Jisas—?From Wanem Hem i Ded?
Jisas—?From Wanem Hem i Ded?
“Mi mi Pikinini blong Man, . . . mi kam blong . . . givim laef blong mi blong pem rod blong plante man oli go fri.”—MAK 10:45.
JISAS i save wanem samting we bambae i hapen long hem. Hem i save se bambae hem i no gat wan laef we i kwaet mo i gat pis long hem. Jisas i save se laef blong hem bambae i sot nomo, bambae hem i ded taem hem i gat bitim 30 yia. Nating se i olsem, hem i rere blong ded.
Baebol i soemaot se ded blong Jisas i gat bigfala mining. Wan buk i talem se Kristin Grik haf blong Baebol, no Niutesteman, i tokbaot ded blong Jisas klosap 175 taem. ?From wanem Jisas i mas safa mo i mas ded? Yumi mas save ansa blong kwestin ya, from we ded blong Jisas i save gat bigfala paoa long laef blong yumi.
▪ Jisas i save se bambae hem i ded Long las yia blong laef blong Jisas, plante taem hem i talem long ol disaepol blong hem se bambae hem i safa mo i ded. Taem hem mo ol twelef aposol blong hem oli stap wokbaot i go long Jerusalem blong mekem las lafet blong Pasova wetem hem, hem i talem long olgeta se: “Sam man bambae oli putum mi, mi Pikinini blong Man, mi go long han blong ol jif pris mo ol tija blong Loa. Olgeta ya bambae oli jajem mi, se bambae mi mas ded, mo bambae oli putum mi long han blong ol man we oli no laen blong Isrel. Nao olgeta ya bambae oli mekem plei long mi, mo oli spet long mi, mo oli wipim mi, mo bambae oli kilim mi mi ded.” * (Mak 10:33, 34) ?From wanem Jisas i savegud samting we bambae i hapen long hem?
Jisas i savegud plante profet tok long Hibru haf blong Baebol, we oli talemaot ded blong hem. (Luk 18:31-33) Yu traem tingbaot sam long olgeta, mo ol vas blong Baebol we oli soemaot se ol profet tok ya oli kamtru.
Long saed blong Mesaea, bambae . . .
▪ Wan man i salem hem i go long han blong ol enemi blong hem, blong 30 sekel silva.—SEKARAEA 1:12; MATIU 26:14-16.
▪ Oli wipim hem mo oli spet long hem.—AESEA 50:6; MATIU 26:67; 27:26, 30.
▪ Oli nilim hem long pos.—OL SAM 22:16; MAK 15:24, 25, NW.
▪ Oli tok nogud long hem mo oli laf long hem taem hem i stap hang long pos.—OL SAM 22:7, 8; MATIU 27:39-43.
▪ I no gat wan bun blong hem nating i brok.—OL SAM 34:20; JON 19:33, 36.
Ol profet tok ya wetem plante narafala profet tok oli kamtru long Jisas. Hem wan nomo i no save mekem ol samting ya oli kamaot olsem. Olgeta profet tok ya we oli kamtru long Jisas oli pruvum se God nao i sanem hem i kam. *
?From wanem Jisas i mas safa mo i mas ded?
▪ Jisas i ded blong ansa long sam impoten kwestin Jisas i save gud ol bigfala kwestin we oli bin stanap long garen blong Iden, long saed blong hae rul blong God. Wan enjel we i girap agensem God, i trikim Adam mo Iv, nao tufala i no moa obei long God. Taem Adam mo Iv tufala i mekem samting ya, i olsem we tufala i talem se fasin blong God blong rul long tufala, i no stret. Taem tufala i mekem sin, i olsem we tufala i talem se ol man oli no save holemstrong long God taem ol samting oli kam blong traem olgeta.—Jenesis 3:1-6; Job 2:1-5.
Jisas i givim ansa we i stret gud long tufala kwestin ya, long saed blong hae rul blong Jehova mo fasin blong man blong holemstrong long God. Jisas i leftemap hae rul blong God taem hem i obei long God “gogo i ded . . . long pos.” (Filipae 2:8, NW) Jisas i pruvum tu se wan man we i stret gud olgeta i save holemstrong long Jehova, nomata se hem i kasem ol trabol we i strong tumas.
▪ Jisas i ded blong pemaot olgeta man Profet Aesea i talem se Mesaea ya we God i promes blong sanem, bambae i safa mo i ded. Mo ded blong hem bambae i tekemaot sin blong olgeta man. (Aesea 53:5, 10) Jisas i kasem save gud samting ya, mo hem i glad blong givim ‘laef blong hem blong pem rod blong plante man oli go fri.’ (Matiu 20:28) Ded blong hem we i olsem wan sakrefaes, i openem rod blong ol sinman oli save fren gud wetem Jehova, mo blong oli save kam fri long sin mo ded. Ded blong Jisas i openem rod blong yumi save kasembak laef ya we Adam mo Iv, tufala i lusum, hemia laef blong olwe long wol ya we i kam stret gud olgeta. *—Revelesen 21:3, 4.
▪ ?Yu yu save mekem wanem? Yumi tokbaot finis ol samting we Baebol i talem long saed blong Jisas, se hem i kamaot long weples, laef blong hem i olsem wanem, mo from wanem hem i ded. Taem yumi save trutok long saed blong Jisas, yumi no moa gat rong tingting. Taem yumi folem trutok ya long laef blong yumi, yumi save kasem plante blesing. Sam long ol blesing ya, hemia se laef blong yumi naoia bambae i gud moa, mo yumi save kasem laef blong olwe long fiuja. Baebol i talem wanem we yumi mas mekem, sipos yumi wantem kasem ol blesing ya.
▪ Yumi mas lanem moa long saed blong Jisas Kraes mo wok we hem i mekem long stamba tingting blong Jehova.—JON 17:3.
▪ Yumi mas bilif long Jisas. Yumi mas soemaot long laef blong yumi se yumi bilif long hem olsem Sevia blong yumi.—JON 3:36; OL WOK 5:31.
Ol Witnes blong Jehova oli glad blong halpem yu, blong yu lanem moa long saed blong Jisas Kraes, “stret Pikinini” blong God, we i mekem rod blong yumi save kasem presen ya, “laef we i no save finis.”—Jon 3:16.
[Ol futnot]
^ par. 5 Plante taem Jisas i tokbaot hem wan olsem “Pikinini blong Man.” (Matiu 8:20) Tok ya i soemaot se hem i wan man olsem ol narafala. Mo tok ya i soemaot tu se hem nao i “man we i olsem man blong wol ya,” we profet tok blong Baebol i tokbaot.—Daniel 7:13, 14.
^ par. 13 Sipos yu wantem kasem save moa long ol profet tok we oli kamtru long Jisas, yu save lukluk buk ya ?Wanem Samting We Baebol i Rili Tijim? we ol Witnes blong Jehova oli wokem. Long diksonari blong buk ya, yu save ridim haf ya “Jisas Kraes—Mesaea Ya We Ol Profet Oli Bin Tokbaot.”
^ par. 17 Sipos yu wantem kasem moa save long ded blong Jisas we i olsem wan sakrefaes blong pemaot ol man, yu save lukluk buk ya ?Wanem Samting We Baebol i Rili Tijim? long japta 5, “Ransom—Beswan Presen We God i Givim.”
