?Yumi Save Luk Olgeta?

YU TRAEM lukluk i go long skae. Nating se yu lukluk longtaem, be bambae yu no luk wan spirit. Yu traem lesin gud, be bambae yu no harem wan i toktok. Nating se i olsem, ol spirit oli stap. Oli waes mo oli gat bigfala paoa. Oli gat ol prapa nem mo ol prapa fasin blong olgeta. Sam spirit oli wantem givhan long yumi, be samfala oli wantem spolem yumi. Ol spirit ya evriwan oli intres long yumi.

Tru God hem i wan Spirit. (Jon 4:24) Hem i gat prapa nem blong hem we i mekem hem i defren long ol narafala giaman god we oli plante tumas. Nem blong hem Jehova. (Ol Sam 83:18) * Wan man we i wokem ol sing blong presem God i talem se: “Hae God i hae we i hae, mo yumi mas presem hem, yumi mas leftemap nem blong hem. Hem i hae moa long ol narafala god, mo i stret blong yumi ona moa long hem, i winim we yumi ona long ol narafala god. Olgeta god ya blong ol man blong ol narafala kantri oli giaman god nomo, oli no save mekem wan samting, be Hae God ya, hem i mekem skae wetem olgeta samting we i stap long hem. Bigfala laet i stap saen raonabaot long hem i soemaot we hem i King, nem blong hem i hae we i hae. Olgeta samting long haos blong hem oli soemaot we paoa blong hem i bigfala tumas, mo we hem i gud we i gud.”—Ol Sam 96:4-6.

Ol Vison We Oli Soemaot Tru God

Baebol i talem se: “I no gat man we i luk God samtaem.” (Jon 1:18) Wan man we taem hem i bon, ae blong hem i blaen, hem i no save se kala i olsem wanem. Long sem fasin, yumi neva luk God samtaem, taswe yumi no save se bodi blong God i olsem wanem mo se hem i naes olsem wanem. Be long Baebol, God i yusum ol samting we yumi save luk blong eksplenem ol samting we yumi no save luk. Hem i olsem wan gudfala tija we i eksplenem ol had samting long ol studen blong hem, long wan fasin we oli save kasem save long hem. Taswe Jehova i mekem ol man blong hem bifo, oli luk ol vison. Samting ya i givhan long yumi blong gat wan tingting long saed blong heven mo yumi save kasem save paoa we olgeta long heven oli gat long yumi.

Profet Esikel i luk wan vison we i soemaot haenem blong Jehova. Hem i luk faea we i laet, wan bigfala laet, flas ston ya safaea, mo wan renbo. Long wan narafala vison, aposol Jon i luk Jehova i sidaon long bigfala jea we i olsem jea blong king. Mo i talem se Jehova i “saen we i saen, olsem tu gudfala ston ya jaspa mo kanilian we tufala i red. Mo i gat wan renbo i goraon long jea ya, mo laet blong hem i saen olsem gudfala ston ya emeral, we i grin.” Ol tok ya oli givhan long yumi blong save se Jehova i luk naes tumas, hem nomo we i naes olsem. Hem i gat pis mo i kwaet. —Revelesen 4:2, 3; Esikel 1:26-28.

Profet Daniel tu i luk Jehova long wan vison, hem i luk we “i gat plante narafala man [hemia ol enjel]  we oli plante we plante tumas, man i no save kaontem olgeta, oli stap stanap long fes blong [Jehova].” (Daniel 7:10) !Ating Daniel i sapraes tumas taem hem i luk samting ya! Sipos yu yu luk wan enjel nomo long wan vison bambae yu sapraes tumas. !Be traem tingbaot sipos yu luk plante plante enjel olsem!

Baebol i tokbaot ol enjel klosap 400 taem. Oli gat ol defdefren posisen no wok, samfala oli seraf mo samfala oli jerubim. Grik mo Hibru tok we oli tanem i kam “enjel” long Baebol, tugeta i minim “man blong karem tok.” Taswe wanwan enjel i save toktok wetem narafala enjel, mo long taem bifo, oli toktok long ol man. Jehova i mekem ol enjel longtaem bifo we hem i mekem ol man. Oli no ol spirit blong dedman we oli go laef long heven. Nogat.—Job 38:4-7.

Long vison we Daniel i luk, bigfala hip blong ol enjel oli kam wanples blong luk wan spesel samting. Daniel i luk “wan man we i olsem man blong wol ya,” i go stanap long fored blong bigfala jea blong Jehova. Ale Jehova i putumap hem i “king, i leftemap nem blong hem i hae we i hae, mo i givim bigfala paoa long hem, blong bambae olgeta man blong olgeta kantri mo olgeta kala mo olgeta lanwis oli wok blong hem.” (Daniel 7:13, 14) Man ya “we i olsem man blong wol ya,” hem i mekem wan bigfala wok long heven. Hem i Jisas Kraes we i laef bakegen, mo we i king blong olgeta ples long wol. I no longtaem, rul blong hem bambae i finisim olgeta gavman blong man. Aninit long rul blong Jisas bambae i no moa gat man i sik, bambae i no moa gat man i krae, mo bambae i no moa gat man i mekem i strong tumas long ol narafala man. Bambae i no moa gat fasin pua mo bambae i no moa gat man i ded.—Daniel 2:44.

Ating bigfala hip blong ol gudfala enjel long heven oli glad tumas taem oli luk Jisas i kam king. Oli wantem se ol man oli gat wan gudfala laef. Be sore tumas, i no olgeta spirit no enjel we oli gat tingting olsem.

