‘Nem Blong Jehova i Olsem Wan Sefples We Yumi Mas Go Haed Long Hem’

“Bambae mi letem ol man we tingting blong olgeta i stap daon mo ol man we oli no gat nem, oli stap. . . . Mo bambae oli mekem nem blong Jehova i kam olsem sefples we oli go haed long hem.”—SEF. 3:12, NW.

1, 2. ?Wanem samting we i olsem hariken, we klosap nao bambae i kasem ol man?

?SAMTAEM yu yu mas resis blong go haed long wan haos natanggura no wan brij from we bigfala ren i stap kam? Be sipos wan bigfala hariken i stap kam, bambae haos natanggura ya, no brij ya, i no naf.

² I gat wan trabol i stap kam we i olsem wan bigfala hariken, mo i mekem se olgeta man long wol oli stap long bigfala denja. Baebol i kolem trabol ya se “dei blong hariken.” ‘Bigfala dei ya blong Jehova’ bambae i kasem olgeta man. Be yumi save faenem wan sefples blong haed. (Ridim Sefanaea 1:14-18. *) ?Bambae yumi haed olsem wanem long “dei blong kros blong Jehova,” we klosap nao bambae i kamtru?

Dei Blong Hariken Long Taem Bifo

3. ?Wanem samting we i olsem “bigfala ren,” i kasem ol ten laen blong Isrel?

³ Dei blong Jehova bambae i stat taem bigfala trabol i spolem olgeta giaman skul long wol. ?Bambae yumi faenem sefples wea? Blong kasem ansa blong kwestin ya, i gud yumi tokbaot samting we i hapen long ol man blong God bifo. Aesea i laef long ol yia seven handred B.K.T. * Hem i talemaot we Jehova bambae i jajem ol ten laen blong Isrel we oli lego hem finis. Aesea i talem se taem ya we Jehova i jajem olgeta, bambae i olsem “bigfala ren” we oli no naf blong blokem. (Ridim Aesea 28:1, 2.) Profet tok ya i kamtru long yia 740 B.K.T., taem ol man Asiria oli kam mekem faet long ol ten laen ya.

4. ?Wanem “bigfala dei blong Jehova” we i kasem Jerusalem long yia 607 B.K.T.?

⁴ Afta long taem ya, i gat wan “bigfala dei blong Jehova” bakegen. Hemia long yia 607 B.K.T., taem Jehova i jajem ol man Jerusalem mo Juda. Hem i jajem olgeta from we olgeta tu oli lego hem. Ale, Nebukadnesa we i king blong Babilon, i talem long ol man Juda se bambae i spolem bigfala taon blong olgeta, Jerusalem. Nao ol man Juda oli mekem kontrak wetem gavman blong Ijip, blong i halpem olgeta. Be kontrak ya, hemia ‘ol giaman toktok nomo we oli stap trastem.’ Olsem bigfala ren we i spolem evri samting, ol ami blong Babilon oli flatemdaon giaman toktok ya ‘we oli stap trastem.’—Aes. 28:14, 17.

5. ?Taem bigfala trabol i spolem ol giaman skul, wanem bambae i hapen long grup blong ol man blong God?

⁵ Bigfala dei blong Jehova we i kasem Jerusalem, i olsem pija blong bigfala trabol we bambae i kam, blong jajem ol skul tede we oli giaman se oli Kristin. Antap long hemia, trabol ya bambae i spolem ol narafala giaman skul long wol, we oli haf blong ‘Bigfala Babilon’ tu. Afta, ol narafala haf blong rabis wol blong Setan, bambae oli lus long bigfala trabol ya. Be ol man blong God olsem wan grup, bambae oli stap laef, from we oli mekem Jehova i kam olsem sefples blong olgeta.—Rev. 7:14; 18:2, 8; 19:19-21.

Fasin Fren Wetem God Mo Laef Blong Yu

6. ?Ol man blong Jehova oli save faenem sefples wea?

