Wan Kampani We Wan Man Nomo i Lukaot Long Hem

“Yufala we yufala i folem mi, bambae yufala tu i sidaon long twelef bigfala jea blong king. Nao bambae yufala i jajem ol twelef laen blong Isrel.”—MAT. 19:28, NW.

1. ?Jeova i mekem olsem wanem long laen blong Ebraham? ?Jeova i sakemaot ol man blong ol narafala laen, no olsem wanem?

FROM we Jeova i lavem Ebraham, hem i soemaot lav oltaem long laen blong Ebraham tu. Neson blong Isrel i kamaot long Ebraham. Bitim 1,500 yia, Jeova i luk neson ya olsem ol prapa man blong hem, we oli “spesel long fes blong hem.” (Ridim Dutronome 7:6.) ?Olsem wanem? ?Jeova i sakemaot ol man blong ol narafala laen? Nogat. Long olgeta yia ya, Jeova i letem ol man blong ol narafala laen we oli wantem mekem wosip long hem, oli joen wetem neson blong hem. Ol narafala man ya we oli kolem olgeta se ol proselaet, ol man Isrel oli mas luk olgeta olsem we oli manples blong olgeta nomo. Oli mas mekem sem mak long olgeta olsem oli mekem long ol stret brata blong olgeta. (Lev. 19:33, 34) Mo ol man blong ol narafala laen ya oli mas obei long ol loa blong Jeova.—Lev. 24:22.

2. ?Wanem tok blong Jisas i mekem ol man Isrel oli sek? ?Wanem ol kwestin we oli stanap?

² Be ol man Isrel long taem blong Jisas oli sek long tok ya we hem i talem long olgeta, se: “God bambae i tekemaot kingdom blong hem long yufala, mo bambae i givim long wan neson we i karem gudfala frut.” (Mat. 21:43, NW) ?Hu bambae i stap long niufala neson ya? ?Mo jenis ya i mekem wanem long yumi tede?

Niufala Neson

3, 4. (a) ?Aposol Pita i talem wanem long saed blong niufala neson ya? (b) ?Hu olgeta we oli stap long niufala neson ya?

³ Aposol Pita i talemaot ol klia tok long saed blong niufala neson ya. Hem i raetem leta i go long ol Kristin long taem ya, i se: “Yufala i ‘wan laen we God i jusumaot, wan kampani blong pris mo king, wan tabu neson, ol man we oli blong God nomo, blong yufala i save talemaot ol gudfala fasin’ blong hemia we i singaot yufala i aot long tudak, i kam long nambawan laet blong hem.” (1 Pita 2:9, NW) Olsem profet tok i talem, ol faswan memba blong niufala neson ya, hemia ol prapa man Isrel we oli bilif se Jisas hem i Mesaea. (Dan. 9:27a; Mat. 10:6) Biaen, plante man blong ol narafala laen oli joen long neson ya. Pita i soemaot samting ya taem hem i talem se: “Fastaem yufala i no man blong God, be naoia yufala i kam man blong hem finis.”—1 Pita 2:10.

⁴ ?Pita i stap toktok long hu? Long fastok blong leta blong hem, hem i talem se: “[God] i mekem we yumi bon bakegen, yumi gat niufala laef. Samting ya hem i mekem, taem hem i mekem Jisas Kraes i laef bakegen long ded. Nao from we yumi kam ol niufala man, tingting blong yumi i stap strong long Jisas Kraes, mo i stap kam strong moa oltaem long hem. Mo yumi save se bambae yumi kasem ol gudgudfala samting ya we God i putumgud olgeta oli stap long heven, se oli blong ol man blong hem. Long ples ya ol samting ya oli no save kam nogud, mo oli no save kam roten, mo oli no save lus, from we God i stap lukaot gud long olgeta.” (1 Pita 1:3, 4) Taswe, ol man long niufala neson ya, hemia ol Kristin we tabu spirit i makemaot olgeta. Olgeta ya nao we bambae oli kasem laef long heven. Olgeta ya oli “Isrel blong God.” (Gal. 6:16, NW) Aposol Jon i luk wan vison we i soemaot se fulnamba blong Isrel blong God, hemia 144,000. “God i pemaot olgeta finis, i tekemaot olgeta long ol narafala man, nao oli fri. Olgeta ya oli blong God mo blong Smol Sipsip ya, oli olsem ol fas kakae blong garen, we i blong givim i go long God.” Olgeta ya bambae oli ‘ol pris’ blong God, mo bambae ‘oli rul wetem Kraes, gogo wan taosen yia i pas.’—Rev. 5:10; 7:4; 14:1, 4; 20:6; Jem. 1:18.