 Ol Enemi Blong God Mo Blong Man

I no longtaem afta long taem we God i mekem man, wan enjel we i wantem tumas se ol man oli wosipim hem, hem i girap agensem Jehova. Fasin blong hem nomo i mekem se hem i kam Setan, we i minim “man blong agensem man.” Setan i stamba blong rabis fasin mo hem i agensem bigwan Jehova we i stamba blong fasin blong lavem man. Sam narafala enjel oli joen long Setan blong agensem God. Baebol i singaot olgeta se ol devel no ol rabis enjel. Sem mak olsem Setan, ol rabis enjel ya tu, oli ol enemi blong ol man. Oli wantem spolem man nomo. Paoa we oli gat long tingting blong ol man i mekem plante trabol long wol, olsem fasin safa, ol fasin we oli no stret, sik, fasin pua, mo faet.

Plante jos we oli talem se oli Kristin oli no moa tokbaot Setan tumas. Be nating se i olsem, Baebol i givim save long yumi long saed blong fasin mo tingting blong enjel ya we i stronghed. Buk blong Job i talem se: “Nao wan dei, olgeta long heven oli kam stanap long fes blong Hae God, mo long dei ya, Setan tu i kam wetem olgeta.” Biaen taem Setan i toktok wetem God hem i tok agensem Job, se Job i stap mekem wosip long God from wan risen nomo, hemia blong God i blesem hem. Ale Setan i traem blong pruvum se ol tok we hem i sakem agensem Job i tru. Hem i mekem bigfala trabol long Job. Sam anamol blong hem mo ol ten pikinini blong hem evriwan, hem i kilim olgeta i ded. Biaen hem i mekem we ol soa i kavremapgud bodi blong Job. Olgeta samting ya we Setan i mekem long Job, oli no mekem we Job i lego God. Yes, tok blong Setan i giaman nomo.—Job 1:6-19; 2:7.

I gat risen from wanem Jehova i letem Setan i stap kam kasem tede, be bambae hem i no letem Setan i laef olwe. I no longtaem bambae Setan i lus. Jehova i mekem sam samting finis blong spolem Setan. Buk blong Revelesen i givhan long yumi blong save ol samting ya we oli hapen long heven mo we yumi no save luk. Hem i talem se: “I gat bigfala faet i stat long heven. Mikael [Jisas Kraes we i laef bakegen] wetem ol enjel blong hem oli stap faet agens long bigfala algita ya [Setan]. Nao bigfala algita ya wetem ol enjel blong hem oli traem faet agens long Mikael olgeta, be oli lus, mo i no moa gat ples blong olgeta long heven. Bigfala algita ya, hem i snek ya blong bifo we nem blong hem ‘Setan’ no ‘Man we i agensem man’, we i stap giaman long olgeta man long wol, i lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol.”—Revelesen 12:7-9.

Yumi luk se vas ya i tokbaot Setan se “i stap giaman long olgeta man long wol, i lidim olgeta oli go krangke.” Hem i yusum ol giaman tijing blong ol skul blong lidim ol man oli go krangke, nao oli gowe long Jehova mo Tok blong hem. Wan tijing we i giaman, hemia se taem man i ded, hem i gat wan spirit we i gohed blong laef samples. I gat plante defren tingting long saed ya. Long Afrika mo Esia, plante man oli gat tingting ya se taem man i ded, spirit blong hem i go long ples we ol spirit blong ol bubu blong hem bifo, oli stap long hem. Ol tijing blong pegatri mo helfaea oli stanap long tingting ya se taem man i ded, hem i laef yet samples.

?Taem Man i Ded, Hem i Go Long Heven?

?Be olsem wanem? Tijing ya we plante milian man long wol oli gat se, olgeta gudfala man oli go long heven, ?i tru no i giaman? Baebol i talem se i gat sam gudfala man oli go long heven, be namba blong olgeta i smol nomo taem yumi tingbaot ol milian man we oli ded finis. Baebol i talem se i gat 144,000 man we God i “tekemaot olgeta long wol ya,” mo bambae olgeta “oli pris” mo “oli king, oli rul long olgeta man long wol.” (Revelesen 5:9, 10; 14:1, 3) Bambae olgeta ya wetem Jisas Kraes we hem i Pikinini blong man, oli mekemap wan gavman we i stap long heven. Gavman ya, hem i Kingdom blong God. Gavman ya bambae i spolem Setan mo ol rabis enjel blong hem, mo bambae i mekem wol i kam wan paradaes. Bighaf blong olgeta we oli ded bambae oli laef bakegen mo bambae oli save kasem laef we i no save finis long Paradaes long wol.—Luk 23:43.

Blong talem bakegen long sot toktok nomo, i gat plante plante spirit. Jehova God we i mekem olgeta samting, hem nao i hae moa. I gat plante enjel we oli obei gud long hem mo oli mekem wok blong hem. Ol narafala enjel we Setan nao i jif blong olgeta, oli agensem Jehova mo oli giaman long ol man blong traem lidim olgeta oli go krangke. I gat wan grup blong ol man we oli no plante, be God i “tekemaot” olgeta long wol no i jusumaot olgeta blong oli mekem sam spesel wok long heven. I gud yu tingbaot ol samting ya taem yu ridim nekis haf. Nekis haf ya i tokbaot hu ol spirit we oli stap toktok long man, mo i tokbaot hu we i stret blong toktok long hem.

[Futnot]