⁶ ?Naoia we yumi stap finis long taem blong en, ol man blong God oli save faenem sefples wea? Fasin  fren blong yumi wetem God i save kam olsem wan sefples blong yumi. Hemia taem yumi prea mo yumi “tinghevi long [“nem blong God,” NW],” mo taem yumi mekem wok blong hem olsem we faea i laet long tingting blong yumi. (Ridim Malakae 3:16-18.) Be yumi save se i no naf blong tingting nomo long nem blong God. Jehova i talem se: “Olgeta man we oli singaot long mi long nem blong mi, mi bambae mi sevem olgeta.” (Rom 10:13) Taswe, blong Jehova i sevem wan man, man ya i mas singaot long nem blong hem. Ol tru Kristin oli ‘tinghevi long nem blong God’ mo oli Witnes blong hem. Samting ya i mekem olgeta oli defren long ol narafala man we oli no mekem wok blong Jehova. Mo plante man we hat blong olgeta i stret, oli luksave samting ya.

7, 8. ?Ol Kristin long taem bifo oli mekem wanem blong sevem laef blong olgeta? ?Mo wanem samting tede we i sem mak?

⁷ I no fasin fren blong yumi wetem Jehova nomo we bambae i stap sef. Jehova i promes long ol man blong hem blong sevem laef blong olgeta tu. Blong luksave samting ya, i gud yumi tingbaot wanem i hapen long yia 66 K.T., * taem Cestius Gallus i lidim ami blong Rom blong faet agensem Jerusalem. Jisas i talem finis se God bambae i “katem taem blong trabol ya.” (Mat. 24:15, 16, 21, 22) Samting ya i kamtru taem ol ami blong Rom oli girap wantaem nomo, oli aot bakegen long taon ya. Samting ya i givim janis blong God i “sevem” sam “man,” hemia ol tru Kristin. Olgeta ya oli aot long taon ya mo ol ples raonabaot, oli ronwe. Sam long olgeta oli gokros long Jodan Reva, mo oli haed long ol bigfala hil long is saed blong reva ya.

⁸ Ol Kristin ya bifo oli sem mak long ol man blong God tede. Ol Kristin ya oli lukaot wan sefples blong olgeta, mo ol man blong God tede oli mekem sem mak. Be tede, ol tru Kristin oli no ronwe i go long wan narafala ples, from we oli stap long olgeta ples long wol finis. Nating se i olsem, grup ya we ‘God i jusumaot olgeta,’ wetem ol fren blong olgeta we oli lavem God tu, bambae oli stap laef taem ol giaman skul oli lus. Bambae oli laef from we oli mekem Jehova mo ogenaesesen blong hem, we i olsem ol bigfala hil, oli kam sefples blong olgeta.

9. ?Hu olgeta we oli traem blong haedem nem blong Jehova? Yu save talem wan eksampol.

⁹ I stret nomo we bigfala trabol bambae i spolem ol skul we oli giaman se oli Kristin. Olgeta ya oli no tijim ol man long trutok long saed blong God, mo oli no wantem yusum nating nem blong God. Long ol yia 500 K.T. kasem 1500 K.T., ol man Yurop oli save gud long nem blong God. Long taem ya, fo Hibru leta ya (YHWH no JHVH) we oli raetem blong soemaot nem ya, oli stap long plante silva mane, mo long fored blong plante haos, mo long plante buk mo Baebol, mo insaed long sam jos haos blong Katolik mo Protestan tu. Be tede, oli tekemaot nem blong God long plante Baebol mo long plante narafala ples tu. Yumi luk samting ya long wan leta we ol haeman blong Katolik jos oli raetem long namba 29 Jun, 2008. Long leta ya, Katolik jos i talem se ol man we oli tanem Baebol, oli mas tekemaot fofala leta ya blong nem blong God, mo putum “Masta” long ples blong hem. Vatikan i talem se taem oli singim ol him mo mekem ol prea long jos blong Katolik, bambae oli no yusum prapa nem blong God. Mo ol lida blong plante narafala jos tu, we sam oli talem se oli Kristin mo sam oli no Kristin, oli haedem nem blong tru God long plante milian man we oli joen long jos blong olgeta.

