?Olgeta Gudfala Man Bambae Oli Go Long Heven?

AFTA we Jisas i kakae laswan wetem ol aposol blong hem long naet bifo we hem i ded, hem i promes blong givim presen blong laef long heven long olgeta. Hem i talem se: “Long haos blong Papa blong mi, i gat plante rum i stap. Tok ya i tru, taswe mi talemaot long yufala. Naoia bambae mi mi go mekemrere ples blong yufala.” (Jon 14:2) ?From wanem Jisas bambae i givim wan ples long olgeta long heven? ?Bambae oli mekem wanem long heven?

Jisas i stap tingbaot wan spesel wok blong ol disaepol blong hem. Long sem naet ya, hem i talem se: “Yufala ya nao, oltaem yufala i stap wetem mi long olgeta hadtaem we mi mi gotru long hem. Nao olsem we Papa blong mi i putumap mi blong bambae mi mi King, mi tu mi putumap yufala.” (Luk 22:28, 29) God i bin promes se Jisas bambae i King ya we i givim samting we olgeta man oli wantem tumas, hemia wan gudfala gavman. Jisas bambae i tekemaot trabol blong ol man, mo bambae i finisim ol man we oli stap spolem ol puaman. Jisas bambae i rul long ol man we oli stap long evri ples, go kasem ol ples long “en blong wol.” Be jea blong King we Jisas i sidaon long hem bambae i stap long heven.—Ol Sam 72:4, 8; Daniel 7:13, 14.

Jisas bambae i no rul hem wan. Yes, hem i promes long ol aposol blong hem se bambae oli gat ples blong olgeta long heven. Olgeta oli ol faswan man we Jeova i jusum blong oli “king, oli rul long olgeta man long wol.”—Revelesen 5:10.

?Hamas man oli go long heven? Olsem long wan gavman tede, ol man we oli rul long Kingdom blong God oli no plante. Be olgeta we oli stap aninit long rul blong hem bambae oli plante. Jisas i talem long olgeta we bambae oli rul wetem hem se: “Yufala we i smol kampani blong ol sipsip, yufala i no fraet, from we Papa blong yufala hem i glad tumas blong givim kingdom long yufala.” (Luk 12:32, NW) I gat 144,000 man evriwan long “smol kampani blong ol sipsip” ya. (Revelesen 14:1) Namba ya i smol nomo, taem yumi skelem wetem milian man we bambae oli harem gud long laef we i no save finis long wol, aninit long rul blong Kingdom.—Revelesen 21:4.

Taswe, i no olgeta gudfala man evriwan we oli go long heven. Long saed blong gudfala King ya Deved, aposol Pita i talem stret se: “Deved i no go antap long heven.” (Ol Wok 2:34) Jon Baptaes i wan gudfala man. Nating se i olsem, Jisas i soemaot se bambae Jon Baptaes i no rul wetem hem olsem king long heven. Jisas i talem se: “Long olgeta we i bon long wol ya, i no gat man we i hae moa, i winim Jon Baptaes. Be long olgeta we God i kam King blong olgeta [“long kingdom blong heven,” NW], man we i daon moa long olgeta, hem i hae moa long Jon.”—Mat. 11:11.

?Bambae Yu Kasem Presen Ya We i Blong Ol Gudfala Man?

?Man i mas mekem wanem blong i save kasem presen ya blong laef olwe long wol? Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Makem se, lav we God i gat long ol man long wol i pulum hem blong givim janis long olgeta man blong oli save kasem laef we i no save finis. Be ol man nomo we oli “bilif” bambae oli save kasem presen ya.

Bilif i mas stanap long stret save. (Jon 17:3) Yu soemaot se yu yu wan gudfala man, taem yu kasem moa save long stamba tingting blong Jeova long saed blong ol man. Bilif long samting we yu lanem i mas pusum yu blong mekem sam samting. Ale yu save sua se yu tu yu gat janis ya blong kasem laef blong olwe.

 [Bokis blong pija long pej 7]

?Baebol i Talem Wanem?

Kwestin:

?Wanem i hapen long ol gudfala man taem oli ded?

Ansa:

“Ol man we oli ded finis oli no moa save wan samting.”—PRIJA 9:5.

Kwestin:

?Ol gudfala man oli save putum tingting blong olgeta long wanem promes long saed blong fiuja?

Ansa:

“I gat taem i stap kam we ol dedman bambae oli harem voes blong mi [Jisas], nao bambae oli aot long beregraon blong olgeta.”—JON 5:28, 29.

Kwestin:

?Bighaf blong ol gudfala man bambae oli laef long weples?

Ansa:

“Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—OL SAM 37:29.