?I Gat Sam Narafala Tu?

5. (a) ?Hu ya “Isrel blong God”? (b) ?From wanem tok ya “Isrel” i no gat sem mining evri taem?

⁵ I klia se tok ya “Isrel blong God” long Galesia 6:16 i stap tokbaot nomo ol Kristin we tabu spirit i  makemaot olgeta. ?Be i tru se neson blong Isrel i pija blong olgeta we tabu spirit i makemaot olgeta nomo? ?Long sam narafala taem, Isrel i pija blong ol narafala Kristin tu? Yumi faenem ansa blong kwestin ya long ol tok we Jisas i talem long ol aposol we oli stap tru long hem. Hem i talem se: “Mi mi mekem wan kontrak wetem yufala, olsem we Papa blong mi i mekem wan kontrak wetem mi, blong wan kingdom. Bambae yufala i kakae mo dring long tebol blong mi, long kingdom blong mi. Mo bambae yufala i sidaon long ol jea blong king blong jajem ol twelef laen blong Isrel.” (Luk 22:28-30, NW) Samting ya bambae i hapen long “niufala wol ya we bambae i kam,” hemia taem ol samting long wol ya oli kam niuwan bakegen, aninit long rul blong Kraes blong Wan Taosen Yia.—Ridim Matiu 19:28.

6, 7. ?Long Matiu 19:28 mo Luk 22:30, “ol twelef laen blong Isrel” oli minim hu?

⁶ Long rul blong Kraes blong Wan Taosen Yia, ol 144,000 man ya bambae oli mekem wok blong king, pris, mo jaj, long heven. (Rev. 20:4) ?Bambae oli jajem hu? ?Bambae oli rul long hu? Matiu 19:28 mo Luk 22:30 i soemaot se bambae oli jajem “ol twelef laen blong Isrel.” ?Long tufala vas ya, “ol twelef laen blong Isrel” oli pija blong hu? Oli pija blong ol man we oli gat janis blong laef olwe long wol. Hemia olgeta we oli bilif long sakrefaes blong Jisas, be oli no stap long grup ya blong ol king mo pris. (Livae we i laen blong ol pris, i no stap wetem nem blong ol 12 laen blong ol prapa man Isrel.) Long tufala vas ya, ol 12 laen blong Isrel oli pija blong olgeta we bambae oli kasem blesing from wok we ol 144,000 man oli mekem olsem pris. Olgeta ya we oli kasem ol blesing ya oli no pris, be oli ol man blong God, we God i lavem olgeta mo i agri long olgeta. Taswe i stret nomo we ol man blong God bifo oli pija blong olgeta.

⁷ Long vison, aposol Jon i luk se bifo we bigfala trabol i stat, God i putum mak blong hem blong olwe long ol 144,000 man we oli Isrel blong God. Afta, Jon i luk “wan bigfala kampani” we oli plante tumas blong kaontem, mo we “oli kamaot long olgeta neson.” (Rev. 7:9, NW) Olgeta ya bambae oli laef tru long taem blong bigfala trabol, blong stap aninit long rul blong Kraes blong Wan Taosen Yia. Long taem ya, plante milian, milian man bambae oli laef bakegen blong joen wetem olgeta. (Jon 5:28, 29; Rev. 20:13) “Ol twelef laen blong Isrel” oli pija blong olgeta evriwan ya we Jisas mo ol 144,000 man we oli rul wetem hem, bambae oli jajem olgeta.—Wok 17:31; 24:15; Rev. 20:12.

8. ?Olsem wanem ol samting we ol man Isrel oli mekem evri yia long Dei blong Stretem Sin, oli pija blong ol samting we ol 144,000 man bambae oli mekem blong givhan long ol narafala man?

