Kam Klosap Long God

Jeova i Givim Wan Jus Long Yumi

Dutronome 30:11-20

WAN Kristin woman i talem se: “Mi save se tingting ya i no stret be samtaem mi fraet se bambae mi no save stap tru long Jeova.” Taem woman ya i pikinini, sam nogud samting i hapen long hem we i mekem se hem i gat nogud tingting ya long hem wan. Taswe nating se hem i traehad, hem i harem se bambae i no save stap tru long Jeova. ?Olsem wanem? ?I tru se ol nogud samting we oli hapen long laef blong yumi oli mekem se yumi no save stap tru long Jeova? Nogat. Jeova God i givim wan presen long yumi, hemia se yumi fri blong jusum samting we yumi wantem mekem. Yumi save mekem prapa jus blong yumi se bambae yumi laef olsem wanem. Jeova i wantem se yumi mekem ol gudfala jus, mo Tok blong hem, Baebol, i talem olsem wanem yumi save mekem olsem. I gud yumi tingbaot ol tok blong Moses we i stap long Dutronome japta 30.

?Olsem wanem? ?I hadwok blong save samting we God i wantem yumi blong mekem mo biaen blong folem ol samting ya? * Moses i talem se: “Ol loa ya we mi mi stap givim long yufala tede oli no strong tumas, mo oli no stap longwe we yufala i no save go blong tekem.” (Vas 11) Ol samting we Jeova i askem yumi blong mekem oli no strong tumas, oli stret nomo mo yumi naf blong folem olgeta. Yumi save faenemaot ol samting ya we God i wantem yumi blong mekem. Yumi no nid blong go antap long “skae” no blong gokros long “narasaed solwota” blong lanem samting we God i wantem yumi blong mekem. (Vas 12, 13) Baebol i talemaot klia stret rod we yumi mas folem long laef.—Maeka 6:8.

Jeova i no fosem yumi blong obei long hem. Moses i talem se: “Tede, mi mi talemaot ol tok ya long yufala blong yufala nomo i jusumaot se yufala i wantem folem ol gudfala fasin, no yufala i wantem folem ol fasin we i nogud. Yufala i mas jusumaot se yufala i wantem laef, no yufala i wantem ded.” (Vas 15) Yumi fri blong jusum ol gudfala fasin no ol rabis fasin, laef no ded. Yumi save jusum blong wosip long God mo obei long hem nao yumi kasem blesing, no yumi save jusum blong no obei long hem mo harem nogud long ol nogud frut we i kamaot from. I stap long yumi nomo blong jusum.—Vas 16-18; Galesia 6:7, 8.

?Olsem wanem? ?Rod we yumi jusum blong folem i impoten long Jeova? !Yes, jus blong yumi i impoten tumas long hem! God i pulum Moses blong talem se: ‘Yufala i mas jusumaot laef.’ (Vas 19) ?Be olsem wanem yumi save jusumaot laef? Moses i eksplenem se: “Yufala i mas lavem [Hae God], yufala i mas obei long hem, mo oltaem, tingting blong yufala i mas strong long hem.” (Vas 20) Sipos yumi lavem Jeova, bambae yumi lesin long hem mo tingting blong yumi bambae i stap strong long hem, nomata wanem samting i kam traem yumi. Taem yumi mekem olsem, yumi jusum laef—laef we i beswan naoia mo we i givim janis long yumi blong kasem laef we i no save finis long niufala wol blong God.—2 Pita 3:11-13; 1 Jon 5:3.

Ol tok ya blong Moses oli tijim yumi long wan nambawan trutok we i save leftemap tingting blong yumi bigwan. Nomata wanem nogud samting we yu gotru long hem long rabis wol ya, yu mas blokem tingting ya se yu no save stap tru long Jeova. Yu yu save stap tru long hem. Jeova i tinghae long yu taswe hem i letem yu yu fri blong jusum samting we yu wantem. Yes, yu save jusum blong lavem Jeova, lesin long hem, mo stap tru long hem. Sipos yu mekem olsem, Jeova bambae i blesem ol traehad blong yu.

Woman ya we yumi tokbaot long stat blong haf ya, i harem gud long trutok ya, se yumi fri blong mekem prapa jus blong yumi, blong lavem Jeova mo mekem wok blong hem. Hem i talem se: “Tru ya, mi mi lavem Jeova. Samtaem, mi foget se samting we i moa impoten hemia se mi lavem Jeova. Taswe, mi mi save stap tru long hem.” Wetem help blong Jeova, yu tu yu save stap tru long hem.

[Futnot]