I Gat Man Long Heven​—?Be Hu?

Long Yurop, wan olfala woman i go long jos, hem i holem ol bidbid long han blong hem, mo i nildaon long fored blong pija blong Meri, blong i mekem wosip long hem. Long Afrika, wan man wetem woman blong hem, tufala i kafsaedem strong dring klosap long gref blong wan famle we tufala i laekem hem tumas. Long wan ples long Amerika, wan yangfala man i livim kakae mo i tingting dip, hem i wantem toktok long wan enjel we hem i bilif se i stap lukaot long hem. Long Esia, wan pris i bonem ol samting we oli wokem long kalakala pepa, blong i givim wan presen i go long ol spirit blong ol bubu.

?OL MAN ya oli gat wanem tingting we i sem mak? Olgeta evriwan oli bilif se i gat ol spirit oli laef samples. Oli bilif se oli save toktok wetem ol spirit ya, mo ol spirit ya oli save gat bigfala paoa long laef blong ol man. I tru se bilif ya i no niu mo yumi no sapraes long hem. Be samting we i mekem yumi sapraes hemia se i gat plante defdefren tingting long saed blong ol spirit ya se oli hu.

Ol Muslim oli mekem wosip long wan God nomo, hemia Allah. * Ol man we oli talem se oli Kristin, oli bilif se God i wan Triniti, hemia se God Papa, God Pikinini, mo God Tabu Spirit, trifala i wan God nomo. Ol Hindu oli bilif se i gat plante taosen god mo woman god. Sam narafala man oli talem se i gat ol spirit oli stap long sam anamol, tri, ston, mo ol smol reva. Plante narafala man oli bilif long wanem we ol buk, muvi, mo program long televisin oli soemaot long saed blong ol enjel, ol devel, ol lisefsef, ol god mo ol woman god.

Yes, i gat plante defdefren tingting long saed blong ol god mo spirit. Mo long sem fasin, i gat plante defdefren tingting long saed blong ol rod blong toktok wetem ol god mo ol spirit ya. Be sipos yumi tingting gud, i klia nomo se i no olgeta rod ya evriwan we oli stret. Yu traem tingbaot se sam man oli talem long yu blong ring long wan man long telefon. Bifo we yu ring long hem, yu mas save fastaem se hu ya man ya, mo yu mas save sipos hem i stap. Mo yu mas save se bambae hem i mekem wanem taem yu toktok long hem. Sipos no yu stap westem taem blong yu nomo. Samting we i mowas se, maet yu ring long wan man be hem i wan rabis man we i save spolem yu.

?Ale hu olgeta we oli stap long heven? Baebol i ansa long kwestin ya mo i eksplenem tu se hu man we yumi mas toktok long hem, mo bambae hem i mekem wanem taem yumi toktok long hem. Plis yu ridim ol haf we oli kam biaen. Maet bambae yu sapraes long samting we Baebol i talem long saed ya.

[Futnot]