⁸ Ol samting we ol man Isrel oli mekem evri yia long Dei blong Stretem Sin, oli pija blong ol samting we ol 144,000 man bambae oli mekem blong givhan long ol narafala man. (Lev. 16:6-10) Fastaem, hae pris i mas kilim wan buluk blong givim i go long God, from “sin blong hem wetem ol sin blong famle blong hem.” Long sem fasin, sakrefaes blong Jisas i blong famle blong hem fastaem, hemia olgeta we bambae oli wok olsem pris wetem hem long heven. Long Dei blong Stretem Sin, i gat tufala nani tu, we tufala i blong tekemaot sin blong ol narafala man Isrel. Long haf ya blong Baebol we laen blong ol pris i pija blong ol 144,000 man, ol narafala man Isrel oli pija blong olgeta we oli gat janis blong laef olwe long wol. Hemia i soemaot se tok ya “ol twelef laen blong Isrel” long Matiu 19:28 i no stap tokbaot ol man we tabu spirit i makemaot olgeta blong oli wok olsem pris wetem Jisas. Be tok ya i minim olgeta narafala man we oli bilif long sakrefaes blong Jisas. *

9. ?Long vison blong Esikel long saed blong haos blong God, ol pris oli pija blong hu? ?Mo ol man Isrel we oli no pris, oli pija blong hu?

 ⁹ Tingbaot wan narafala samting. Profet Esikel i luk wan vison blong haos blong Jeova mo olgeta samting long haos ya. (Esik., japta 40-48) Long vison ya, ol pris oli stap wok long haos blong God. Oli stap tijim ol man, oli kasem advaes we i kam long Jeova, mo oli kasem ol tok long Jeova we oli save yusum blong stretem neson ya. (Esik. 44:23-31) Long semfala vison ya, ol man blong ol defren laen oli kam blong mekem wosip mo givim sakrefaes. (Esik. 45:16, 17) Taswe, ol pris long vison ya oli pija blong ol Kristin we tabu spirit i makemaot olgeta. Ol man Isrel we oli no stap long laen blong ol pris, oli pija blong ol man we bambae oli laef olwe long wol ya. Vison ya i soemaot se tufala grup ya oli joengud blong wok tugeta. Mo ol pris oli lidim ol man blong mekem trufala wosip.

10, 11. (a) ?Wanem tok blong Jisas we i mekem bilif blong yumi i strong, taem yumi luk we i kamtru? (b) ?Wanem kwestin i stanap long saed blong ol narafala sipsip?

¹⁰ Jisas i tokbaot “ol narafala sipsip,” we oli no blong semfala “yad” olsem “smol kampani” blong ol man we tabu spirit i makemaot olgeta. (Jon 10:16; Luk 12:32, NW) Hem i talem se: “Mi mas tekem olgeta ya tu oli kam, mo olgeta ya bambae oli lesin long voes blong mi, mo bambae oli kam wan kampani nomo, wetem wan man nomo blong lukaot long olgeta.” !Taem yumi luk ol tok ya i kamtru, bilif blong yumi i kam strong moa! Tufala grup ya oli joen tugeta, hemia smol grup blong ol man we tabu spirit i makemaot olgeta mo bigfala kampani blong ol narafala sipsip. (Ridim Sekaraea 8:23.) I tru, ol narafala sipsip oli no mekem wok long vranda blong haos blong God. Be i olsem we oli mekem wok long yad blong haos blong God.

¹¹ Yumi lanem finis se, samtaem ol man Isrel we oli no pris, oli pija blong ol narafala sipsip tede. ?Taswe, olgeta ya we oli gat janis blong laef olwe long wol, olgeta tu oli mas dring waen mo kakae bred long Memoriol? Bambae yumi tokbaot kwestin ya naoia.

Niufala Kontrak

12. ?Jeova i talemaot wanem niufala plan?

¹² Jeova i talemaot wan niufala plan blong ol man blong hem, i se: “Long ol dei we oli stap kam, bambae mi mi mekem wan niufala kontrak wetem laen blong Isrel . . . Bambae mi mi putum loa blong mi insaed long olgeta, bambae mi mi raetemdaon loa ya long hat blong olgeta. Mi bambae mi kam God blong olgeta, mo olgeta bambae oli kam ol man blong mi.” (Jer. 31:31-33, NW) Niufala kontrak ya i mekem se promes we Jeova i mekem long Ebraham bambae i kamtru long bigfala fasin mo blong olwe.—Ridim Jenesis 22:18.