God Bambae i Sevem Olgeta We Oli Mekem Nem Blong Hem i Tabu

10. ?Hu i ona long nem blong God tede?

¹⁰ Ol Witnes blong Jehova, oli mekem samting  we i defren olgeta long ol narafala skul. Oli ona long nem blong God mo oli leftemap nem ya. Oli mekem nem ya i tabu taem oli yusum wetem respek. Jehova i glad long olgeta we oli trastem hem, mo bambae hem i mekem wanem we hem i mas mekem, blong blesem mo protektem ol man blong hem. “Hem i sefples blong olgeta we oli putum tingting blong olgeta i stap strong long hem.”—Neham 1:7; Wok 15:14.

11, 12. ?Long Juda bifo, hu olgeta we oli holemstrong long Jehova? ?Mo hu olgeta we oli mekem olsem tede?

¹¹ Nating se bighaf blong ol man Juda bifo oli lego Jehova, i gat sam long olgeta we oli “mekem nem blong Jehova i kam olsem sefples we oli go haed long hem.” (Ridim Sefanaea 3:12, 13. *) Taem God i letem ol ami blong Babilon oli winim ol man Juda we oli no moa bilif long hem, mo oli tekem olgeta oli go kalabus, i gat sam man olsem Jeremaea, Baruk, mo Ebedmelek, we oli no ded. Olgeta ya oli stap laef “long medel blong” ol man we oli lego Jehova finis. Plante narafala tu oli holemstrong long Jehova taem oli stap long kalabus. Long yia 539 B.K.T., Sirus i lidim ol ami blong Midia mo Pesia blong oli winim Babilon. I no longtaem biaen, Sirus i talemaot desisen blong hem blong letem ol man Jiu oli gobak long kantri blong olgeta.

¹² Long saed blong olgeta ya we oli glad se tru wosip i stanap bakegen, Sefanaea i talem se Jehova bambae i sevem olgeta mo i glad tumas long olgeta. (Ridim Sefanaea 3:14-17.) Jehova i mekem samting ya long taem blong yumi tu. Afta we Kingdom blong God i stat rul long heven, Jehova i sevem ol man blong hem we tabu spirit i makemaot olgeta long wol. Olgeta ya oli no moa kalabus long ol tijing blong Bigfala Babilon. Mo kam kasem tede, hem i glad tumas long olgeta.

13. ?Plante man long olgeta kantri oli no moa kalabus long wanem?

¹³ Olgeta we bambae oli laef olwe long wol, olgeta tu oli kamaot long Bigfala Babilon, mo oli no moa kalabus long ol tijing blong giaman skul. (Rev. 18:4) Taswe, ol tok blong Sefanaea 2:3 (NW) i kamtru long bigfala fasin long taem blong yumi. Hem i talem se: ‘Yufala ol kwaet man long wol we tingting blong yufala i stap daon, yufala i mas lukaot Jehova.’ Long olgeta kantri, ol man we tingting blong olgeta i stap daon, nating se bambae oli laef long heven no long wol, oli stap mekem nem blong Jehova i kam olsem sefples blong olgeta.

Nem Blong God i No Wan Samting We i Majik

14, 15. (a) ?Long taem bifo, wanem samting we sam man oli ting se i majik? (b) ?Yumi no mas yusum wanem samting olsem majik blong protektem mo givim laki long yumi?

