. 2:6, 7) Yumi save finis se, taem tijing blong man i agensem samting we God i talem, oltaem tijing blong man nao i rong. (Ridim Rom 3:4.) Nating se ol saentis oli faenemaot plante niufala samting, be tok blong Baebol long saed blong waes blong man i tru yet, se: “Olgeta fasin we ol man blong wol oli stap talem se oli waes, be long fes blong God oli krangke nomo.” Taem yumi skelem ol save blong man wetem ol waes blong God we i no gat mak blong hem, ol samting we man i faenemaot i nating nomo.—1 Kor. 3:18-20.

17. ?Wanem tingting we yumi mas gat long saed blong ol tok blong ol lida blong Krisendom mo ol tok blong ol man blong apostasi?

¹⁷ Sam narafala tok we i olsem toktok nating nomo, hemia ol tok blong ol lida blong Krisendom. Oli stap talem se oli toktok long nem blong God. Be plante long ol tok blong olgeta i no stanap long Baebol, mo i no save gat frut blong hem. Ol man blong apostasi tu oli talem ol tok we i olsem toktok nating nomo. Oli ting se oli moa waes i bitim “slef ya we i stret mo waes” we Jisas i putumap. (Mat. 24:45-47, NW) Ol man blong apostasi oli talemaot ol prapa waes blong olgeta nomo. Ol tok blong olgeta i olsem wok we i no gat frut blong hem, mo i save mekem ol man we oli lesin long hem oli foldaon. (Luk 17:1, 2) ?Yumi mas mekem wanem, blong ol tok blong olgeta i no lidim yumi i go krangke?

?Olsem Wanem Blong Sakemaot Ol Toktok We i Nating Nomo?

18. ?Olsem wanem yumi save folem advaes long 1 Jon 4:1?

¹⁸ Taem aposol Jon i kam olfala, hem i givim gudfala advaes long saed ya. (Ridim 1 Jon 4:1.) Folem advaes ya blong Jon, yumi pulum ol man we yumi prij  long olgeta blong oli traem ol samting we oli lanem, i min se, jekem wetem Baebol. Hemia wan gudfala rul we yumi tu yumi save folem. Sipos yumi harem sam tok we i agensem trutok no i spolem nem blong kongregesen, ol elda, no wan Kristin brata blong yumi, yumi no mas hareap blong bilivim tok ya. I moagud yumi askem se: “?Man ya we i stap mekem toktok ya i goraon, hem i stap folem fasin we Baebol i leftemap? ?Stori ya no ol tok ya we i agens, i stap givhan blong mekem plan blong Jeova i kamtru? ?Oli stap mekem pis i stanap long kongregesen no nogat?” Enikaen tok we yumi harem we i no leftemap ol Kristin brata blong yumi be i daonem olgeta, hemia wan wok we i no gat frut blong hem.—2 Kor. 13:10, 11.

19. ?Olsem wanem ol elda oli save mekem se ol tok blong olgeta i no kam toktok nating nomo?

¹⁹ Long saed blong ol tok we i toktok nating nomo, ol elda tu oli save lanem wan impoten samting. Taem oli mas givim advaes long narafala, oli mas tingbaot se oli no save evri samting. Taswe oli no mas givim advaes we i kamaot long prapa save blong olgeta. Oltaem oli mas soem wanem we Baebol i talem. Aposol Pol i talem wan gudfala rul blong folem, i se: “Yufala i mas holem tok ya we oli raetem finis.” (1 Kor. 4:6) Ol elda oli no mas ademap samting long ol tok we Baebol i talem. Mo oli no mas ademap samting long ol advaes we slef we i stret mo waes i givim, long ol buk we oli stanap long Baebol.

20. ?Wanem i save givhan long yumi blong sakemaot ol wok we i no gat frut blong hem?

²⁰ Wok we i no gat frut blong hem i nogud, nating se wok ya i wosip blong ol giaman god, ol toktok blong yumi, no wan narafala samting bakegen. From samting ya, yumi mas prea oltaem long Jeova blong i givhan long yumi blong luksave ol wok we i no gat frut blong hem, mo askem long hem blong i halpem yumi blong sakemaot olgeta. Sipos yumi mekem olsemia, yumi stap talem semfala tok we man blong raetem Sam ya i talem, se: “Plis yu blokem mi blong mi no save folem ol fasin ya we i no gat wan gudfala samting i save kamaot long hem. Plis yu mekem we mi mi gat gudfala laef, we i folemgud ol fasin blong yu.” (Sam 119:37) Long nekis stadi, bambae yumi tokbaot olsem wanem yumi kasem gudfala frut taem yumi letem Jeova i lidim yumi.

[Futnot]

?Yu Yu Save Eksplenem?

• ?Wanem bigfala mining blong “ol wok we i no gat frut blong hem” we yumi mas sakemaot?

• ?Olsem wanem blong no letem mane i kam olsem wan god?

• ?Olsem wanem ol samting we yumi nomo i wantem oli save kam wan aedol?

• ?Olsem wanem yumi save sakemaot ol tok we i no gat frut blong hem?

[Kwestin]

[Tok blong pija long pej 7]

God i talem long ol man Isrel blong ‘wok had long garen blong olgeta,’ oli no mas westem taem long wok we i no gat frut blong hem

[Tok blong pija long pej 9]

Yumi neva mas wantem tumas ol sas samting, nao yumi kam slak long wok blong God

[Tok blong pija long pej 10]

Ol tok blong ol elda oli save karem plante frut