13, 14. (a) ?Hu i joen long niufala kontrak? (b) ?Hu i kasem blesing from niufala kontrak? ?Olsem wanem oli “holem ol tok” blong niufala kontrak?

¹³ Long naet bifo we Jisas i ded, hem i tokbaot niufala kontrak ya, i se: “Kap ya, hem i saen blong niufala kontrak. Blad blong mi we bambae i ron from yufala, hem bambae i mekem kontrak ya i stanap.” (Luk 22:20, NW; 1 Kor. 11:25) ?Olsem wanem? ?Olgeta Kristin oli joen long niufala kontrak ya? Nogat. Samfala nomo, olsem ol aposol we oli dring long kap long naet ya, oli joen long niufala kontrak ya. * Jisas i mekem wan narafala kontrak wetem  olgeta ya, se bambae oli rul wetem hem long Kingdom blong hem. (Luk 22:28-30, NW) Bambae oli stap wetem Jisas long Kingdom blong hem.—Luk 22:15, 16.

¹⁴ ?Olsem wanem long olgeta we bambae oli laef long wol ya aninit long rul blong Kingdom? Olgeta ya bambae oli kasem blesing from niufala kontrak ya. (Gal. 3:8, 9) Oli no joen long kontrak ya, be oli “holem ol tok” blong hem taem oli obei long ol samting we kontrak ya i talem. Profet Aesea i talemaot samting ya i se: “Yufala ol man blong ol narafala kantri, we yufala i kam joen long ol man blong mi, sipos yufala i lavem mi, mo yufala i mekem wosip long mi, mo yufala i mekem wok blong mi, mo yufala i holem Sabat dei, we yufala i mekem ol fasin nomo we i stret blong mekem long dei ya, mo oltaem yufala i holem ol tok blong promes [“kontrak,” NW] blong mi, bambae mi mi tekem yufala i kam long hil ya Saeon, we i tabu, i ples blong mi. Bambae mi mekem yufala i glad long haos blong mi.” Biaen Jeova i talem se: “Haos ya blong mi, bambae ol man oli stap talem se hem i ples blong prea blong ol man blong olgeta kantri.”—Aes. 56:6, 7.

?Hu i Gat Raet Blong Dring Waen Mo Kakae Bred?

15, 16. (a) ?Aposol Pol i joenem niufala kontrak wetem wanem? (b) ?From wanem olgeta we oli gat janis blong laef olwe long wol oli no dring waen mo kakae bred long Memoriol?

¹⁵ Olgeta we oli joen long niufala kontrak oli “gat raet blong go insaed long Rum ya we i Tabu we i Tabu.” (Ridim Hibrus 10:15-20.) Olgeta ya nao bambae oli kasem kingdom ya “we paoa blong hem i no save lus, i no save foldaon.” (Hib. 12:28) From samting ya, olgeta ya nomo we bambae oli king mo pris wetem Jisas Kraes long heven, oli gat raet blong dring long “kap ya” we i saen blong niufala kontrak. Olgeta ya we oli joen long niufala kontrak, God i promes long olgeta se bambae oli mared long Smol Sipsip ya. (2 Kor. 11:2; Rev. 21:2, 9) Ol narafala we oli kam long Memoriol evri yia oli lukluk mo lesin wetem respek, be oli no dring waen mo kakae bred.

¹⁶ Pol i givhan long yumi blong kasem save tu se olgeta we oli gat janis blong laef olwe long wol, oli no dring waen mo kakae bred long Memoriol. Hem i talem long ol Kristin we tabu spirit i makemaot olgeta se: “Taem we yufala i kakae bred ya, mo yufala i dring long kap ya, be oltaem yufala i stap soemaot ded blong Masta blong yumi, gogo hem bambae i kambak.” (1 Kor. 11:26) ?Masta i “kambak” wetaem? Taem bambae hem i kam blong tekem ol laswan blong grup ya we tabu spirit i makemaot olgeta oli kam woman blong hem, blong oli go long hom blong olgeta long heven. (Jon 14:2, 3) I klia se Lodsapa we yumi mekem evri yia bambae i no gohed olwe. “Ol laswan” blong ol pikinini blong woman we oli stap yet long wol, bambae oli gohed blong dring waen mo kakae bred gogo evriwan oli kasem praes blong olgeta long heven. (Rev. 12:17, NW) Taswe olgeta we oli gat janis blong laef olwe long wol, oli no gat raet blong dring waen mo kakae bred. Sipos oli dring mo kakae, bambae Memoriol i no save finis samtaem, i mas gohed olwe.