¹⁴ Sam man Isrel oli luk haos blong God olsem wan samting we i majik, we i save protektem olgeta long ol enemi blong olgeta. (Jer. 7:1-4) Plante yia bifo, ol man Isrel oli luk Bokis we i saen blong promes blong Hae God, olsem wan samting we i majik, we i save protektem olgeta long taem blong faet. (1 Saml. 4:3, 10, 11) Haeman ya Constantine i raetem tufala Grik leta ya, khi mo rho, long ol sil blong ol soldia blong hem. Hemia fas mo seken leta long nem ya Kraes long Grik lanwis. Hem i ting se hemia i save protektem ol soldia blong hem long taem blong faet. Mo sam man oli talem se King blong Swiden, Gustav Adolph 2 we hem i faet long Faet blong Toti Yia, hem i werem wan klos blong faet we oli wokem long aean, we pija blong hem i stap long pej 14. Yumi save luk nem ya, Iehova, klia nomo long ples we aean klos ya i blokem nek blong hem

¹⁵ Sam man blong God we ol rabis enjel oli bin traem blong spolem olgeta, oli singaot long nem blong Jehova long bigfala voes, nao Jehova i sevem olgeta. Nating se i olsem, yumi no mas ting se sipos yumi holem wan samting we nem blong Jehova i stap long hem, bambae samting ya i gat paoa blong protektem yumi, olsem se nem ya i majik mo i givim laki long yumi. Hemia i no rod blong mekem nem blong Jehova i kam olsem sefples blong yumi.

Sefples Blong Yumi Tede

16. ?Wanem i mekem se tede yumi stap long wan sefples?

¹⁶ Tede, grup blong ol man blong God, i harem gud blong fren wetem God. I olsem se oli stap haed long wan sefples. (Sam 91:1) ‘Slef we i stret mo waes’ mo ol elda long kongregesen, oli givim woning long yumi long saed blong ol fasin blong wol, we oli save spolem fasin blong yumi blong fren wetem God. (Mat. 24:45-47, NW; Aes. 32:1, 2) I gud yumi tingbaot hamas taem we yumi kasem woning  se yumi no mas ronem mane. Mo yumi tingbaot long wanem rod ol woning ya oli protektem yumi, blong i no gat wan trabol i kam spolem fasin blong yumi blong fren wetem God. Mo i gud yumi tingbaot trabol we yumi save kasem sipos yumi no kea long fasin blong yumi blong fren wetem Jehova. Sipos yumi no kea, samting ya i save lidim yumi blong yumi no moa mekem wok blong Jehova. Tok blong God i talem se: “Ol man we oli no gat save, mo we oli no kea, fasin ya blong olgeta bambae i kilim olgeta i ded. Be man we i stap lesin long mi, bambae hem i stap gud oltaem long laef blong hem. Hem bambae i save we i no gat wan samting nating we i save mekem hem i fraet.” (Prov. 1:32, 33) Mo tu, sipos yumi traehad blong mekem ol fasin we i klin, hemia i save givhan long yumi blong fren gud oltaem wetem God.

17, 18. ?Wanem jenis i stap halpem plante milian man tede blong mekem Jehova i kam sefples blong olgeta?

¹⁷ Yumi save tingbaot tu ol tok we slef we i stret mo waes i talem, blong pulum yumi blong folem tok blong Jisas se yumi mas go talemaot gud nius blong Kingdom long olgeta ples long wol. (Mat. 24:14; 28:19, 20) Sefanaea i tokbaot wan jenis we bambae i kamaot blong givhan long ol man, blong oli mekem nem blong God i kam olsem sefples blong olgeta. Yumi ridim se: “Long taem ya, bambae mi jenisim lanwis blong ol man i kam klin lanwis. Nao olgeta oli save singaot nem blong Jehova, blong mekem wok blong hem, we solda blong wan i joen long solda blong narawan.”—Sef. 3:9, NW.

¹⁸ ?Wanem nao klin lanwis ya? Klin lanwis, hemia trutok long saed blong Jehova God mo stamba tingting blong hem we Baebol i tokbaot. Yu yu stap toktok long lanwis ya, taem yu talemaot ol stret save long saed blong Kingdom blong God, mo long saed blong ol wok we Kingdom bambae i mekem, blong nem blong God i kam tabu. Yu stap toktok long lanwis ya taem yu makem gud long tingting blong ol man se hae rul blong God bambae i win, mo taem yu glad nomo blong tokbaot ol blesing we ol man we oli obei long God bambae oli kasem, blong olwe. From we fulap man oli stap toktok lanwis ya, oli pulum plante moa man blong oli “singaot long nem blong Jehova” mo “mekem wok blong hem, we solda blong wan i joen long solda blong narawan.” Yes, naoia plante milian man long wol oli stap mekem Jehova i kam sefples blong olgeta.—Sam 1:1, 3.