“Yufala Bambae i Man Blong Mi”

17, 18. ?Olsem wanem profet tok blong Esikel 37:26, 27 i kamtru?

¹⁷ Jeova i talemaot gudfala fasin joen blong ol man blong hem, i se: “Bambae mi mekem wan promes [“kontrak blong pis,” NW] wetem yufala, se bambae mi stap lukaot gud long yufala gogo i no save finis. Bambae mi blesem yufala, mi mekem yufala i kam plante we plante. Mo bambae mi mekem we haos blong mi i stanap long graon ya blong yufala, mo bambae i save stap olwe, gogo i no save finis. Mo bambae mi stap long ples ya wetem  yufala oltaem nomo. Mi bambae mi God blong yufala, mo yufala bambae i man blong mi.”—Esik. 37:26, 27.

¹⁸ Olgeta man blong God oli save kasem blesing taem nambawan promes ya i kamtru, hemia promes long kontrak blong pis. Yes, Jeova i mekem wan strong promes se olgeta we oli obei long hem bambae oli gat pis. Oli soemaot klia frut blong spirit blong hem. Haos blong hem, we i minim trufala wosip, i stanap long medel blong olgeta. Olgeta oli kam ol man blong hem tru, from we oli lego olgeta fasin blong wosip long narafala god, mo oli mekem wosip long Jeova nomo.

19, 20. ?Hu olgeta we oli joen wetem ol man we Jeova i singaot olgeta se ‘ol man blong mi’? ?Niufala kontrak i openem rod blong wanem samting i save kamtru?

¹⁹ !I nambawan we i nambawan blong luk olsem wanem tufala grup ya oli joengud long taem blong yumi! Bigfala kampani we i stap kam bigwan moa oltaem i no save go long heven. Be nating, oli praod blong joen wetem olgeta we bambae oli go long heven. Oli joen gud wetem grup ya we i olsem Isrel blong God. Taem oli mekem olsem, oli kam ol man we Jeova i singaot olgeta se ‘ol man blong mi.’ Profet tok ya i stap kamtru long olgeta se: “Long taem ya, plante man blong ol naranarafala kantri bambae oli kam long Hae God, oli kam man blong hem. Hem bambae i kam stap wetem yumi.”—Sek. 2:11; 8:21; ridim Aesea 65:22; Revelesen 21:3, 4.

²⁰ Jeova i yusum niufala kontrak ya nao blong mekem olgeta samting ya oli kamtru. Plante milian man we oli olsem ol man blong narafala kantri, oli joen finis wetem neson ya we Jeova i glad long hem. (Maeka 4:1-5) Olgeta ya oli gat strong tingting blong holem ol tok blong kontrak ya. Oli save mekem olsem sipos oli glad long ol blesing we oli kasem from kontrak ya, mo oli obei long ol tok blong hem. (Aes. 56:6, 7) Taem oli mekem olsem, olgeta ya wetem Isrel blong God, tugeta oli harem gud long nambawan blesing blong pis we i gohed olwe. I gud we yu tu yu kasem blesing ya—!naoia mo blong olwe!

[Ol futnot]

?Yu Yu Rimemba?

• ?Hu ya “ol twelef laen blong Isrel” we ol 144,000 man bambae oli jajem olgeta?

• ?Ol man we tabu spirit i makemaot olgeta wetem ol narafala sipsip, tugeta oli joen long niufala kontrak, no olsem wanem?

• ?Olgeta Kristin oli gat raet blong dring waen mo kakae bred long Memoriol?

• ?Olsem wanem Baebol i talemaot fasin joen we i kamaot long taem blong yumi?

[Kwestin]

[Tok blong pija long pej 25]

(Lukluk niuspepa)

Plante man oli stap wok naoia wetem Isrel blong God

1950 373,430

1970 1,483,430

1990 4,017,213

2009 7,313,173