19, 20. ?‘Ol giaman tok we ol man oli stap trastem’ bifo, i givhan long olgeta no olsem wanem?

¹⁹ Ol man long wol oli fesem plante trabol we oli bigwan tumas. From we oli wantem tumas blong winim ol trabol ya, plante oli lukluk i go long ol sinman blong oli halpem olgeta. Sipos no, oli ting se maet ol pati blong politik oli save stretem ol problem blong olgeta, sem mak olsem ol man Isrel bifo we oli mekem kontrak wetem ol neson raonabaot long olgeta. Be yu yu save se taem ol man Isrel oli mekem olsem, ol neson ya oli no halpem olgeta nating. Mo i no gat wan politik paoa tede we i save stretem olgeta trabol blong ol man, Yunaeted Neson tu i no naf blong mekem olsem. Taswe, yu no mas trastem ol pati blong politik mo ol kontrak we oli mekem, olsem we oli sefples blong yu. Baebol i tokbaot ol samting ya se ‘ol giaman tok we ol man oli stap trastem.’ I stret nomo we yu tingbaot olgeta olsem, from we ol man we oli trastem olgeta, bambae oli harem nogud tumas.—Ridim Aesea 28:15, 17.

²⁰ I no longtaem, dei blong Jehova we i olsem bigfala hariken, bambae i kasem wol ya. Ol plan we ol man oli folem bambae oli no naf blong protektem olgeta. Mo sefples we man i go haed long hem  taem niuklia bom i bosta, wetem mane tu, bambae i no naf. Aesea 28:17 i talem se: ‘Bambae ol ston blong aes oli folfoldaon olsem ren, oli flatemdaon ol giaman toktok ya we ol man oli stap trastem, mo bambae reva i ron bigwan, i karemaot ol samting ya we tingting blong olgeta i stap hang long olgeta.’

21. ?Wanem blesing we yumi save kasem sipos yumi folem stamba vas blong yia 2011?

²¹ Taem ol samting oli stap hapen naoia mo long fiuja, ol man blong God bambae oli stap gud from we God blong olgeta, Jehova, bambae hem i givhan long olgeta. Nem blong Sefanaea i minim, “Jehova i Haedem.” Nem ya i soemaot se wan sefples nomo blong haed, hemia long Jehova. Taswe, stamba vas blong yia 2011, i givim advaes ya we i waes se: ‘Nem blong Jehova i olsem wan sefples we yumi mas go haed long hem.’ (Sef. 3:12, NW) Naoia, yumi save mekem nem blong Jehova i kam olsem sefples blong yumi, mo yumi mas mekem olsem. Yumi mas trastem hem long olgeta hat blong yumi. (Sam 9:10) Evri dei, yumi mas tingbaot promes ya we i kamaot long God, se: “Nem blong Jehova i olsem wan strong haos. Ol stret man oli resis blong go haed long hem, nao hem i lukaot long olgeta.”—Proveb 18:10, NW.

[Ol futnot]

?Yu Yu Tingbaot?

• ?Yumi save mekem wanem naoia, blong nem blong Jehova i kam olsem sefples blong yumi?

• ?From wanem yumi no mas trastem ‘ol giaman tok we ol man oli stap trastem’?

• ?Wanem promes i stap long saed blong wan sefples we yumi save haed long hem long fiuja?

[Kwestin]

[Tok blong makem poen long pej 13]

Stamba vas blong yia 2011, hemia: ‘Nem blong Jehova i olsem wan sefples we yumi mas go haed long hem.’—Sefanaea 3:12, NW.

[Credit Line blong pija long pej 14]

Thüringer Landesmuseum Heidecksburg Rudolstadt, Waffensammlung “Schwarzburger Zeughaus”